Bikambwa Biniki Bikima 21
21
1Koko enek’is’oumaka eneyal’iyo, ko tosemwa, teta nko cilili, ko toyela Kosa, ko en’ina bona loi toyela Lode, koko enek’is’oumaka meho toyela Patala. 2Ko enek’is’osungyaka basua banasokoleka ena Poinike, toyookela, ko tosemwa. 3Koko enek’is’oenaka Kupulio, ko tocik’eho ena likasa y’ooli, tocoa Sulia, ko tosema ena Tula; lacin’oka baotefola toma tonatoyaaki en’asua nko meho. 4Ko enek’is’osungyaka bakili, toyala meho bekolo nsambo; ko bane baosumola Paulo la Bolimo, atacoake ena Yelusalema. 5Koko eneki bekolo beho okokaka, tuma meho, ko tokila bokit’oniso; ko iyatu, l’aali l’ana, baotocindedya yengoko kuma tofola ena mbiolo en’onyanga; ko tun’aongo en’oseleka bona lose l’okwa ko toonda. 6Ko tosesana; koko iso toyookela en’asua, koko iyo bautw’ola.
7Tosimbyaki bokit’oniso enek’is’ocikaka Tula ko toyela Petolemai. Meho tesa befili, ko toyala l’iyo bin’omoko. 8Ko en’ina bona loi tocoa, ko toyela Kaisalia. Totua en’otumba bona Filipo, bosumoli bon’osimo bon’olotsi, omoi ona baho nsambo, ko tokisase l’ende. 9Ende ayaaki l’ana ban’ayato banei banatasongana la mpame, banayaaki basumoli bana baoyi. 10Ko enek’is’okindaka meho bekolo bemoi bike, bosumoli’ompi onotangama Agabo, aoya ena Yudea. 11Ende aoya eneyal’iso, aotamba bokoli bona Paulo, aokakela bakasa ko l’akak’anandamene, ko aila, ate, Bolimo bon’olotsi atenda baoyi’ane, ate Ba-Yuda banayali ena Yelusalema bangokakela bomene bokoli’one yok’osamb’one, ko bangoleky’ende en’akasa bana Befenda. 12Enek’is’ookaka baoyi’ane, iso l’akili ban’onyang’oho tomoonda, atacoake ena Yelusalema. 13Koko Paulo aokutola, ate, Ino boyalele ko bolembya botem’onami lacina nai? Lacin’emi mokolana, efa lacina ntungame kei, ohonde lacina mbwu ena Yelusalema lacin’ena lina Nkolo Yesu. 14Ko enetimedy’ende boondo’oniso, tocika, is’ate, Eango ena Nkolo eilamake.
15Eneki bina bene okalaka, tosonga toma toniso, ko tocoa Yelusalema. 16Ko bakili’amoi bana Kaisalia baocoa l’iso, ko baotola Menesona ona Kupulio l’iyo, ende bokili on’alale, ko tokisase en’otumb’onande.
17Ko enek’is’oyelaka Yelusalema, bifili baotosangela l’enyanga mene. 18Koko en’ina bona loi Paulo aotua l’iso eneyali Yakobo, ko bingambe bihitu baoya nkoho. 19Ko eneki’nd’oaesaka, amalokwela bikambwa, emok’emoko, biniki Yakomba okambaka eneyali Befenda l’ekambelo enande. 20Ko iyo enek’iy’ookaka, baokumya Yakomba. Ko bamosumola, iy’ate, Efili, oen’oka bik’ike mene bona Ba-Yuda bamimedya, ko iyatu bayali la mposa mene en’asangya; 21ko bamoka yoi iy’ate e olaka Ba-Yuda bahatu banayali en’enyanga bena Befenda lacina baumbele beeka bena Mose, enil’e ate batakesake baonge bana ban’aniyo, ko batakambake l’ekotua beneki bafango okambaka. 22Tongil’oya? Lacin’iyo bangok’oka omoya, ko bangosolongana. 23Ekoli lacina oile yoi line linakosumol’iso: toyali mendo l’ato’anei banatehaki lisangya; 24oatambe, ko oyosong’eamene l’iyo l’esongelo ena basangya, ko eamene oafutele lacin’eho bakoole bete’eniyo; ko bato bahatu bangey’oka baoyi banak’iy’ookaka lacin’ene bafayali solosolo; ohonde bangey’oka eamene oyakende l’okotua bonakolana, ko omonya basangya. 25Koko ena likambo lina Befenda banimedya, tomolatomela yoi linik’is’okodyaka lacina bakile nyama inilekyamaki eneyali baidola, ko l’akila, ko la nyama iniyakama la nkoma; ko bakile ntata ena likele. 26Nkwaho Paulo aotamba bato’aho, ko en’ina bona loi aoyosong’endamene ko l’iyo l’esongelo ena basangya; baotua en’otumba bona Yakomba, aeyanya esimbelo ena bina ben’esongelo, ko aoyala meho yengoko kuma mbeka eolekyama lacin’en’iyatu.
27Ko eneki bina beho nsambo oolamaka lisila, Ba-Yuda bana Asia, enek’iy’oenak’ende en’otumba bona Yakomba, baosombanya bato bik’ike lacin’enande, ko bamuunda l’akasa, 28baololua, iy’ate, Bato bana Yisalaele, botokambya! One nk’ende onolaka bato bahatu en’enyanga behetu lacina baoke bato bana Ba-Yuda bowe, la basangya, ko l’edye ene en’oeka. Ko amoya la Ba-Elene en’otumba bona Yakomba nkoho, ko amolehya edye ene en’oeka. 29Lacin’oka baenaki en’oso Tulofimo, bise Efeso, kum’ayakende l’ende en’onyanga; ko baokanel’oka Paulo amoya l’ende en’otumba bona Yakomba. 30Ko bonyanga bohotu bolidyama, ko bato baocoa la mbango en’ili’omoko; baunda Paulo, ko bamosuma ena mbiolo en’otumba bona Yakomba; ko nkwaho nkombo yokombama. 31Ko enek’iy’omekaka lacina baoyake, bato’amoi baosumola commandant ena soldats, iy’ate Yelusalema ehatu eolidyama. 32Ko isasanga ende aotamba soldats la capitaines, koko aocoa la laango eneyal’iyo; ko enek’iy’oenaka commandant la soldats, baedya lifoma Paulo. 33Nkwaho commandant aolama, ko amuunda, ko aila ate akakelamake l’enyolo befe; ko aufola lina linande, ko la yoi linaliki’nd’okambaka. 34Bamoi ban’ato’aho bik’ike baololua yoi limoko, ko bamoi yoi likina; ko enetanongany’ende ncina bolotsi’olotsi lacin’en’etomoko, aila ate bayake l’ende ena litonga lina soldats. 35Enek’iy’oyelaka en’eandelo, aotolama la soldats lacin’ena bolema bon’ato’aho bik’ike; 36lacina bato bik’ike baokilana l’iyo, kuma bayalolua, iy’ate, Bumol’ende!
37Ko enek’iy’oolamaka yookela Paulo ena litonga lina soldats, ende aosumola commandant, ate, Nkosumolake yoi? Ende ate, Oeya nde lofoso lona Ba-Elene? 38E ofayali nde boto’oho ona Ejipeto onosusanyaki’ale bato en’ita, ko atolaki mpame nkoto inei ena sengelenge, nko bayaki ban’ato? 39Koko Paulo aila, ate, Emi nko bise Yuda, bise Taluseu ena Kilikia, bise bonyanga bonofinde lokumo; lakoonda ompe etelo ntende la bato. 40Ko eneki’nd’ofak’etelo, Paulo aemala en’eandelo, ko aelel’ato la likasa; ko enek’iy’oyalamaka mwi, amalokwela ena lofoso lona Ba-Ebele.
Currently Selected:
Bikambwa Biniki Bikima 21: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
