Bikambwa Biniki Bikima 8
8
1Ko Saula aimedya bewedi’enande. Nkwaho binyomeio mene bimatsaki en’in’oho eneyali ekelesia eneyaaki ena Yelusalema; ko bakili bahatu baofanda fanda en’enyanga bena Yudea la Samalia, umola nko bikima. 2Ko bato’amoi, bakumi bana Yakomba, baokunja Setefano, ko bamolela bike mene. 3Koko Saula aehya ekelesia nko mbehya mene; aotua en’etumba behetu, aokudya le mpame le bayato, ko amalekya ena botumba bon’enyolo.
4Yok’oho, iy’anafalangasanyi baoselasela bili l’ili, ko baosekodya bosimo bon’olotsi bona Yoi. 5Koko Filipo aokita en’ecimo emoi en’onyanga bona Samalia, ko amasumola bosimo bona Masiya. 6Ko bik’ike bon’ato baolofamela baoyi banaki Filipo otendaka nko la lokanyi lomoko, enek’iy’ookaka ko enek’iy’oenaka ndembi iniki’nd’okambaka. 7Lacin’oka bafoi bana nsefo baofola eneyali bato bike banayaaki la baho, baofola kuma bayalolua nko ndolua; ko bato bike banayaaki la nkangi ena nkenyenyala ko la bitumbe, baika. 8Ko enyanga eosokwa en’onyang’oho nko nsokwa.
9Koko boto’omoi ayaaki meho, lina linande lika Simona, onokambaki en’oso bikambwa bina liloka; ko aotatengya bato ban’onyanga bona Samalia, ko aoyofef’endamene boto’on’okolo. 10Ko iyatu bamolofamela, Mbo one ayali nko Mpamba eho ena Yakomba enetangama Bokolo. 11Bamolofamela nko lacin’eneki’nd’oatatengyaka elela mene la baoyi’anande bana liloka. 12Koko enek’iy’oimedyaka bosimo bon’olotsi bonoki Filipo oasumolaka bona lifoka lina Yakomba ko la lina lina Yesu Masiya, bainama en’asi, le mpame le bayato. 13Ko Simona mene aimedya nkoho, ko ainama; ko aoyala la Filipo, ko eneki’nd’oenaka ndembi ko la bikambwa bina mpefa binikambamaki, aofefa.
14Eneki bikima banayaaki ena Yelusalema ookak’oka baise Samalia bamotamba yoi lina Yakomba, bamatomela Petelo la Yoane. 15Koko enek’iy’okitaka, bamaondela, lacin’eho batambe Bolimo bon’olotsi. 16(Lacin’oka Ende atakwele omoko’oniyo: bainamaki nko njina kei ena lina lina Nkolo Yesu.) 17Nkwaho baotadya bakas’aniyo eneyal’iyo, ko baotamba Bolimo bon’olotsi. 18Koko eneki Simona oenak’oka Bolimo bon’olotsi aofama la ntadya en’akasa ban’ikima, amayela francs, 19ate, Ompe mpifo eho nkoho, lacina boto l’oto onongi’m’otadya bakasa atambe Bolimo bon’olotsi. 20Koko Petelo amosumola, ate, Francs ine iwake nko l’e! lacin’enek’okanelak’oka ongata nganji ena Yakomba nko la francs. 21Ofana likafo la liondo en’ekambwa ene tu, lacin’oka botem’one bofakolana en’oso bona Yakomba. 22Lacin’eho, oyosume en’owe’one’one, ko onda Yakomba, yombo ongikyama en’eango eho eneyali en’otem’one. 23Lacina emi len’oka oyali ena yombo lina bino ko l’ena bayaka bana bowe. 24Ko Simona aamba, ate, Bombondele Nkolo, lacina baoyi’ako banam’in’otendaka batongonkwel’emi.
25Koko iyo, enek’iy’olakak’ato lilako mene, ko baokumya Yoi lina Nkolo, bautwa la mbusa ena Yelusalema, ko baosekodya bosimo bon’olotsi en’enyanga bike bena Samalia.
26Koko ekima ena Nkolo aosumola Filipo, ate, Emala, coaka en’ili bona Sud, ena mboka enuma Yelusalema ko eocoa Nganja: bili’oho boyali nko sengelenge. 27Aemala, ko aocoa. Ko lenda, boto’omoi ona Etiopia, nko eunuko emoi onoyaaki la mpifo ena nkolo la Kandake, lifoka lin’oyoto lina Etiopia, botombanyi bona toma tonande tohatotu; ende ayaki ena Yelusalema lacin’eho akumya Yakomba; 28ko autwa la mbusa, ko aokisase en’etoelo enande, kum’ayaande bokanda bon’osumoli’oka Yesaya. 29Bolimo aosumola Filipo, ate, Coaka oyambane l’eteolo eho. 30Filipo aocoa la laango eneyal’ende, ko amooka kum’a yaande bokanda bon’osumoli’oka Yesaya; ko amufola, ate, Ononganya nde baoyi banand’e? 31Ate, Iya, nongeya bosamb’oya, yengoko boto’omoi andaka ncina en’aoyi’ane? Ko aelela Filipo, ailele, ko akisase l’ende. 32Etenyi en’okanda eneki’nd’oandaka eh’ene: ate,
Aotolama yoka mpate en’eyakelo;
Ko yoka bosamb’onoyali bon’ona mpate onoyali en’oso bona bokesi’onande bona besa, afatende,
Nk’osamb’oho ende atamumola nko le bonyua’onande.
33En’esonjelo enande baofimaki etendelo ena likambo;
Ko onongenyanya eotwelo enande oka nai?
Lacin’oka liiko lonande loumolama ena loko.
34Koko eunuko aufola Filipo, ate, Lakoonda, onsumole, bosumoli atenda yoi line lacin’ena boto oka nai? lacin’enandamene, yombo lacin’en’oto’okina? 35Koko Filipo aomumola bonyua bonande, aomatsa en’etengelo ene ena Yakomba, aosumol’ende bosimo bon’olotsi, nko bona Yesu. 36Nk’enem’iy’ocoa ena mboka, baena basi’amoi; ko eunuko aila, ate, Lenda, basi bayali: yoi lineyampeky’emi mpiname en’asi lika nai? 37(Filipo amosumola, ate, Nk’iimedya l’otem’one bohotu, ombinama. Aamba, ate, Limedy’oka Yesu Masiya ayali Bon’ona Yakomba.) 38Aemadya etoelo nkwaho; ko baopusola en’asi, le Filipo le eunuko, ko amiina en’asi. 39Ko enek’iy’otefwaka en’asi, Bolimo bona Nkolo aumola Filipo, ko eunuko ateena lakina, aocoa mboka enande nko l’enyanga. 40Ohonde Filipo aosungyama ena Azoto; ko enem’end’ofolanya aosekodya bosimo bon’olotsi en’enyanga behetu, yengoko aoyela ena Kaisalia.
Currently Selected:
Bikambwa Biniki Bikima 8: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
