Bikambwa Biniki Bikima 5
5
1Koko boto’omoi, lina linande lika Anania, ende l’ooli’onande oka Safila baotekya lisala; 2koko aofisa etenyi emoi ena francs, kuma booli’onande aeyaki yoi liho fololo, koko aoya l’etenyi ekina, ko aamby’eho en’akaka bana bikima. 3Koko Petelo aila, ate, Anania, Satana amolunda botem’one lacina ofote Bolimo bon’olotsi, ko ofise etenyi ena francs, lacina nai? 4Kuma lisala liho liyali l’e, litayala nde lineamene? Ko enek’otekyaka liho, litacikala nde nk’ena lifoka lineamene? Oangaki eango ene en’otem’one lacina nai? Otafot’ato: omofota nko Yakomba. 5Eneki Anania ookaka baoyi’ane, aokwa ena loko, ko aowa nko tu. Ko losomo mene lokwela bato bahatu banokaki yoi liho. 6Ko befenga baemala, ko bamofuta l’esenda, bamofodya, ko bamokunja.
7Koko eneki bina oetaka yoka ikina heures isaso, booli’onande aotua, kuma ateya yoi linilamaki. 8Ko Petelo amufola, ate, Onsumole, yombo otekyaki lisala l’otuy’one? Aamba, ate, O, nk’otuy’oko. 9Koko Petelo amokutwela, ate, In’afe bomolambana lacina bomeke Bolimo bona Nkolo lacina nai? Lenda, bakak’aniyo banokunjaka bome’one bayali nk’en’ofolo, ko bangokotol’e en’anza. 10Ko aokwa en’akaka bana Petelo nkwaho, ko aowa nko tu; ko eneki befenga otuaka, bamosungy’oka amosila liwa; ko bamofodya, ko bamokunja mbolimboli l’ome’onande. 11Ko losomo mene lokwela ekelesia ehatu, ko l’ato bahatu banokaki baoyi’ane.
12Ko bike bona ndembi la bikambwa bina mpefa bilama eneyali bato l’akasa ban’ikima; ko iyatu bayaaki la lokanyi lomoko ena mbalasai ena Solomona. 13Efan’omoko ona bato’akina onosokolanga aambane l’iyo; ohonde bato mene bamakumya; 14ohonde banimedya baambanaki la Nkolo, nko bik’ike bona mpame l’on’ayato; 15baofodya nko le banawa nkangi ena mboka, ko bamaetsa ena ntange l’ena totunda, lacin’eho eneta Petelo omok’omoko’oniyo afomwa lilila linande. 16Ko bik’ike bon’ato ban’enyanga benoli la Yelusalema baoya; baoya l’ato banawa nkangi, ko l’iyo banenaki bino l’afoi bana nsefo; ko baika nk’iyatu.
17Koko nkanga iyome aemala, l’ende l’iy’anayaaki l’ende—nko boloi bona Basadokeko baolola l’ekuku, 18baunda bikima, ko bamaekela en’otumba bon’enyolo. 19Koko ekima ena Nkolo aokombola nkombo ina botumba bon’enyolo l’oco, ko eneki’nd’oafodyaka, aila, ate, 20Bocoaka, boyemale en’otumba bona Yakomba, boyosumole bato baoyi bahatu bana Eikedyo ene. 21Ko enek’iy’ookaka yoi liho, baotua en’otumba bona Yakomba l’ikulukulu mene, ko baolak’ato. Koko nkanga iyome aoya, l’iy’anayaaki l’ende, ko baosusanya likita lina bingambe ko la boloi bona balimo bana ban’ana Yisalaele, ko baotom’onyua en’otumba bon’enyolo lacina bayi l’iyo. 22Koko eneki police oyelaka en’otumba bon’enyolo, batasungedya; ko bautwa la mbusa, 23iy’ate, Tosungyaki botumba bon’enyolo bokombi bolotsi, ko batombanyi baemali ena befolo; koko enek’is’okombolaka nkombo, totasungy’oto. 24Eneki capitaine en’otumba bona Yakomba la nkanga iyome ookaka baoyi’ane, baokandakanda bike lacin’ena baho, Mbo yoi line lingoyela nde meya? 25Nkwaho amoi aoya, amasumola, ate, Lenda, bato’aho banak’in’oekelaka en’otumba bon’enyolo baemali en’otumba bona Yakomba, bayalake bato. 26Koko capitaine aocoa la police, ko aoya l’iyo, ohonde efana la locili, lacin’oka baangaki bato, bato batongofusel’iyo baufe. 27Ko enek’iy’oyaka l’iyo, bamaemadya ena ntoto ena likita lina bingambe. Ko nkanga iyome amaufola, ate, 28Iso totakosumola nd’ino botalakake lakina ena lina line? koko lenda, bomolodya Yelusalema la lilako linino, ko bolang’oka botokoiy’iso likambo lin’ewedi ben’oto’one. 29Koko Petelo la bikima baamba, iy’ate, Akoli eneyal’iso timedya Yakomba, efa bato. 30Yakomba ena bafango’aniso aetolaki Yesu en’ewedi, nk’ende onok’in’oyakaka, enek’in’oakak’ende en’ote. 31Koko Yakomba amiledy’ende en’ili bona likasa linande y’ome, lacina ayalame Lifoka mene la Boiki, ko lacina ayofa Yisalaele eumbelo en’aoyi’owe ko l’etungwelo en’aoyi’owe. 32Ko iso toyali temoins inande ina baoyi’ane, iso la Bolimo bon’olotsi onoki Yakomba ofak’iyatu banomimedya.
33Koko enek’iy’ookaka baoyi’ane, baosungwa la nkele bike, ko baang’eango lacina baayake. 34Koko Bofalusi’omoi, lina linande lika Ngamaliele, bolaki’ona basangya, onoki bato bahatu okumyaka, aemala ena likita, ko aila ate bikima bafodyamake isisali. 35Ko aosumola likita, ate, Ino bato bana Yisalaele, kuma botakambe yoi, boongya likanela bokotua bonong’in’okamba l’ato’ane. 36Lacina en’oso’ale Teuda aemalaki, ko ayokumyaki’oka ande boto’on’okolo, ko bike bona mpame yoka bekam’enei baambanaki’ale l’ende; endamene ayakamaki, ko iyatu banofikaki baofalangasana, ko ekambwa eniyo esilaki. 37Ko ena mbus’eho, boto’omoi oka Yuda aemalaki en’esike en’etengelo ena baina, ko asumaki bato bike eneyal’ende; koko ende awaki nkoho, ko iyatu banofikaki baofalangasana. 38Koko isanga lakosumol’ino, emite, Bocika bato’ane, ko botilelak’iyo yoi, lacin’oka yombo eango ene l’ekambwa ene eyali en’ato, engeha nko tu; 39ohonde yombo eho eyali nk’ena Yakomba, ino bofinyaki yehyi sa eho tu, botongoyenya yoka bato banafomana la Yakomba. 40Ko baimedya yoi linande; ko enek’iy’oelelaka bikima, bamafoma mpomi, ko bamasimba, batatendake ena lina lina Yesu, ko bamatungola. 41Koko iyo bauma ena likita lina bingambe kuma bayanyangele, lacin’oka baandamaki yoka bato banakoli oyena bino bina nsoi lacin’ena lina lina Yesu. 42Bina l’ina bataambya lilaka bato ko bataambya lisekodya bosimo bona Yesu Masiya en’otumba bona Yakomba ko l’en’etumba.
Currently Selected:
Bikambwa Biniki Bikima 5: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
