Bikambwa Biniki Bikima 16
16
1Ko aoya ena Delube la Lusetula. Ko lenda, bokili’omoi ayaaki meho onotangama Timoteo, nyango enande bise Yuda onimedyaki, koko bafango’onande nko bise Elene. 2Bokili’oho ayaaki la lokumo lon’olotsi eneka bifili banayaaki ena Lusetula l’ena Ikonio.
3Paulo aolanga lacin’eho acu l’ende; amotamba, ko amokesela yonge, nko lacin’ena Ba-Yuda banayaaki en’enyang’eho, lacina iyatu baeyaki oka bafango’onande ayaaki bise Elene. 4Enem’iy’otianya benyanga, bamasukya beeka beneki bikima la bingambe bina Yelusalema oaekedyaka, lacina bamonya beho. 5Nkwaho bikelesia biocila en’imeedyo, ko botuy’oniyo bosokwa bina l’ina.
6Baotianya benyanga bena Fulungia la Ngalatia, nko lacin’eneki Bolimo bon’olotsi oafekyaka batalakake yoi ena Asia; 7ko enek’iy’olamaka la Musia, basokolanga lacina bacu Bitunia, koko Bolimo bona Yesu atimedya; 8baolekanya Musia, ko baokita ena Tuloa. 9Koko l’oco Paulo aena enelo: en’enelo eho boto ona Makedonia aemali, ko ameelela, ate, Yaka ena Makedonia, oyotokambya. 10Eneki’nd’oenaka enelo eho, isasanga tofona etelo lacin’eho tocu ena Makedonia, lacin’oka tokanelak’is’ate, Nkolo amoteelela lacin’eho toyasumol’iyo bosimo bon’olotsi. 11Lacin’eho, tosemwa ena Tuloa, teta ena Samotulake nko cilili, ko en’ina bona loi toyela ena Neapoli. 12Njuma meho tocoa Filipoi, ecimo en’oso mene en’onyanga bona Makedonia, litonga lina Ba-Loma. Koko tokisase en’onyang’oho bina bemoi. 13Ko en’ina bona Sabata tofola ena mbiolo en’ofolo bon’onyanga, tocoa en’oseleka bona lose, lacina enek’is’okanelak’oka edye ena boondo eyali meho; tokisase, ko totenda l’ayato banasusanyi. 14K’o boyoto’omoi onotangama Ludia, bosombi bona bisenda bina pourpre, bise Twatila onokumyaki Yakomba, aoka baoyi’aniso, ko Yakomba aokombola botem’onande lacin’eho alofamele baoyi banaki Paulo otendaka. 15Koko eneki’nd’oinamaka en’asi, l’ende l’iy’anayaaki en’otumb’onande, aotoonda, ate, Yombo bonkodya nd’oka njali l’imeedyo eneyali Nkolo, boyaka en’otumb’onami, boyale nko meho. Ko aotosomya.
16Koko enem’is’ocu en’edye en’oondo, boyoto’omoi onoyaaki la lifoi lina Putono, onatelaki banyangetuke banande nkita bike l’aoyi ban’okanga, aukana l’iso. 17Ende aokilana la Paulo ko l’iso, kuma ayalolua, ate, Bato’ane bayali baombo bana Yakomba Eneleki nko Ndeka, banakotum’ino mboka ena liiko. 18Aila yok’oho bina bike. Koko Paulo aohelengwa, eneki’nd’olembaka la yoi liho, ko aosumola lifoi, ate, Lakosumol’e ena lina lina Yesu Masiya, fola eneyal’ende! Ko lifoi yofola nkwaho.
19Koko eneki banyangetuke’anande oenak’oka eatelo ena nkita eniyo emuma, baunda Paulo la Sila, ko bamasuma en’edye ena limbongo en’oso bon’afoka; 20ko enek’iy’oyaka l’iyo eneyali batenji ban’akambo, baila, iy’ate, Bato’ane, baise Yuda, baseki lilidya bonyang’oniso nko ndidya mene; 21ko bayalake bato beeka benefakolana l’iso baise Loma lacina totambe. 22Koko bik’ike bon’ato bemala eneyal’iyo nkwaho, ko bamaakola. Nkwaho batenji baotoma lacina bakumolame bisenda biniyo, ko bafomame lofomi 23Koko enek’iy’oafomaka bembambo bike, bamafusa en’otumba bon’enyolo, ko baosumola botombanyi lacin’eho atombanya nko ntombanya mene. 24Ko ende, eneki’nd’otomamaka lotomo loho, amaokela en’etenyi en’otumba bon’enyolo eneyaaki ena ntundulu mene, ko aila bakak’aniyo ena bifoke. 25Koko yok’esike ena kelekele mene en’oco, kuma Paulo la Sila bayaonde ko bayembele Yakomba njembo, ko basungu’amoi bayalofe, 26kaimo loko lolilaki nko ndila, elilelo ena locili mene enelidyaki nko biango mene bin’otumba bon’enyolo; ko isasanga nkombo ihatu yokombwa, ko benyolo ben’iyatu beokwa. 27Botombanyi aetwa en’ilo, ko eneki’nd’oenaka nkombo ina botumba bon’enyolo ihatu nko nkombwa, aosomola lokula lon’ita, ko asokolanga lacina ayoyak’endamene, eneki’nd’okanelak’oka basungu bamolota. 28Ohonde Paulo aololua, Mbo tayoilelak’eamene yoi tu; lacin’isatu toyali nko mendo. 29Aelela mwinda, ko aotua la mbango ena ntundulu, ko aokwa nko mbilima la losomo en’oso bona Paulo la Sila. 30Amafodya, ko aila, ate, Bifili, njil’oya lacina mbike? 31Koko iyo Mbo, imedya Nkolo Yesu ko ongika, l’e l’ecimo ene. 32Ko bamosumola yoi lina Nkolo, l’ende l’ato bahatu banayaaki en’otumb’onande. 33Ko amatamba, nk’ena heure eho en’o co, ko amasonga mpota; ko ainama nkwaho, ende l’omboi’onande bohotu. 34Amatoya en’otumb’onande, ko amaambedya toma, ko aonyangela enyanga bike mene, l’ende l’omboi’onande, eneki’nd’oimedyaka Yakomba.
35Eneki bina okyaka, batenji ban’akambo baotoma police, iy’ate, Tungola bato’aho. 36Ko botombanyi bon’otumba bon’enyolo aosumola Paulo baoyi’aho, ate, Batenji bamotom’onyua lacin’ino botungolame; lacin’eho, bofola isanga, bocoaka la mwi. 37Koko Paulo amalokwela, ate, Bamotofom’iso bato bana Loma nk’en’oso bon’ato, iso banatakoiyama likambo tu, ko bamotofusa en’otumba bon’enyolo; koko lakina bangotofodya nde la lokuko? Efana! Nde bayake nk’iyoamene, batofodyake nk’iyoamene. 38Ko police baosumola batenji ban’akambo baoyi’ane; ko enek’iy’ookak’oka bayali Baise Loma, iyo baoka losomo; 39ko baoya, ko bamaonda, ko enek’iy’oafodyaka, bamaufola lacina baume en’onyang’oho. 40Koko iyo baofola en’otumba bon’enyolo, ko baotua en’otumba bona Ludia; ko enek’iy’oenaka bifili, bamacicimodya en’etema, ko baocoa.
Currently Selected:
Bikambwa Biniki Bikima 16: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
