Bikambwa Biniki Bikima 18
18
1Ena mbusa en’aoyi’ane Paulo auma ena Atenia, ko aoya ena Kolinto. 2Aosungya meho bise Yuda onotangama Akwila on’onyanga bona Ponto, ende l’ooli’onande oka Pulisekila, banayaki nko kekeke ena Italia, lacina eneki Kulaudio oitanyaka Ba-Yuda bahatu ena Loma. Ko Paulo aotua eneyali bato’aho; 3ko lacin’oka l’ende l’iyo baeyaki ekambwa emoko, aokisase l’iyo, ko baokamb’ekambwa. Ekambwa eniyo nko ntela ena betumba bena bisenda. 4Ko aolaka ena sunagoga bekolo bena Sabata behetu, ko aomeka okengola le Ba-Yuda le Ba-Elene.
5Koko eneki Sila la Timoteo oyaka ena Makedonia, Paulo aoka yoi bolito bike en’otema, ko aosumola Ba-Yuda fololo mene, ate Yesu ayali nko Masiya. 6Koko enek’iy’oataka ntango bike, ko bamosaiya besao, ende aonunganya bisenda binande, ko amalokwela, ate, Bakil’anino bayalamake en’ete’eninoamene: emi mpoli ena likambo liho; en’isik’ine locoa eneyali Befenda. 7Auma meho, ko aotua en’otumba bon’oto’omoi onotangama Titio Yuseto, bokumi bona Yakomba, ko botumb’onande boyaaki mbolimboli la sunagoga. 8Ko Kulisipo, chef ena sunagoga, aimedya Nkolo, l’ende l’omboi’onande bohotu; ko bike bona baise Kolinto baoka, ko baimedya, ko bainama en’asi. 9Ko Nkolo aosumola Paulo en’enelo l’oco, ate, Taangake, ombotenda nko ntenda, tayalamake mwi; 10lacin’oka emi njali l’e, ko efan’oto onongokiilisa yoi lin’owe; lacin’oka njali l’ato bike en’onyang’one. 11Ko aoyalama meho mbula emoko la nsenza botoa, ko amalaka yoi lina Yakomba.
12Koko eneki Ngalio oyalamaka gouverneur ena Akaya, Ba-Yuda baemala la lokanyi lomoko, baindimwela Paulo, ko baoya l’ende en’edye en’etendelo en’akambo, 13iyo, Mbo boto’one alak’ato ate bakumya Yakomba l’okotua bonofakoli l’asangya. 14Koko eneki Paulo osokomumola bonyu’onande, Ngalio aolokwela Ba-Yuda, ate, Ino Ba-Yuda, yombo yoi line lisokoyala yoi lin’owe, yombo yoi lina lofundo l’esefo, tumbe nsokokolof’ino; 15ohonde yombo likambo liyali likambo lin’aoyi ntenda, la baina, la basangya baninoamene, inoamene bokadya likambo liho: emi mpalange lacina ntende bakambo’aho. 16Ko amaitanya en’ieko inande ina bakambo. 17Koko iyatu baunda Sosetene, chef ena sunagoga ena Ba-Yuda, ko bamofoma en’oso bon’ieko in’akambo. Ohonde Ngalio atakanedya le baoyi’ane.
18Eneki Paulo okindaka bina bemoi bike ena mbusa ena baoyi’ane, aosesana l’ifili, aosemwa, ko aocoa ena Sulia, ende la Pulisekila la Akwila; ende aokoola bote’onande ena Kenkulea, lacin’eneki’nd’otehaka lisangya. 19Baoya ena Efeso, ko amacika meho. Koko endamene aotua ena sunagoga, aolaka Ba-Yuda. 20Koko enek’iy’oufolak’ende lacina acikale isisali, atimedya, 21ohonde amasesa, ate, Akoli eneyal’emi lacina njele ena Yelusalema lacin’en’elambedya eneng’is’ola; koko yombo Yakomba alanga, nonguta eneyal’ino lakina. Ko aosemwa’ena Efeso. 22Ko eneki’nd’osemaka ena Kaisalia, aotefwa, ko aesa ekelesia, ko aokita ena Antiokia. 23Ko eneki’nd’okindaka elela ena Antiokia, auma, ko aotianya benyanga bena Ngalatia la Fulungia, ka-ka-ka, ko aokikya bakili bahatu.
24Ko Bo-Yuda bomoi, lina linande lika Apolo, bise Alesandulia, botenji bona nkaso mene, oneyaki Bitengelo bina Yakomba nko njeya mene, ende aoya ena Efeso. 25Boto’one aolakama ena mboka ena Nkolo, ko eneki Bolimo ololaka en’otem’onande aosumol’ato, ko aolaka baoyi bana Yesu nko cilili, kang’endamene aeyaki inelo eneki Yoane oinaka kei. 26Ko aomatsa lisumol’ato bosimo ena sunagoga, efan’ofolu tu. Koko eneki Akwila la Pulisekila ookaka yoi linande, bamotamba eneyal’iyo, ko bamosakitwela mboka ena Yakomba nko fololo. 27Ko eneki’nd’oyalamaka la lisangya lacina aete ena Akaya, bifili baotengela bakili bokanda lacina baosangele; ko eneki’nd’oyelaka meho, aokamby’iy’animedyaki l’isei nko nkambya, 28lacin’oka aokoiya Ba-Yuda ena ntango l’ekoiyelo mene nk’en’oso bon’ato, eneki’nd’oeyanyaka la Bitengelo bina Yakomba ate Yesu ayali nko Masiya.
Currently Selected:
Bikambwa Biniki Bikima 18: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
