Bikambwa Biniki Bikima 10
10
1Ko boto’omoi ayaaki ena Kaisalia, lina linande lika Kotunelio, capitaine ena boloi bona soldats bokama, boloi bonotangama bona Italia. 2Boto’one ayaaki bokumi bona Yakomba, ko aangaki Yakomba, ende l’omboi’onande bohotu. Akafelaki bato biinda nganji bike in’isei, ko aonda Yakomba bina l’ina. 3Yok’en’esike ena trois heures en’in’omoi, boto’one aena enelo, aena ekima ena Yakomba nko fololo kum’ayatua eneyal’ende, ko ameesa, ate, Kolunelio! 4Ende amolenda ta, ko aanga, ate, Yoi lika nia, Nkolo? Amosumola, ate, Beondo bene la nganji ine in’isei imilela eneyali Yakomba yoka liofwa line. 5Koko isanga tom’ato ena Yafo, baelele Simona, onotangama Petelo; 6akisase eneka Simona emoi, boaki bona bikoto, onoyali l’otumb’onande ena mbolimboli la lose l’okwa (ende angokosumola baoyi banakoli l’e lacina okambe). 7Koko eneki ekima onotendaki la Kolunelio oumaka, aelela basali’anande ban’otumba bafe, ko la soldat emoi, bokumi bona Yakomba, bon’iyo banosaelaki bina l’ina; 8amasumol’iyo baoyi’ane bahatu, ko amatoma ena Yafo. 9En’ina bona loi, kuma bato’ane bayakende, ko baolama l’onyanga, Petelo aanda ena liko lina nsamba en’otumba oyonda Yakomba, yok’en’esike ena midi. 10Ko aowa la njala, ko aolanga lacina ale toma; ko enem’iy’ofumbel’ende toma, aokwa yok’ena lilotua. 11Ko aena en’enelo nk’eyoka loola lomokombwa, ko bomongoci boyakite ena loko, yok’esenda ena nkolo mene enelitama l’ekoli ena batuku bah’anei. 12Nyama ihatu iniyali l’akaka banei la towawa tonetoyosumela ena loko la mpulu ina loola bayaaki meho. 13Ko lofoso lomei loya eneyali ende, ate, Emala, Petelo, yakaka, ko laka. 14Koko Petelo aamba, ate, Ef’oko, Nkolo; lacin’emi ntale iyema imoko in’etaketaka yombo ina nsefo. 15Ko lofoso loya eneyal’ende lakina, ate, Iyema iniki Yakomba osongaka, e tatangake iho mbindo. 16Ko yoi line yilama beila besaso; ko lakina bomongoci’oko botambama ena loola.
17Enema Petelo okakanda bike en’otem’onande la ncina en’enelo eneki’nd’oenaka, bato’aho banatomamaki la Kolunelio baufola botumba bona Simona, ko baemala en’ofolo. 18Ko baelela, ko baufola yombo Si mona, onotangama Petelo, ayali meho? 19Eneki Petelo okanelaka enelo eho, Bolimo amosumola, ate, Lenda, bato’asaso bakofona. 20Emala, kita ko coaka l’iyo, takandakandake, lacin’oka emamene njatomaki. 21Petelo aokita eneyali bato’aho, ko aila, ate, Lenda, emi nk’ende onafon’ino: ncina enay’ino eka nai? 22Iy’ate, Kolunelio, capitaine ena soldats, boto’ona mbongi la bokumi bona Yakomba, onoyali la lokumo lon’olotsi eneyali bato bahatu bana Ba-Yuda, aolakama l’ekima en’oeka ena Yakomba lacina akeelela en’otumb’onande, lacin’eho aoke baoyi eneyal’e. 23Amaelela en’otumba, ko amaokela lacina baetame meho.
Ko en’ina bona loi aemala, ko aocoa l’iyo, ko bifili bimoi bina Yafo baocoa nko l’ende. 24Koko en’ina bona loi lakina baofola Kaisalia. Kolunelio amakonga mela, eneki’nd’okadyaka lisusanya bais’ola’anande ko la bifili binande. 25Koko eneki Petelo otuaka, Kolunelio aukana l’ende, ko aokwa en’akak’anande, ko amoosamela. 26Koko Petelo ameemadya, ate, Emalaka; emi nkoho njali nk’oto kei. 27Ko aotua kum’ayesole l’ende, ko aosungedya bato bike basusanyi. 28Ko amasumola, ate, Inoamene bey’oka efakoli l’asangya lacina boto ona Ba-Yuda aambane l’oto on’onyang’okina, ko efakoli lacina ayi eneyal’ende; ohonde Yakomba amontum’oka efakoli l’emi lacina ntange boto’omoko boto’on’etaketaka, yomb’ona nsefo.
29Lacin’eho, eneki’m’oelelamaka njaki, ntaata ntango. Koko lakufola ncina enek’in’ombelelaka? 30Kolunelio aila, ate, Bina benei bemeta, nk’ena heure ene en’isaso, mbondaki en’otumb’onami, ko lenda, boto aemajaki en’oso’onami kum’ayalote bisenda bina kelikeli mene; 31ko aonsumola, ate, Kolunelio, boondo’one bomokana ko nganji ine in’isei imoyala yoka liofwa eneyali Yakomba; 32koko tom’ato ena Yafo oyelele Simona, onotangama Petelo; akisase en’otumba bona Simona, boaki bona bikoto, ena mbolimboli la lose l’okwa. 33Lacin’eho, lokotomelaka bato isasanga; ko omila bolotsi lacin’oka omoya. Isanga isatu toyali mendo en’oso bona Yakomba, lacin’eho tolofe baoyi bahatu banaki Yawe okosumolaka lacina otende. 34Nkwaho Petelo aomumol’onyua, ate,
Solosolo emi len’oka Yakomba afatambe boto la likai; 35ohonde en’onyanga l’onyanga boto onomoanga ko aokamb’ikambwa bina mbongi, aimedyama bolotsi l’Ende. 36Yoi linaliki’nd’otomelaka ban’ana Yisalaele, eneki’nd’oasumolaka bosimo bon’olotsi bona mwi la Yesu Masiya (Ende ayali Nkolo en’ato bahatu), 37inoamene beya yoi liko: nko yoi liho linalisekolaki ena Yudea endotu eneki liho omatsaka ena Ngalilaya en’oso, ena mbusa ena bosimo bon’inelo bonoki Yoane olakaka. 38Yoi liho nk’osimo bona Yesu ona Nazaleta, bokotua bonoki Yakomba oekyak’ende en’oeka la Bolimo bon’olotsi ko la mpamba mene; onoselaselaki kum’ayakambe bikambwa bin’olotsi, ko onikyaki bato bahatu banaki Satana otumanyaka, lacin’oka Yakomba ayaaki l’ende. 39Ko iso toyali temoins ina baoyi bahatu banaki’nd’okambaka, l’ena bonyanga bona Ba-Yuda ko l’ena Yelusalema; koko iyo baoyakaki, enek’iy’osengyaka en’ote. 40Yakomba ameetola en’ewedi nk’ende Yesu en’ina bon’esaso, ko amof’etelo oyenya, 41ef’eneyali bato bahatu, ohonde eneyali temoins iniki Yakomba osonaka en’oso, nk’eneyal’iso banalaki toma l’ende ko banamelaki l’ende ena mbusa en’eetwelo enande en’ewedi. 42Ende aototoma lacina tosekodya bosimo bon’olotsi eneyali bato, ko tosumol’ato fololo ende amosonama la Yakomba lacin’eho ayalame juge en’iyo banayaike ko l’eniyo banawaki. 43Basumoli bahatu bamotenda lacin’enande, iy’ate la lina linande boto l’oto onomimedya angotungwa ena baoyi’owe’anande.
44Nk’enema Petelo otenda baoyi’ane, Bolimo bon’olotsi aokwela bato bahatu banokaki yoi. 45Ko iyo ban’oloi bona nkesa ena yonge banimedyaki, iyo banayaki la Petelo, baofefa lacin’oka nganji ena Bolimo bon’olotsi eutelamaki eneyali Befenda nk’osamb’oho; 46lacin’oka bamaoka kuma bayatende la mposo ikina, ko bayakumya Yakomba. 47Nkwaho Petelo aila, ate, Basi basimbama nde, lacina bato’ane bafiname, bato banotambaka Bolimo bon’olotsi nk’eyok’onok’isoamene otambaka? 48Aila, ate bainamake en’asi ena lina lina Yesu Masiya. Ko bamoonda lacin’eho ayale l’iyo bina bemoi.
Currently Selected:
Bikambwa Biniki Bikima 10: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
