Ba-Loma 3
3
1Bise Yuda aleki bato bahatu la nai? ko nkita ena nkesa ena yonge eka nai? 2Bike bon’ekotua l’ekotua; en’oso, noka, baoyi bana Yakomba bafamaki eneyal’iyo. 3Kanga bamoi’aniyo batimedya vo: biinda boniyo bon’imeedyo bosokoehya nde solosolo ena Yakomba? 4Efana! Yakomba ayalamake solosolo, koko boto l’oto bofoci, bosamb’onoki yoi otengamaka;
Lacin’eho oyengwa en’aoyi’ane,
Ko enay’e en’etendelo en’akambo, olonge.
5Koko yombo biinda boniso bona mbongi bofoladya mbongi ena Yakomba, tongila is’ate’oya? Iso Mbo, Yakomba onutodya nkele ainda nde mbongi? (Latend l’okotua bon’ato.) 6Efana! yombo yok’oho, tumbe Yakomba angotend’akambo ban’ato bana loko yok’osamb’oya? 7Ko yombo solosolo ena Yakomba eoatel’ende lokumo loneloleki lacin’ena yoi linaliki’m’ofotuka, emi lakoiyama likambo nk’eyoka boto’on’owe lacina nai? 8Ko tofile (yoka bosamb’onoyali nkindoina mpoci, ko bamoi Mbo iso totenda yok’oho), Mbo iso tokambake bowe lacin’eho bolotsi boatame? Ekoiyelo eniyo eakolana nko nkolana.
9Iya nai? Iso talek’iyo bolotsi? Efana! ef’oko! lacin’oka tomolaakola en’oso, is’ate le Ba-Yuda le Ba-Elene bayali en’owe, nk’iyatu, 10to bosamb’onoyali yoi linalitengi,
Efan’oto onoyali la mbongi, efana nko l’omoko tu
11Efan’omoko onononganya,
Efan’onofona Yakomba.
12Iyatu bamotembwa, bamoyalama bato banindankita, nk’iyatu,
Efan’onila bolotsi, efana nko l’omoko tu.
13Bohoho boniyo boyali nketa enekombwa;
Bamofota la ndemi iniyo;
Ngenge ena njua eyali en’ase’a nkefu iniyo;
14Bonyu’oniyo bolola la bemomo ko l’aoyi bananjikela;
15Bakak’aniyo bayali la laango lacin’eho bayake bato;
16Mbeha la bino bayali ena mboka iniyo;
17Ko bateya mboka ena mwi;
18Mbanga ena Yakomba efayali en’oso bon’aiso’aniyo tu.
19Koko tey’oka baoyi l’aoyi bahatu banila basangya, baila baho lacin’eniyo banayali ena lifoka lina basangya, lacina bonyua l’onyua bomumame, ko baise’enyanga bahatu bakoiyame likambo la Yakomba. 20Lacin’eho, efan’oto onoyengwa en’oso’onande la bikambwa bin’asangya, lacin’oka bowe boeyana nko l’asangya. 21Koko inanga mbongi ena Yakomba emenya efan’asangya, ko basangya l’asumoli bayali temoins ina mbongi eho, 22nko mbongi ena Yakomba enatama l’imeedyo eneyali Yesu Masiya eneyal’iyatu banimedya, efan’eeikitanelo; 23lacina bato bahatu bamokwa en’owe, ko baminda bokonde bona Yakomba; 24koko bayengwa boyengo l’isei inande ina nganji, nko la mbiko eneyali Masiya Yesu, 25onoki Yakomba olekyaka lacin’eho ayalame nk’eyoka mbeka en’eambanyedyo, l’imeedyo en’akil’anande, lacin’eho aenyanya mbongi enande, enetakanedy’ende baoyi’owe baho banilamaki’ale, lacin’en’isei ina Yakomba ina ndingalinga: 26noka, lacin eho aenyanya mbongi enande en’isik’ine, lacina endamene ayale ona mbongi, ko la boyengoli bon’oto onimedya Yesu. 27Njofefa eyali meya? Emuma. La boeka boka nai? Boeka bona bikambwa? Efana; nko l’oeka bon’imeedyo. 28Lacin’eho, totanga is’ate boto ayengwa boyengo l’imeedyo, efa l’ikambwa bin’asatigya. 29Yakomba ayali nde Yakomba ona Ba-Yuda kei? Afayali nde Yakomba en’efenda tik’osamb’oho? O, Yakomba en’efenda nkoho; 30lacin’oka Yakomba ayali nk’emoko, onongoyengola banakesania yonge l’imeedyo, ko l’anatakesama yonge l’imeedyo nkoho. 31Iya, toyaka nde basangya l’imeedyo? Efana! ef’oko; tokikyabasangya.
Currently Selected:
Ba-Loma 3: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
