Bikambwa Biniki Bikima 15
15
1Ko bato’amoi banayaki ena Yelusalema baolaka bifili, Mbo nk’ino bofakesama yonge yoka bosamb’onoyali boeka bona Mose, bofikyamisa tu. 2Paulo la Balunaba baatana l’ato’aho ntango bik’ike, ko baoswela baoyi l’iyo; nkwaho bakili baosona Paulo la Balunaba ko l’amoi’aniyo, lacin’eho bacu Yelusalema eneyali Bikima la bingambe ena yoi line. 3Baise ekelesia bamacindedya ena mboka, ko iyo baotianya Poinike la Samalia, baosumol’ato bokotua bonoki Befenda oumbelaka baoyi’owe, ko baokikya bifili bihitu ekiko bike mene. 4Ko enek’iy’oyelaka Yelusalema, baise ekelesia la bikima la bingambe bamasangela, ko iyo baolokola baoyi bahatu banaki Yakomba okambaka l’iyo. 5Koko bamoi banimedyaki bana boloi bona Bafalusi baemala, iy’ate, Ekoli lacin’iyo bakesame yonge, ko balakame lacin’eho bamonya basangya bana Mose.
6Bikima la bingambe baosolongana lacina basisole yoi liho. 7Koko enek’iy’oatanaka ntango bike, Petelo aemala, ate, Bifili, ino bey’oka Yakomba ansonak’emi’ale eneya l’ino, lacin’eho Befenda baoke bosimo bon’olotsi l’onyua’onami, ko baimedya. 8Ko Yakomba, oneya betema, amaimedya la ndembi, eneki’nd’oafaka Bolimo bon’olotsi, nk’eyok’onoki’nd’otofak’isoamene; 9ko atatocikitany’iso l’iyo, lacin’oka asongaki betem’eniyo l’imeedyo. 10Iya, isanga ino bomeka Yakomba lacina nai? enil’ino bolito ena nkingo en’akili, bolito bonotinya bafango’aniso, l’isoamene totinya? 11Ohonde iso timedy’oka l’iso l’iyo tongika nko l’okotua’omoko, nko l’isei ina Nkolo Yesu.
12Koko bakili’aho bahatu baoyala nko mwi; ko baolofamela eneki Balunaba la Paulo otendaka, ene k’iy’oasumolaka ndembi la bikambwa bina mpefa biniki Yakomba okambaka l’iyo en’enyanga bena Befenda. 13Koko enek’iy’okadyaka litenda, Yakobo aokutola, ate, Bifili bondofe: 14Simeona amotosumola bokotua bonoki Yakomba olendanaka la Befenda en’oso l’oso, lacin’eho asonole eneyal’iyo boloi bon’ato bonongotangama la lina linande. 15Ko baoyi banaki basumoli otendak’ale bakolana nko la yoi liho, lacina yoi limotengama,
16Ena mbusa en’aoyi’ane nonguta la mbusa,
Ko nongit’ofaka lakina botumba bona Dawidi bonokwaki,
Ko nongofaka lakina botumb’oho bonowaki;
Ko nongemadya boho lakina.
17Lacin’eho bato banaciki bakembe Yawe,
Ko la Befenda behetu, banatangama la lina linami.
18Yawe onenyanya baoyi’ane nk’en’alale amotenda baoyi’ane.
19Lacin’eho, yoi linakanel’emi lika likoli liho line: tofanyome Befenda beho banahalingwa eneyali Yakomba; 20ohonde tatengel’iyo bokanda lacin’eho bakile nsefo ina baidola, la likele, la nyama inikomamaki, ko l’akila. 21Lacin’oka l’en’alale Mose ayali l’alaki’anande en’enyanga behetu, ko baandeela bekand’enande ena basunagoga bina l’ina en’ina bona Sabata.
22Nkwaho bikima la bingambe la baise ekelesia bahatu baokanela bolotsi lacina basone bato’amoi’aniyo, ko batom’iyo ena Antiokia la Paulo ko la Balunaba; ko baosona Yuda onotangama Balusaba, la Sila, bato bana lokumo eneyali bifili. 23Ko baotenga bokanda bonocoa l’iyo yok’one: Bikima la bingambe la bifili, eneyali bifili bina Befenda biniyali ena Antiokia l’ena Sulia l’ena Kilikia, tokees’ino. 24Tomok’oka bato’amoi bamofola eneyal’iso, ko bamocoa oyokolidy’ino l’aoyi bana ntenda, ko bamotatengya betem’enino. Iso totatom’iyo tu. 25La ncina eho, enek’is’oyalamaka la lokanyi lomoko, tomokanela bolotsi lacina tosone bato, ko tatom’iyo eneyal’ino la Balunaba la Paulo banalangama l’iso, 26banolamaki l’ewedi mene lacin’ena lina lina Nkolo eniso Yesu Masiya. 27Lacin’eho, tomotoma Yuda la Sila, ko iyoamene bangokosumol’ino nko baoyi’ane l’onyua. 28Lacin’oka Bolimo bon’olotsi aokanela bolotsi, ko l’iso nkoho, lacina tofatadya bolito’omoi eneyal’ino, umola nko baoyi’ane banakoli; 29nko lacina bokile nyama inilekedyama baidola, la bakila, la nyama inikomamaki, ko la likele. Nko bongokila baoyi’aho, tumbe bongonga nk’olotsi. Bocikalaka la locili.
30Enek’iy’otomamaka, baocoa Antiokia, ko enek’iy’osusanyaka bike bon’akili bahatu, bamasukya bokanda. 31Ko iyo, enek’iy’oandaka boho, baonyangela baoyi’aho bana ncicimodya. 32Ko Yuda la Sila, banayaaki iyoamene nko basumoli, baolaka bifili l’aoyi bike, ko bamakikya. 33Baokinda meho liputa, koko lakina bifili bamatoma la bosako bona mwi, lacin’eho bautwa la mbusa eneyal’iy’anatomaki. 34(Ohonde Sila aokanel’olotsi acikale meho isisali.) 35Koko Paulo la Balunaba baocikala ena Antiokia, baolaka ko baosekodya bosimo bon’olotsi bona yoi lina Nkolo, iyo l’ato’amoi bike nkoho.
36Ena mbusa ena bina bemoi Paulo aosumola Balunaba, ate, Akoli lacina tutwa, toyengya bifili en’enyanga l’enyanga benek’is’osumolak’ato yoi lina Nkolo, toyaene bokotua bonoyal’iyo. 37Ko Balunaba asokolanga lacina batole l’iyo Yaone onoyali l’osatu’oka Malako. 38Ohonde Paulo atakanel’olotsi batol’ende onaumbelaki’ale ena Pampulia, ko ataco’ale l’iyo en’ekambwa. 39Lacin’eho, baosa lisa, ko baokambwana lacin’ena lisa liho, ko Balunaba aotola Malako l’ende, aosemwa ko aocoa Kupulio. 40Ohonde Paulo aosona Sila, ko aocoa, eneki bifili oalekyaka eneyali isei ina Nkolo. 41Aotianya Sulia la Kilikia, ko aokikya bikelesia.
Currently Selected:
Bikambwa Biniki Bikima 15: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
