Bikambwa Biniki Bikima 19
19
1Kuma Apolo ayali ena Kolinto, Paulo aokadya litianya benyanga bena liko, aoya ena Efeso, ko aosungya bakili’amoi meho. 2Amaufola, ate, Enek’in’oimedyaka, botambaki Bolimo bon’olotsi? Iyo, Mbo efana, totok’oka Bolimo’on’olotsi ayali. 3Amaufola, ate, Binamaki l’inelo ena nai? Iy’ate, L’inelo ena Yoane. 4Ko Paulo ate, Solosolo, Yoane ainaki l’inelo ena njumbela ena baoyi’owe, ko aosumol’ato ate baimedyake ende onoya ena mbusa enande, nko Yesu. 5Enek’iy’ookaka yok’osamb’oho, bainama ena lina lina Nkolo Yesu. 6Ko eneki Paulo otadyaka bakas’anande eneyal’iyo, Bolimo bon’olotsi amakwela, ko baotenda la mposo imoi, ko baotend’aoyi batutuma. 7Iyatu bayaaki yoka bato jo l’afe.
8Ko Paulo aotua ena sunagoga, ko aosumol’ato bosimo nsenza isaso, efan’ofolu, amalaka ko amakengola en’aoyi bana lifoka lina Yakomba. 9Koko eneki bamoi ocilingitanaka en’etema, ko baopoka lopoko, ko baotanga Mbok’eho lotango lon owe en’oso bon’ato bik’ike, auma eneyal’iyo, aumola bakili, ko aolaka lilako bina l’ina en’otumba bona Ecole ena Tulane. 10Aila yok’osamb’oho mbula ife, ko bato bahatu banatongaki ena Asia, le Ba-Yuda le Ba-Elene, baoka yoi lina Nkolo. 11Ko Yakomba aokamb’ikambwa bina mpefa bin’okolo l’akasa bana Paulo; 12baotoela bato banawa nkangi totambala ko l’isenda biniki Paulo osukaka, ko nkangi iuma eneyal’iyo, ko bafoi ban’owe baofola. 13Koko nkanga ina mpoci ina Ba-Yuda banaselasela bili l’ili baomeka lacina baande lina lina Nkolo Yesu eneyal’iyo banayaaki la bafoi ban’owe, iyo Mbo, lakotom’e ena lina lina Yesu onasekodya Paulo bosimo’onande! 14Ko bana bana mpame nsambo bana Sekewa, bise Yuda, nko nkanga iyome, baila yok’osamb’oho. 15Ko lifoi lin’owe aokutola, ate, Leya Yesu, ko leya Paulo; nde ino boyali nai? 16Ko boto onoyaaki la lifoi lin’owe aosola bondembi eneyal’iyo, amaumba, amaikamela, ko baolota botumb’oho nko bolumbulumbu ko la mpota. 17Ko yoi liho yeyana eneyali bato bahatu banatonga ena Efeso, le Ba-Yuda le Ba-Elene; ko losomo lomakwela nk’iyatu, ko lina lina Nkolo Yesu yokumyama. 18Ko bike’oniyo banimedyaki baoya, baofisola bikambwa biniyo, ko baosumol’ato biho. 19Ko bamoi bike banakambaki baoyi ban’akunda, baosusanya bekand’eniyo, ko baotumba biho en’oso bon’ato bahatu. Ko baala botuya bona beho, ko baosungya boho yoka francs nkese itano. 20Yok’oho yoi lina Nkolo yosokwa nsokwa ko yoyalama la locili.
21Ko eneki baoyi’ane okalaka, Paulo aoyalama la lisangya en’olimo lacin’eho atianya Makedonia la Akaya ko acu Yelusalema; ko aila, ate, Ena mbusa en’okit’onami meho, akoli eneyal’emi lacina njene Loma nkoho. 22Eneki’nd’otomaka bafe’aniyo banokambyaki, nko Timoteo la Elaseto, bacu ena Makedonia, endamene aocikala isalisali ena Asia.
23En’esik’eho etomoko ena nkolo mene eopusola lacin’ena Mbok’eho. 24Lacina boto’omoi ayaaki meho, botuli bona argent, lina linande lika Demetulio, onotulaki baidola bana argent bana Diana, onatelaki betuli’emoi nkita bike l’osal’oho.
25Ende aosolonganya iyatu banakamb’ikambwa l’argent, ende Mbo, ino bey’oka iso toata lituka liniso nko l’osal’one. 26Ko ino bena ko boka, efa mendo ena Efeso kei, nde ena Asia endotu, Paulo one aolak’ato, ko aokofodya bato bike, enil’ende, ate, Yakomba ineyakambame l’akasa ifayali yakomba mene. 27Ko efa lacin’oka ekambwa ene eniso eolama liehyama; nde ilombe ina mesa ena mbeka ina yakomba ena nkolo en’oyoto eka Diana yosonjama nkoho, ko lokumo lonandamene losokoehyama nk’osamb’oho, ende onakumya baise Asia bahatu la bato bana loko lohalotu. 28Enek’iy’ookaka yoi liho, baolola la nkele, baololua, Mbo Diana ona Ba-Efeso aleki lokumo! 29Ko bonyanga bohotu boyalama fundafunda la loyenge mene; ko bato baocoa la laango la lokanyi lomoko en’edye ena Tokenya; ko enem’iy’ocu ena mboka baunda Ngayo la Alisitaluko, baise Makedonia banambanaki la Paulo en’okita. 30Koko eneki Paulo olangaka lacina acu eneyali bato, bakili bati medya. 31Ko bamoi bana-lifoka bana Asia banakendaki efili la Paulo bamotomela yoi, bamoonda atatuake en’edye ena Tokenya. 32Ban’amoi baololua yoi limoko, ko bakina yoi likina; lacin’oka bosolongano boyala nko loyenge mene, ko banaleki bike nk’iy’anatanonganya ncina enek’iy’osolonganaka. 33Koko bato bike baofodya Alesandulo, onoki Ba-Yuda osengenyaka; ko Alesandulo aomeka oyasimbya la likasa, lacin’eho alokwela bato boloko. 34Koko enek’iy’oeyak’oka ayali nko bise Yuda, iyatu baololua la lofoso lomoko yoka heures ife, Mbo Diana ona Ba-Efeso aleki lokumo. 35Koko botengi bon’onyanga aofekya bato’aho bik’ike, ate, Ino bato bana Efeso, boto onofey’oka bonyanga bona Efeso boyali botombanyi bon’ilombe ina mesa ena mbeka ina yakomba ena nkolo eka Diana, l’on’efoya enekwaki ena Zeu, ayali meya? 36Iya, enefaatama baoyi’ane ntango, akoli eneyal’ino lacina boyalame nko mwi, ko bofakambe yoi la yengeyenge. 37Koko bomoya mendo l’ato’ane banafayali baiya bana mesa ena mbeka la basayi bana yakomba eniso en’oyoto. 38Lacin’eho, yombo Demetulio la betuli beneyali l’ende bayali la yoi litutuma, bitendelo bin’akambo biyali, ko batenji bayali: baakolane l’okotua bonakolana. 39Koko yombo bokemba yoi lina bakambo’akina, ekoli lacina liho likadyame ena likita linalikoli. 40Lacin’oka bon’in’one tosokoakolama likambo lina etomoko enefana ncina ntutuma, ko tofinyaki lisakitola ncina eneki bato’ane bik’ike osolonganaka. 41Eneki’nd’otendaka yok’osamb’oho, aotongola bosolongano.
Currently Selected:
Bikambwa Biniki Bikima 19: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
