Bikambwa Biniki Bikima 4
4
1Nk’enem’iy’otenda l’ato, nkanga ina Yakomba la capitaine en’otumba bona Yakomba la Basadoke baoy’eneyal’iyo; 2ko baolemwa lacin’oka bayalake bato ko bail’oka la Yesu eetwelo en’ato en’ewedi eyali. 3Bamaunda, ko bamaekela en’otumba bon’enyolo yengoko bina bona loi, lacina eyaaki yok’esike ena likolo. 4Koko bike’oniyo banokaki yoi bimedyaki; ko botuya bona mpame boyalama yoka nkoto itano.
5Koko en’ina bona loi, bato’aniyo ban’afoka, la bingambe, la batengi ban’ekanda, baosolongana ena Yelusalema; 6ko Anasa nkanga en’iyome mene ayaaki meho, la Kayafa, la Yoane, la Alesandulo, l’omboi bohotu bona nkanga iyome. 7Enek’iy’oemadyaka bikima ena ntoto eniyo, bamaufola, iy’ate, Ino bilaki yoi line la locili lona nai, l’ena lina lika nai? 8Nkwaho Petelo aolola la Bolimo bon’olotsi, ko amalokwela, ate, Ino bafoka ban’ato la bingambe bina Yisalaele, 9yomb’iso tufolama bon’in’one lacin’ena yoi liney’olotsi linilamaki eneyali boto’on’etumbe, lacin’eho ino beye onomoikyaka: 10inatu beyaka, l’ino la Ba-Yisalaele bahatu, ena lina lina Yesu Masiya ona Nazaleta, onok’in’oyakaka en’ekulusu, ko onoki Yakomba oetolaka en’ewedi, nko l’ende boto’one aemali mendo en’oso’onino kum’ayaike. 11Yesu one ayali nko lufe linalik’ino bafaki okilaka, limoyalama lin’oso mene lina likoka. 12Ko efana liiko eneyali okina tu, lacin’oka en’ase’a loola efana lina likina limofam’ato linalitiikyisa tu.
13Enek’iy’oenaka nkaso ena Petelo la Yoane, ko enek’iy’oeyak’oka bayaaki nko bato banatalakama la bomwu bona loko, baofefa; ko bamaey’oka bayaaki la Yesu. 14Koko enek’iy’oenak’oto onikaki ayemale la bikima, bataat’etendelo lakina lacin’ena yoi liho. 15Koko bamafodya ena likita isisali, lacin’eho batendane ena lokuko. 16Ko baufolana, iy’ate, Tongilela bato’ane nai? lacin’oka ekambwa en’ofilo ena lokumo emilama l’iyo, ko emeyana eneyali bato bahatu banatonga ena Yelusalema, ko tofan’eanganelo ena yoi liho tu. 17Ohonde lacina yoi liho litongoyela en’osana eneyali bato’amoi, tongaan’iyo biano, batatendake lakina l’oto’omoko ena lina line. 18Ko bamaelela, ko bamasumola nko la locili mene, batatendake ko batalakake ena lina lina Yesu tutu. 19Koko Petelo la Yoane bamakutwela, iy’ate, Inoamene bokodyaka, yombo yoi likoli l’iso en’aiso bana Yakomba lacina tokolof’ino, yombo tolofa Yakomba; 20lacin’iso tofana mboka emoi yengoko nsumol’ato baoyi banak’is’oenaka l’anak’is’ookaka. 21Ko enek’iy’oaanaka lakina eano, bamatungola, eneten’iyo etelo oyasisodya, lacin’ena bato; lacin’oka bato bahatu baokumya Yakomba lacin’en’ekambwa enilamaki. 22Lacina boto’oho onoki ndembi ene oilamaka ayaaki la mbula inileki ntuk’inei.
23Enek’iy’otungwaka, baocoa eneyali bato’aniyoamene, bamasumola baoyi bahatu banaki nkanga ina toome la bingambe oasumolaka. 24Ko enek’iy’ookaka baoyi’aho, bailedya lofoso loniyo la lokanyi Jomoko eneyali Yakomba, iy’ate, Yawe, e oyali Yakomba ononunolaki loola la loko la lose l’okwa, ko l’ikambwa bihitu biniyali ena baho, 25E otendaki’ale la Bolimo bon’olotsi nko l’onyua bona bafango’oniso oka Dawidi, bosali’one, ate,
Bato ban’efenda bamolemwa,
Ko bato bamokanela baoyi bana bototoloto, lacina nai?
26Bafoka bana loko bamemala,
Ko bato bana lifoka bamosolongana
Oyokana la Yawe ko la Masiya enande, oyasimba.
27Solosolo mene Elode la Pontio Pilato, la Befenda la bato bana Yisalaele, basusanaki lacin’eho basimbe Bon’one on’oeka, 28lacin’eho baile baoyi l’aoyi banaki likasa line la eango ene oangak’oso lacina bailame. 29Isanga, Yawe, lenda biano biniyo, ko faka baombo’ane etelo lacina batende yoi line efan’ofolu, 30enaciedy’e likasa line oyiky’ato ena nkangi, ko lacina okambe ndembi la bikambwa bina mpefa nko la lina lina Bon’one on’oeka oka Yesu. 31Enek’iy’oondaka, etenyi enek’iy’osusanaka eolidyama; ko iyatu baolodyama la Bolimo bon’olotsi, ko baotenda baoyi bana Yakomba nko la nkaso.
32Ko bato’aho bik’ike banimedyaki bayaaki l’otema nk’omoko ko la lokanyi nko lomoko; ko efan’oto onilaki’oka iyema imoi iney’at’ende iyali nk’inandamene: baosanganya toma toniyo tohatotu. 33Ko bikima baosekody’osimo bon’eetwelo ena Nkolo Yesu en’ewedi nko la locili mene; ko boseisei bon’okolo boyaaki eneyal’iyatu. 34Bataata nko le boto’omoko onindaki biinda, lacin’oka bamene basala la betumba baotekya baho, ko baoya la francs ina toma tonatok’iy’otekyaka, 35ko baamby’iho ena bakaka bana bikima; ko iyo baokafa francs iho eneyali boto’l’oto, yoka bosambo’onoki’nd’oelingitanaka.
36Koko Yosefa, onoki bikima ofaka lina lika Balunaba, (nko Bon’ona Ncicimodya), on’ecimo ena Lewi, bise Kupulio, 37ayaaki la lisala, ko aotekya liho, ko aoya la francs ko aamby’iho en’akaka bana bikima.
Currently Selected:
Bikambwa Biniki Bikima 4: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
