Bikambwa Biniki Bikima 20
20
1Eneki etomoko okalaka, Paulo aelela bakili, amakikya la boseso, ko auma, aocoa Makedonia. 2Ko eneki’nd’otianyaka benyang’eho, amakikya l’aoyi bike, ko aoya ena Elene. 3Aoyala meho nsenza isaso; koko eneki’nd’osokosemwa lacin’eho acu Sulia, Ba-Yuda bamoangela eango en’owe, ko ende aoyalama la lisangya lacina autwa la mboka ena Makedonia. 4Bamoi bamocindedya ena Asia, nko Sopatulo ona Beloya, bon’ona Pulo, ko l’amoi bana Tesalonike, noka Alisita luko la Sekundo, ko la Ngayo ona Delube, la Timoteo, ko l’amoi bana Asia, nko Tukiko la Tulofimo. 5Bane baocoa en’oso, koko baotoonda ena Tuloa. 6Iso tosemwa ena Filipoi ena mbusa en’ina bena mampa enefana nyango, ko tomasungy’iyo ena Tuloa en’ina bon’etano; ko toyala meho bekolo nsambo.
7En’ina bon’oso bon’eyenga, enek’is’osolonganaka ena Mesa ena Nkolo, Paulo amalaka, eneki’nd’oilak’oka acu loi; ko aokusa lilaka ndaka yengoko esike ena kelekele en’oco mene. 8Ko mwinda iyaaki bike en’etenyi ena liko en’otumba enek’is’osolonganaka. 9Ko bofeng’omoi onotangama Eutuko aokisase en’ofolo bona fenêtre, ko aowa l’ilo mene; ko eneki Paulo ofudyaka lilako botale mene, bofeng’oho aonyonga l’ilo, ko aokwa liko en’etenyi eho en’isaso ena liko, ko bamoambola kum’aosilwa. 10Ohonde Paulo aokita, amokwela, amohama njohama, ate, Botatomake etomoko, liiko lonande loyali eneyal’ende. 11Ko eneki’nd’oilelaka lakina, aokesa mampa, ko aola, ko aokinda litenda l’iyo elela lakina, yengoko kuma bina bokya, ko aocoa. 12Baoya l’ofenga kum’ayaike, ko baocicima bike en’etema.
13Koko iso tocoaki en’asua en’oso, tosemwa ko tocoa Aso, lacin’eho tookela Paulo en’asua meho; lacin’oka endamene akodyaki yok’osamb’oho, eneki’nd’oyalamaka la lisangya lacina acu la mboka en’okili. 14Eneki’nd’oukanaka l’iso ena Aso, tomookela, ko toyela Mitulene. 15Tosemwa meho, ko en’ina bona loi toya mbolimboli la Kio; ko en’ina bon’efe tosema ena Samo; toyalaki isalisali ena Tulogulio, ko en’ina bona mbusa toyela Mileto. 16Paulo ayaaki la lisangya lacina alekanya Efeso, enetalang’ende lacina akinde elela ena Asia; lacin’ende aocoa la mbango mbango, lacina yombo akolana, ayele Yelusalema en’ina bon’elambedya ena Ntuk’itano.
17Koko ena Mileto aotom’onyua ena Efeso, ko aelela bingambe bina ekelesia. 18Enek’iy’oyaka eneyal’ende, amalokwela, ate.
Inoamene beya, nk’en’ina bon’oso bonoki’m’oyelaka ena Asia, bokotu’onami bonoki’m’oyalaka l’ino bisike bihitu, 19bokotua bonoki’m’osaelaka Nkolo la njofima mene, ko la mposoli bike, ko la mmeko ineyonkwelaki la biango bina Ba-Yuda. 20Ko bey’oka ntafisa yoi limoko linakolana l’ino, mokolak’ino l’en’esolongano l’en’etumba l’etumba, 21mosumola le Ba-Yuda le Ba Elene likambo lin’ehalingwelo eneyali Yakomba, ko l’imeedyo eneyali Nkolo eniso Yesu Masiya. 22Isanga, lenda, locoa nko ntungama en’olimo ena Yelusalema, ko mpeye baoyi banangonkwela meho, 23yoi limoko liney’emi: Bolimo’on’olotsi aonsumola en’enyanga behetu, ate benyolo la bino bankongamela. 24Ohonde mpakeswa botema lacin’ena liiko lonamamene, yok’iyema inakanelama bike, ohonde lalanga lacina nkadya bokit’onami l’ekiko, l’ekambwa eneki’m’ofamaka la Nkolo Yesu, lacina nsumole bato bosimo bon’olotsi bon’isei ina Yakomba. 25Koko lenda, emi ley’oka inatu bofetiaki elongi enami lalcina, em’onoselaselaki eneyal’ino ko nsekodyaki bosimo bona Lifoka. 26Lacin’eho, lakosumol’inatu fololo bon’in’one, emi mpoli ena likambo lin’akila ban’oto’omoko’onino, 27lacin’oka mokosumol’ino eango ena Yakomba ehatu, ntafisa baoyi tu lacin’en’ofolu. 28Boyotombanyak’inoamene ko l’otonga bohotu, bonoki Bolimo bon’olotsi okiilak’ino batombanyi, lacin’eho boolole ekelesia ena Yakomba, eneki’nd’osombaka l’akil’anandamene. 29Lacin’oka emi leya yoi line, ena mbusa en’ecwelo enami nkoi inay’olema ingotua eneyal’ino, ko ifikyaki botonga; 30ko bato bangemala eneyal’inoamene, ko bangotenda baoyi bana ntatengya, basume bakili eneyal’iyoamene. 31Lacin’eho, botombanyaka; ko bofwaka mbula ih’isaso initaamby’emi lilaka bato bahatu l’ane l’oco nko la mposoli mene. 32Isanga lakoleky’ino eneyali Yakomba l’eneyali yoi lin’isei inande, yoi linakolana okokiky’ino, ko linakof’ino lisango eneyal’iyatu ban’oeka. 33Emi ntoka mposa ena wolo la francs la bisenda bina boto’omoko; 34ko inoamene beya bokotua bonoki bakas’ane ombatelak’emamene toma tonatoki emamene l’iyo banayaaki l’emi oindaka. 35La baoyi bahatu mokotum’oka akoli eneyal’ino lacina bokambya bato bana tongitongi la ekambelo en’ekambwa, ko bofwa baoyi banaki Nkolo Yesu mene otendaka, ate, Mpaka eleki ntamba l’ekiko.
36Eneki’nd’okadyaka litenda baoyi’ane, aun’aongo, ko aonda l’iyatu. 37Ko iyatu baolela la mposoli, ko baokwela Paulo nkingo, ko bamoleya belumba, 38ko lokeseli loniyo losokwa nsokwa lacin’ena yoi linaliki’nd’otendak’oka bafenaki elongi enande lakina. Ko bamocindedya en’asua.
Currently Selected:
Bikambwa Biniki Bikima 20: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
