Bikambwa Biniki Bikima 14
14
1Kuma bayali ena Ikonio, bikima batuaki ena sunagoga ena Ba-Yuda laanda, ko baolak’ato; koko la lilako liniyo bik’ike bona Ba-Yuda la Ba-Elene baimedya. 2Koko Ba-Yuda banatimedya tutu baosombanya Befenda, ko baookela nkanyi inay’owe en’etem’eniyo lacin’eho baoke bakili bowe. 3Lacin’eho, iyo baokinda meho elela mene, ko baolaka bato efan’ofolu nko la locili lona Nkolo, ko Nkolo aenyanya yoi lin’isei inande, eneki’nd’oimedyak’oka ndembi la bikambwa bina mpefa bikambame l’akas’aniyo. 4Koko bato’aho ban’onyang’oho baokambwana beloi: bamoi baambana la Ba-Yuda, koko bakina baambana la bikima. 5Koko eneki Befenda la Ba-Yuda la bafok’aniyo oangaka eango lacin’eho bailel’iyo bokotua bona nsoi mene, ko bafusele baufe, 6baofokotola yoi liho, ko baolota en’enyanga bena Lukaonia, nko Lusetula la Delube, ko l’enyanga benoli l’eho; 7ko baosekodya bosimo bon’olotsi meho.
8Boto’omoi akisak’ase ena Lusetula, onindaki locili en’akak’anande, onoyaaki etumbe nk’en’otema bona nyango enande, tu atakenda. 9Boto one aoka kuma Paulo ayatende; ko Paulo amolenda ta, ko ameen’oka ayali l’imeedyo lacin’eho aike, 10ko amosumola la lofoso lona lokolo, ate, Emala en’akak’ane cilili. Ende aosola bendembi ko aokenda en’akaka. 11Koko eneki bato’aho bik’ike oenaka ekambwa eneki Paulo okambaka, baololua ena lofoso lona Lukaonia, Mbo yakomba imokita eneyal’iso yoka bat’ola. 12Ko baotanga Balunaba Zeu, ko baotanga Paulo Eleme, lacin’oka ayaaki Bosumoli bon’oso. 13Ko nkanga ena Zeu onoyaaki la mesa enande ena mbeka en’oso bon’onyanga, aoya la ngombo ko l’efusi en’efolo ben’onyanga, ko ende l’ato’aho bik’ike basokolanga lacina balekya mbeka. 14Koko eneki bikima, Balunaba la Paulo ookaka yoi liho, baokambola bisenda, ko baocoa la laango ena ntoto en’ato’aho, iy’ate, 15Bifili, ino bila baoyi’ane ncina eka nai? Iso toyali nko bato nkoho, ko toyali l’okotua yoka bosamb’onoyal’ino; toyakosumol’ino bosimo bon’olotsi, lacin’eho bumbele baoyi’ane bana bototoloto, ko bohalingwa eneyali Yakomba eneyaike, ononunolaki loola la loko ko la lose l’okwa, ko la toma tohatotu tonatoyali meho; 16onimedyaki’ale bato bana biotwelo bin’alale bacu mboka iniyoamene; 17ohonde atayocik’endamene efana temoin, lacin’Ende aokamba bolotsi: akof’ino mbula ena loola ko la bauma banaseki’emamo bike, ko aokinza betem’enino la toma ko l’ekiko. 18Kanga baotenda baoyi’ane, baenak’ino mene lacina bafekya bato, batonolekya mbeka eneyal’iyo.
19Koko Ba-Yuda bamoi baoya ena Antiokia l’ena Ikonio; ko enek’iy’osombanyaka bato’aho bik’ike, baofusela Paulo baufe, ko bamosuma ena mbiolo en’onyanga, enek’iy’okanelak’oka amosila liwa. 20Ohonde eneki bakili olingamelaka, ende aemala, ko aotua en’onyanga; ko en’ina bona loi ende la Balunaba baocoa Delube. 21Ko enek’iy’osumolaka bato ban’onyang’oho bosimo bon’olotsi, ko baata bakili bike mene, bautwa la mbura ena Lusetula la Ikonio, ko l’ena Antiokia. 22Ko baokiky’etema ben’akili, ko bamasomya lacin’eho bayalame en’imeedyo iho nko njalama, ko bamasumol’oka tongotua ena lifoka lina Yakomba nko la bino bike. 23Ko enek’iy’osonaka bingambe ena bikelesia bihitu, ko baonda la nkila ena toma, bamacika eneyali Nkolo, nk’ende onok’iy’oimedyaka. 24Ko baotianya Pisindia, ko baoyela ena Pampulia. 25Ko enek’iy’olakaka yoi ena Pelunga, baokita ena Atalia. 26Meho baosemwa, baocoa Antiokia, nko bili bonok’iy’olekyamaka eneyali isei ina Yakomba lacin’ena ekambwa enek’iy’okadyaka. 27Enek’iy’oyelaka, ko baosolonganya ekelesia ehatu, bamalokwela baoyi bahatu banaki Yakomba okambaka l’iyo, ko l’okotua bonoki’nd’okombwelaka Befenda lokombo lon’imeedyo. 28Ko baokinda elela mene nkisase l’akili.
Currently Selected:
Bikambwa Biniki Bikima 14: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
