Bikambwa Biniki Bikima 9
9
1Koko Saula aokusa lifodya baoyi bana biano la njaka eneyali bakili bana Nkolo; ko aocoa eneyali nkanga iyome, 2ko amufola bekanda eneyali besolongano bena basunagoga bana Damaseke, lacin’eho yombo angosungya bato banayali bana Mboka meho, le mpame le bayato, ayi l’iyo ntungama ena Yelusalema. 3Enem’end’ocoa, aolama la Damaseke; ko kaimo fololo mene ena loola eololoma eneyali ende nko sole. 4Ko aokwa ena loko, ko aoka lofoso lonelolokwel’ende ate, Saula, Saula, onnyom’emi lacina nai? 5Aamba, ate, Nkolo, E nai? Nkolo aamba ate, Emi nko Yesu onanyom’e; (eyali locili eneyali e ofomana la tosongo. 6Ende ailima, ko aofefa, aila, ate, Nkolo, olanga njile’oya? Ko Nkolo amosumola, ate,) Emala, fola en’onyanga, ko ongolakama baoyi banakolana l’e lacina oile. 7Bato banakendaki l’ende baemala nko la losomo, lacin’oka baoka lofoso, ohonde baten’oto. 8Koko Saula aemala ena loko, ko eneki baiso’anande olifwaka, atena tutu; ko bamosuka l’akasa, ko bamoyedya ena Damaseke. 9Bin’esaso ende atena tu, ko atal’iyema, ko atamela.
10Bokili’omoi ayaaki ena Damaseke, lina linande lika Anania; ko Nkolo amosumola en’enelo, ate, Anania! Ende ate, Em’one, Nkolo. 11Ko Nkolo amosumola, ate, Emala, coaka ena mboka enetangama Cilili, ko ufola meho en’otumba bona Yuda, boto onotangama Saula, bise Taluseu; ienda, ayaonde. 12Ko amena en’enelo boto onotangama Anania ayatua, ko ayatadya likasa eneyal’ende lacin’eho aene lakina. 13Koko Anania aamba, ate, Nkolo, moka eneyali bato bike bokotua bon’oto’one, la baoyi ban’owe bike banaki’nd’oilelaka bato’ane ban’oeka ena Yelusalema; 14ko isanga amofam’etelo la nkanga iyome lacina aunde bato bahatu banelela lina line en’oondo. 15Ko Nkolo amosumola, ate, Ombocoa, lacin’oka ende ayali emunyi eneki’m’osonaka, lacin’eho atole lina linami en’oso bona Befenda l’en’oso bona bafoka bana rois, ko l’en’oso bona ban’ana Yisalaele; 16lacin’emi nongotum’ende baoyi bahatu bana bino binikoli l’ende lacina aene lacin’ena lina linami. 17Ko Anania aocoa, ko aotua en’otumba; aotadya bakasa eneyali ende, ate, Efili Saula, Nkolo mene, nko Yesu onenyaki eneyal’e ena mboka enem’oyaka, amontoma lacin’eho oene lakina, ko lacina olole la Bolimo bon’olotsi. 18Ko isasanga bamongoci yoka mpasi baokwa en’aiso’anande, ko aena nko njena; aemala, ko ainama en’asi; 19ko eneki’nd’olaka toma, aokika ena yonge;
Ko Saula aoyala bina bemoi l’akili banayaaki ena Damaseke. 20Ko isasanga aokumya Yesu ena basunagoga, aila, ate, Yesu ande Bon’ona Yakomba. 21Ko iyatu banokaki baofefa, Mbo one afayali nde ende onehyaki iy’anelelaki lina line en’oondo ena Yelusalema? ko ataya nde mendo lacin’eho atol’iyo ntungama en’oso bona nkanga ina toome? 22Koko Saula aofula la locili, aokoiya Ba-Yuda banatongaki ena Damaseke ena ntango iniyo, eneki’nd’oatumaka solosolo one ayali nko Masiya.
23Eneki bina bike oetaka, Ba-Yuda baang’eango lacin’eho baoyake; 24ohonde eango eniyo eeyana la Saula. Baotombanya befolo l’ane l’oco lacin’eho baoyake; 25koko bakili bamotamba l’oco, bamosonga en’ifondo inay’okolo, ko bamokitsa en’ili bona bokako bona baufe.
26Ko eneki Saula oyelaka ena Yelusalema, aomeka lacina aambane l’akili; koko iyatu baang’ende nko mbanga, lacin’iyo batimedy’oka ende ayali bokili solosolo. 27Ohonde Balunaba amotamba, ko aoya l’ende eneyali bikima, ko amasumola bokotua bonoki’nd’oenaka Nkolo ena mboka, ko l’okotua bonoki Endamene otendaka l’ende, ko l’okotua bonoki’nd’osekodyaka bosimo bon’olotsi ena lina lina Yesu nko la nkaso kum’ayali ena Damaseke. 28Koko Saula ayaaki l’iyo ena Yelusalema, ayatua ko ayafole, 29ko ayatende la nkaso ena lina lina Nkolo Yesu; aotenda la Ba-Elene, ko amaatsa ntango, koko iyo baofon’etelo lacina bao yake. 30Koko eneki bifili oeyaka yoi liho, baoya l’ende ena Kaisalia, ko bamotoma ena Taluseu.
31Nkwaho bikelesia bina Yudea ehatu, la bina Ngalilaya, la bina Samalia biyaaki la mwi, ko biokika nko nkika mene; ko baokenda en’ekumedyo ena Nkolo l’en’ecicimwedyo ena Bolimo bon’olotsi, ka baofula nko mpula.
32Ko eneki Petelo otianyaka benyanga behetu, aoya eneyali ban’oeka banatongaki ena Luda nkoho. 33Aosungya meho boto’omoi onotangama Ainea, onotuma ena ntange enande mbula mwambi, lacin’oka ayaaki la nkangi ena nkenyenyala. 34Petelo amosumola, ate, Ainea, Yesu Masiya akiikya; emala, oyotande ntange ene. Ko isasanga aemala. 35Ko iyatu banatongaki ena Luda l’ena Salona bameena, ko baohalingwa eneyali Nkolo.
36Koko bokil’omoi bon’oyoto ayaaki ena Yafo, lina linande nko Tabita (Tabita nk’eyoka Doluka); boyoto’oko aokama la bikambwa bin’olotsi la bin’isei biniki’nd’okambaka. 37Koko en’ina beho aambola nkangi, ko aowa; ko enek’iy’osongaka boduo, bamoambya en’etenyi ena liko. 38Luda eyaaki nk’ena mbolimboli la Yafo; ko eneki bakili ookak’oka Petelo ayali meho, bamotomela bato’afe, baineelela, atalingalingake liya eneyal’iyo. 39Petelo aemala, ko aocoa l’iyo. Ko eneki’nd’oyaka, bamoyedya en’etenyi ena liko; ko bayato bana beweli bahatu baemala mbolimboli kuma bayalele, ko bamotuma bekoto bena bekotua l’ekotua beneki Doluka otelaka kum’ayali l’iyo. 40Petelo amafodya iyatu, ko aun’aongo, ko aonda; ko aohelengwa eneyali boduo, ate, Tabita, etwa. Ko ende aolifola baiso’anande, ko enem’end’oena Petelo aetwa. 41Petelo amofa likasa linande, ko ameemadya; ko aelela ban’oeka la beweli, ko amolekya eneyal’iyo nko mbika. 42Ko yoi liho yeyana ena Yafo endotu, ko bato bike baimedya Nkolo. 43Ko Petelo aoyala bina bike ena Yafo eneka Simona, boaki bona bikoto.
Currently Selected:
Bikambwa Biniki Bikima 9: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
