Bikambwa Biniki Bikima 1
1
1O Teofilo, en’okand’onami bonoki’oso ntengaki baoyi bahatu banaki Yesu omatsaka likamba, ko banaki’nd’omatsaka lilaka, 2yengoko bin’oho bonoki’nd’otomaka bikima lotomo la Bolimo bon’olotsi, nko bikima biniki’nd’osonaka, ko ena mbus’eho ailelaki. 3Ko ayotumaki endamene eneyal’iyo la ndembi bike kum’ayaike ena mbusa ena bino binande bin’ewedi; ko aenyaki eneyal’iyo bekolo ntuk’inei, ko amasumola baoyi bana lifoka lina Yakomba. 4Ko eneki’nd’osoionganaka l’iyo, amasumola, batumake ena Yelusalema, ko ate, Bolengedya esemba ena Bafango, yok’onok’in’ookaka eneyal’emi; 5lacina Yoane ainaki’ato en’asi solosolo; koko ino bonginama la Bolimo bon’olotsi, kuma bina betasile bike.
6Koko enek’iy’osolonganaka, bamufola, iy’ate, Nkolo, ongucisa nde lifoka eneyali Yisalaele isanga? 7Amakutwela, ate, Efakoli l’ino lacina beye bisike la bilanga biniki Bafango oilaka ena lifoka linandamene. 8Ohonde enengi Bolimo bon’olotsi oya eneyal’ino, bongotamba mpamba, ko bongoyalama temoins inami ena Yelusalema, l’en’enyanga bena Yudea la Samalia endotu, ko l’ena nsimbo mene ina loko. 9Ko eneki’nd’otendaka yok’osamb’oho, ailedyama kum’iyo bayolende; ko lilo limoumola en’aiso’aniyo. 10Enilel’ende, ko enalend’iyo ena loola ta, lenda, bato’afe baemala l’iyo la bisenda bina telele; 11ko iyo baila, iy’ate, Ino bato, baise Ngalilaya, bemali yok’one, ko boyalende ena loola ta lacina nai? Yesu one onumolamaka ena ntoto enino ko aotambamaka ena loola, anguta lakina nk’eyok’onok’in’oenak’ende kum’ayacu ena loola.
12Ko iyo baocika lingonji lina Bilaya, linaliyali mbolimboli la Yelusalema, yoka bokita bona Sabata kei, ko bautwa ena Yelusalema. 13Enek’iy’otuaka, bailela en’etenyi emoi ena liko, enek’iy’okisak’ase; bain’aniyo nko Petelo, la Yoane, la Yakobo, la Andelo, la Filipo, la Toma, la Balutolomayo, la Matayo, la Yakobo, bon’ona Alafayo, la Simona Zelote, ko la Yuda, bakune’ona Yakobo. 14Bane bahatu baoyaela la locinji la lokanyi lomoko en’oondo, iyo l’ayato’amoi, la Malia nyango ena Yesu, ko l’akune bana Yesu.
15Ko en’ina beho, Petelo aemala ena ntoto ena bifili, (ko bik’ike bon’ato boyaaki meho, yombo bato bokama l’ato ntuk’ife,) ko aila, ate, 16Bifili, ekoli lacina etengelo ene eilame, nk’eho eneki Bolimo bon’olotsi otendak’ale l’onyua bona Dawidi ena likambo lina Yudasa, onoyalamaki bolonji’oniyo banundaki Yesu. 17Lacin’oka ende aalamaki l’iso, ko atambaki liondo lina ekambelo ene. 18(Boto’one asombaki lisala la nyongo ena bowe’onande; ko akwaki batuletule meho, ko botem’onande boodya nko mbodya, ko besofo benande behetu beofola pao! 19Ko yoi liho yeyanaki eneyal’iyatu banatongaki ena Yelusalema; ko la ncina eho lisala liho litangamaki ena lofoso loniyoamene Akeladama, nko Lisala lin’akila.) 20Lacina yoi litengamaki’ale en’okanda bona Njembo, ate, Litonga linande liyalamake nk’elali, Ko boto atatongake meho tu; ko lakina, Boto’okina akitanyake en’ekambelo enande. 21Lacin’eho, eneyali bato’aho banayaaki l’iso bina l’ina en’esike ehatu eneki Nkolo Yesu oselaselaka bili l’ili eneyal’iso, 22mmatsa l’inelo ena Yoane, yengoko bina bonoki’nd’otocikaka eneki’nd’otambamaka ena loola: eneyali bato’aho ekoli lacina omoi asoname, aambane l’iso yoka temoin en’eetwelo enande en’ewedi. 23Ko baemadya bafe, nko Yosefa onotangama Balusaba, onoyaaki la nkombo eka Yuseto, ko la Matia. 24Ko baonda, iy’ate, E, Nkolo, oneya betema ben’ato bahatu, ototume en’atenyi’aniy’afe oho onok’osonaka, 25lacina akitanya ena mpifo ko l’en’ekambelo ene en’ekima eneki Yudasa oumaka l’owe’onande, ko aocoa en’ili’onandamene. 26Ko baila ndembi iniyo ina nsona, ko esonelo eokwela Matia, ko ende aalama la ba-jo l’omoko.
Currently Selected:
Bikambwa Biniki Bikima 1: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
