Bikambwa Biniki Bikima 13
13
1Koko bato’amoi, basumoli l’alaki, bayaaki en’e kelesia ena Antiokia, nko Balunaba, la Simona onotangama Nigela, la Lukia ona Kulene, la Manae onok’iy’oololaka la Elode lifoka, la Saula. 2Enek’iy’okambelaka Nkolo ko baokila toma, Bolimo bon’olotsi aila, ate, Bombekedya Balunaba la Saula lacin’en’ekambwa eneki’m’aelelaka. 3Nkwaho, enek’iy’okilaka toma, ko baonda, baotadya bakasa eneyal’iyo ko bamatoma.
4Koko iyo, enek’iy’otomamaka la Bolimo bon’olotsi, baokita ena Seleukia; meho baosemwa, ko baocoa Kupulio. 5Enek’iy’oyelaka ena Salamia, baosekodya yoi lina Yakomba ena basunagoga bana Ba-Yuda; ko Yoane ayaaki l’iyo yoka bokambi’oniyo. 6Enek’iy’otianyaka ekolo ehatu, baoyela Mpafo, ko baosungya meho boloki’omoi, bosumoli’ona mpoci, bise Yuda, onotangama Balayesu, 7onoyaaki eneka gouverneur, Selungio Paulo, boto’ona bomwu. Ende aelela Balunaba la Saula eneyal’ende, ko aolanga lacina alofe yoi lina Yakomba. 8Ohonde Eluma nkanga eho (liko nko lina linande limoi) amafekya, aofona lacina akengole gouverneur, atongoyimedya imeedyo iho. 9Koko Saula, onotangama Paulo nkoho, aolola la Bolimo bon’olotsi, amolenda ta, 10ko aila, ate, E onolola la longo ko l’owe bohotu, e bon’ona Satana, e bookyi’owe bon’aoyi bana mbongi bahatu, ofaledya nde litatengya mboka ina Yakomba ina cilili? 11Koko isanga, lenda, likasa lina Nkolo liyali nk’eneyal’e, ko ongoyala nk’eyok’onody’aiso, ko ofayene bina elela. Isasanga loonge la liucu bamokwela, ko aotengatenga, aokemb’oto onomosuka la likasa. 12Koko eneki gouverneur oenaka yoi linilamaki, aimedya, ko aofefa la lilako lina Nkolo.
13Paulo l’ifili’inande baosemwa ena Mpafo, ko baoyela ena Pelunga, en’onyanga bona Pampulia; ko Yoane aokambwana l’iyo ko autwa la mbusa ena Yelusalema. 14Koko enek’iy’ofolanyaka ena Pelunga, baoyela Antiokia, ecimo emoi ena Pisindia; baotua ena sunagoga en’ina bona Sabata, ko baokisase. 15Ko ena mbusa en’eandelo en’ekanda ben’asangya la ben’asumoli, chefs ina sunagoga bamatomela yoi, iy’ate, Bifili, yombo yoi limoi lineyakiky’ato liyali eneyal’ino, botosumole liho. 16Paulo aemala, amaelela la likasa, ko aila, ate,
Ino bato bana Yisalaele, ko l’in’ananga Yakomba, bolof’aoyi’ane: 17Yakomba en’ato’ane bana Yisalaele asonaki bafango’aniso, ko akumyaki bato’aho kuma bayali ena litonga lina Ejipeto, ko amaumola en’onyang’oho nko la lo lona locili. 18Ko aitedyaki beko tu’eniyo ena sengelenge mbula ntuk’inei; 19ko eneki’nd’oehyaka bato bana benyanga nsambo ena Kanana, amakafela benyang’eniyo yoka lisango, mbula bekam’enei la ntuk’itano. 20Ena mbus’eho amafa juges, yengoko esike ena Samwele, bosumoli. 21Koko lakina ena mbus’eho baufola lacina baate lifoka lina roi, ko Yakomba amafa Saula, bon’ona Kisi, on’oloi bona Benyamina; ende aoyalama lifoka liniyo mbula ntuk’inei. 22Eneki’nd’oumolak’ende, aemadya Dawidi lacin’eho ayalame lifoka lina roi; ko aila yoi lacin’enande, ate, Mena Dawidi, bon’ona Yisai, boto oneyali yoka bosamb’onalanga botem’onamamene; ende angila eango enami ehatu. 23Yakomba ameemaedya Ba-Yisalaele Boiki’oka Yesu nk’eneyali bana ban’oto’one, yok’onoki esemba enande oyalaka. 24Kum’ende ataye, Yoane aolaka lilako lin’inelo en’eumbelo en’aoyi’owe eneyali bato bahatu bana Yisalaele. 25Eneki Yoane okambaka ekambwa enande, aila, ate, Bontang’emi nai? Ei mpayali Ende tu; ohonde, lenda, omoi ayayi ena mbusa enami, ko emi mpakoli lacina nditole bekoli bena nkofo inande. 26Bifili, ban’ana ecimo ena Abalayama, l’amoi’anino bananga Yakomba, yoi lina liiko lone limotomama eneyal’iso. 27Iy’anatonga ena Yelusalema la bato’aniyo bana lifoka, enetey’iyo Ende ko enetey’iyo baoyi ban’asumoli banandama bina l’ina en’okolo bona Sabata, bamoyedya nko baoyi’aho, lacin’oka bamolokoiya likambo. 28Kang’iyo batena ncina en’ewedi eneyal’ende, baufola Pilato lacina ayakame. 29Ko enek’iy’okadyaka baoyi bahatu banatengamaki’ale lacin’enande, bamokitsa en’ote, ko bamoambya ena nketa. 30Ohonde Yakomba ameetol’ende enek’anawaki; 31ko aenya bina bike eneyal’iyo banacikaki Ngalilaya ko bayaki ena Yelusalema l’ende, ko iyo bayali temoins inande isanga eneyali bato. 32Ko iso tokosumol’ino bosimo bon’olotsi bon’esemba eneki bafango’aniso osembyamaka: 33noka, Yakomba amosila likamba esemba eno eneyal’iso ban’aniyo, eneki’nd’oetolaka Yesu enek’anawaki; yok’onoki yoi otengamaka ena Lembo lon’ife, ate, E onde Bon’onami, mokoot’e bon’in’one. 34Ko ena yoi liho lika amomeetola en’ewedi ko afayene botuku, amotenda yok’osamb’one, ate, Nongokof’ino besako bena nsakama la bena locela beneki Dawidi. 35Lacin’oka atendaki ena Lembo lomoi, ate, Ofalekyaki One on’oeka lacina aene botuku tutu. 36Lacina Dawidi, eneki’nd’okadyaka yila eango ena Yakomba en’eotwelo enande, aetama, ko aokunjama l’afango’anande, ko amen’otuku; 37ohonde ende onoki Yakomba oetolaka en’ewedi, Ende aten’otuku tutu. 38Lacin’eho, bifili, ekoli lacin’ino bey’oka la boto’one etungwelo en’aoyi’owe eosumolama eneyal’ino; 39koko boto l’oto onomimedya, ayengwa l’ende boyengo en’aoyi bahatu banatakolan’ende liyengolama la basangya bana Mose’ale. 40Lacin’eho, boongya lilenda, lacina yoi liho linalitengamaki l’asumoli litonoyilama eneyal’ino, ate,
41Bolendaka, ino batemboli, bofefaka, ko behaka;
Lacin’emi njakambe ekambwa en’isik’inino,
Kanga boto akosumol’ino, bofimedyaki ekambwa eho tutu.
42Ko enem’iy’ofola ena sunagoga, baonda Paulo la Balunaba lacina baoyi’ane basumolame eneyal’iyo ena Sabata enoya. 43Ko eneki bosolongano bona sunagoga ofandafandaka, Ba-Yuda bike la Befenda bemoi banafudwaki Ba-Yuda, bakumi bana Yakomba, baokiela Paulo la Balunaba; ko iyo baotenda l’iyo, ko bamasomya lacin’eho baoyaela en’isei ina Yakomba nko njalama.
44Koko ena Sabata ena mbusa, yoka bato bahatu ban’onyang’oho baosolongana lacin’eho balofe yoi lina Yakomba. 45Ohonde eneki Ba-Yuda oenaka bato’aho bik’ike, baok’ekuku, ko baata baoyi banaki Paulo otendaka ntango mene, ko bamosaiya besao mene. 46Koko Paulo la Balunaba baotenda la locili, iy’ate, Yoi limokolana l’iso lacina tokosumol’ino yoi lina Yakomba en’oso; ohonde enakil’ino liho, ko boyokody’oka bofakoli la liiko lonelofakale, lenda, tohelengwa eneyali Befenda; 47lacin’oka Nkolo aototomaka yok’osamb’oho, ate,
Mokiil’e lacina oyalame fololo en’efenda,
Oyalame eikedyo eneyali bato bahatu, yengoko nsimbo mene ina loko.
48Eneki Befenda ookaka yoi line, baonyangela, ko baokumya yoi lina Yakomba; ko iyatu banakodyama lacin’ena liiko lonelofakale baimedya. 49Ko yoi lina Yakomba yosekola en’onyang’oho bohotu. 50Koko Ba-Yuda baosombanya bayato’amoi, bakumi bana Yakomba la bayato bana lifoka, ko la bingambe bin’onyang’oho, lacin’eho banyome Paulo la Balunaba, ko bamaitanya en’enyang’eniyo. 51Koko iyo baotitola lofucifuci lona bakak’aniye eneyali bato’aho, ko baoya ena Ikonio. 52Ko bakili baolola l’enyanga ko la Bolimo bon’olotsi.
Currently Selected:
Bikambwa Biniki Bikima 13: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
