Bikambwa Biniki Bikima 2
2
1Ko eneki bina bona ntuk’itano oyelaka, baosolongana nk’iyatu en’edye emoko. 2Koko kaimo lolingo loyaki ena loola yoka lofongo lona lokolo mene, ko botumba bohotu bonok’iy’okisak’ase bolola la loho. 3Ko ndemi ineyakambwana iniyaaki yoka nkoi, yenya eneyal’iyo; ko lolemi lona nkoi lomotama eneyali boto l’oto’oniyo. 4Ko iyatu baolola la Bolimo bon’olotsi, ko baomatsa litenda la mposo ikina, yok’onoki Bolimo oafak’etendelo.
5En’esik’eho Ba-Yuda bamoi bayaaki ena Yelusalema, banakumyakt Yakomba, ko banayaki en’enyanga behetu beneyali en’ase’a loola. 6Eneki yoi liho ookanaka, bato bik’ike baosusana, ko baokandakanda bik’ike eneki boto l’oto ookak’oka bayatende nk’ena lofoso lonandamene. 7Ko iyatu baoka losomo, ko baofefa, Mbo lenda, ban’ato’ane banayatende, iyatu bafayali nde baise Ngalilaya? 8Iya, iso toka boto l’oto nk’ena lofoso lonandamene loneloki’nd’ootwaka bosamb’oya? 9Ba-Palutia, la Ba-Madia, la Ba-Elama, ko l’iy’anatonga ena Mesopotamia, l’ena Yudea la Kapadokia, l’ena Ponto, l’ena Asia, 10l’ena Fulungia, l’ena Pampulia, ena Ejipeto, ko l’en’enyanga bena Libwe ena mbolimboli la Kulene, ko l’efenda bena Loma, Ba-Yuda ko la Befenda banahalingwaki Ba-Yuda; 11Ba-Kulete ko la Ba-Alaba: iso tomaok’iyo kuma bayatende ena mposo inisoamene bikambwa bina mpefa bina Yakomba. 12Ko iyatu baofefa, ko baokandakanda, baufolana, Mbo ncina ena yoi line eka nai? 13Koko bakina bamanyeela, iy’ate, Baolowa l’aana ban’atoto.
14Koko Petelo aemala, ende la ba-jo l’omoko, ko amalokwela la yoi lina likolo, ate, Ino baise Yudea l’inatu banatonga ena Yelusalema, beyaka yoi line, ko bolofaka baoyi’anami: 15bato’ane bafalowa, yoka bosamb’onakanel’ino, lacin’oka yefa limoyela nko neuf heures kei; 16ohonde yoi line liyali nko yoi linaliki bosumoli’oka Yoele otendak’ale, ate,
17Yakomba aila, ate, En’ina bena nsimbo Nongutela Bolimo’onami eneyali Bato bahatu; Ko ban’anino bana mpame l’an’ayato bangotend’aoyi, Ko befeng’enino bangena bienelo, Ko bingambe binino bangolotwa balotwa.
18O, en’ina beho nongutela Bolimo’onami Eneyali baombo’anami bana mpame l’an’ayato, ko bangotend’aoyi;
19Ko nongenyanya bikambwa bina mpefa ena liko, Ko la ndembi ena loko en’okal’ase: Nko bakila, la nkoi, ko la loonge lona belinga;
20Bina mene bongohalingwa bilima, Ko ngondo engohalingwa bakila, En’oso bon’eyelo ena bina bona Yawe, Nko bin’oho bon’okolo l’ona lokumo;
21Ko boto l’oto onongelela lina lina Yawe mbila angikyama.
22Ino bato bana Yisalaele, bolofaka baoyi’ane, Yesu ona Nazaleta ayaaki boto onoki Yakomba okumyaka eneyal’ino la bikambwa bin’ofilo la bina mpefa, ko la ndembi iniki Yakomba oilaka ena ntoto enino, yoka bosamb’oney’inoamene. 23Ende aolekyama la eango mene ena Yakomba, ko la njeya eneki Yakomba oeyak’oso; koko ino bomoluunda l’akasa ban’ato baninda mbongi, ko bamoloyaka en’ekulusu. 24Koko Yakomba ameetola en’ewedi, ko amotungola ena bifafo bin’ewedi, lacin’oka ende atatungamisa l’eho. 25Lacina Dawidi atendaki’ale lacin’enande ate,
Njenaki Yawe bisike bihitu en’oso bon’elongi enami; Lacin’ende ayali en’ili bona likasa linami y’ome lacin’eho mpalidyame tu;
26La ncin’ene, botem’onami bokik’ekiko, Ko lolemi lonami lonyanga, Ko le yonge linami nkoho lingoyala nko la lo lengedyo.
27Lacin’oka e ofacikaki bolimo’onami ena Adese, Ko nk’osamb’oho ofacikaki Ona mbongi One lacina aene botuku.
28Ontumaki mboka ina liiko, Ko ongonkinza l’enyanga l’elongi ene.
29Bifili, ena likambo lina engambe eka Dawidi, ekoli lacina nkoofody’oka awaki, ko akunjamaki, ko nketa enande eyali l’iso nko le bon’in’one. 30Ende ayaaki bosumoli, ko aeyaki’oka Yakomba aosembyaki esemba, noka, eneyali ban’anande omoi angokisase en’ieko ina lifoka linande: 31eneki’nd’oeyaka yok’oho, atendaki yoi litutuma lacin’en’eetwelo ena Masiya en’ewedi, ate, Ende atacikala ena Adese, ko yonge linande liten’otuku tu. 32Yakomba amoletola Yesu en’ewedi, ko isatu tomoyalama temoins ina yoi liho. 33Koko eneki’nd’oiledyamaka en’ili bona likasa lina Yakomba y’ome, ko eneki’nd’otambaka esemba ena Bolimo bon’olotsi eneyali Bafango, amutel’one bonen’ino ko bonok’ino isanga. 34Lacin’oka Dawidi mene atilela ena loola; ohonde endamene aila, ate,
Yawe ailaki Nkolo enami, ate, E, kisak’ase en’ili bona likasa linami y’ome,
35Yengoko enengim’oila baokyi’owe’ane limbolongo en’ase ban’akak’ane.
36Lacin’eho, bato bahatu ban’onyanga bona Yisalaele baeyake solosolo mene oka Yakomba amiledya Yesu one onok’in’oakaka en’ekulusu, lacina ayalame Nkolo la Masiya.
37Enek’iy’ookaka baoyi’aho, betem’eniyo beokeswa la lokeseli, ko baufola Petelo la bikima bihitu, iy’ate, Bifili, tongil’oya? 38Ko Petelo amasumola, ate, Bumbela baoyi’owe, ko binama en’asi nk’inatu ena lina Yesu Masiya, lacin’en’etungwelo enino en’aoyi’owe; ko bongotamba nganji eka Bolimo bon’olotsi. 39Lacin’oka esemba eyali nk’eneyal’ino, ko l’eneyali ban’anino, ko l’eneyal’iyatu banayali en’esana banangi Yawe Yakomba eniso oelela eneyal’ende. 40Ko amalaka l’aoyi’amoi bike, ko amasomya, ate, Boyoikyak’inoamene ena ntoto en’eotwelo ene en’okandokando. 41Ko iy’anatambaki baoyi’anande l’ekiko bainama en’asi; ko bato yoka nkoto isaso baambana l’iyo en’in’oho. 42Ko baoyala la locinji ena lilako lina bikima, ko l’en’eambanelo, ko l’en’ekesole ena mampa, ko l’ena beondo.
43Koko losomo lokwela bato bahatu; koko bikambwa bike bina mpefa ko la ndembi bilama la bikima. 44Ko iyatu banimedyaki baambana en’esanga emoko, ko baambanya toma toniyo tohatotu. 45Ko baotekya batuka baniyo ko la toma toniyo, ko baokafela bato bahatu, yok’onoki boto l’oto oelingitanaka. 46Ko bina l’ina baoyaela la lokanyi lomoko en’ilombe ina Yakomba, ko baokesa mampa en’etumb’eniyo, ko baola toma toniyo l’enyanga ko l’etema bena solosolo; 47baokumya Yakomba, ko baimedyama l’olotsi l’ato bahatu. Ko bina l’ina Nkolo aambanya l’ekelesia iyo banikyama.
Currently Selected:
Bikambwa Biniki Bikima 2: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
