Ba-Loma 5
5
1Lacin’eho, is’anayengwa boyengo l’imeedyo toata mwi la Yakomba lacin’ena Nkolo eniso Yesu Masiya; 2koko toata etuelo l’imeedyo en’isei ine inemal’iso nko lacin’enande; ko tonyangela lolengedyo lon’ekumedyo ena Yakomba. 3Koko ef’oho kei: tonyangela bino binen’iso; lacina tey’oka bino biatela boto ekikedyo en’otema, 4ko ekikedyo en’otema nko elonga ena lomeko, ko elonga ena lomeko nko lolendedyo; 5ko lolendedyo lofatookya nsoi; lacin’oka nganji ona Yakomba emutelama en’etem’eniso la Bolimo bon’olotsi onofamaki eneyal’iso. 6Lacina, enek’is’oyalaka bolu’olu, Masiya awaki en’esike enekoli lacin’en’ato banafana mbongi ena Yakomba. 7Boto afalange’olotsi awu lacin’en’oto bona mbongi; koko yombo boto’omoko angokolana liwa lacin’en’oto bon’olotsi. 8Ohonde Yakomba aototuma nganji enatok’ende, lacina, enek’is’oyalaka bato ban’owe, Masiya awaki lacin’eniso. 9Ko yoi linalileki nko line: is’anayengwa boyengo isanga l’akil’anande tongika ena nkele ona Yakomba nko l’ende. 10Yombo, enek’is’oyalaka baokyi’owe tambanaki la Yakomba en’efili l’ewedi bona Bon’onande bona mpame, yoi linalileki lika, isanga, enamban’iso en’efili la Yakomba, tongika la liiko lonande; 11ko ef’oho kei, koko iso tonyangela eneyali Yakomba la Nkolo eniso Yesu Masiya, onotoatel’iso isanga esimbanelo en’efili.
12Lacin’eho, yok’onoki bowe otuaka ena loko Toto’omoko, ko bewedi beoya l’owe, nk’osamb’oho bewedi beoyela eneyali bato bahatu, lacin’oka bato bahatu bailaki bowe. 13Bowe boyaaki ena loko kuma ba-sangya batafatna. Koko boto afaandama bowe kuma basangya batafama. 14Koko ncika Adama yengoko Mose bewedi beyaaki la mpifo yoka liloka mene, ko beoyela nk’eneyal’iyo nkoho banilaki bowe bonotakoluna l’ekwelo eneki Adama okwaka, ende onoyali ekolanya ena boto onoyayi. 15Koko bokotua bona nganji l’ona ekwelo boacikitana. Lacin’oka, yombo bato bike bawaki l’ekwelo en’oto’omoko, isei ina Yakomba ko la nganji enefamaki l’isei ina boto’omoko, Yesu Masiya, bamoleka lifula mpula mene eneyali bato bike. 16Ko nganji eho efakoli la yoi linilamaki l’oto’omoko onilaki’owe; lacina ekeselo en’akambo eneyaki l’oto’omoko eatela bato nk’ekoiyelo, ohonde nganji eneyaki lacin’ena bikwelo bike eatela bato nko boyengo. 17Ko yombo bewedi beyaaki la mpifo ena lifoka lacin’en’ekwelo en’oto’omoko, iy’anatamba mpula en’isei l’ena nganji eho ena mbongi bangoleka liata mpifo ena lifoka ena liiko l’oto’omoko, nko Yesu Masiya. 18Koko yoka bosamb’onoki etendelo en’akambo oyaka eneyali bato bahatu l’ekoiyelo lacin’ena ekwelo emoko; nk’osamb’oho boyengo bona liiko boyaki eneyali bato bahatu lacin’en’ekambwa emoko ena mbongi. 19Yoka bosamb’onoki bato bike oyalamaka bato ban’owe lacin’ena lopoko lon’oto’omoko, nk’osamb’oho bato bike bangoyalama bana mbongi lacin’ena mpika en’imeedyo en’oto’omoko. 20Koko basangya bafamaki lacin’eho ekwelo efule; koko eneki bowe ofulaka, isei isokwaki nko nsokwamene; 21lacina, yok’onoki bowe oyalaka la locili lona lifoka en’ewedi, nk’osamb’oho isei late locili lona lifoka la mbongi ena liiko lonelofakale la Yesu Masiya Nkolo eniso.
Currently Selected:
Ba-Loma 5: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
