Bikambwa Biniki Bikima 11
11
1Ko bikima la bifili banayaaki ena Yudea baok’oka Befenda baotamba yoi lina Yakomba nkoho. 2Ko eneki Petelo oyaka ena Yelusalema, iy’ana nkesa ena yonge bamoatsa ntango, 3Mbo e otuaki eneyali bato banatakesama yonge, ko olaki toma nko l’iyo! 4Koko Petelo aomatsa oyasumola yoi liho nk’ena limatsako, 5ate, Njaaki en’onyanga bona Yafo, ko loonda Yakomba; ko len’enelo yok’ena lilotua, nko bomongoci yok’esenda ena nkolo eokitsama ena loola, eosukama en’atuku bah’anei; ko boho boya nk’eneyal’emi 6Loenda boho ta, ko lokanela, ko lena nyama miyali l’akak’anei ina loko lohalotu, ko la nyama inay’olema, ko la towawa tonatoyosumela ena loko, ko la mpulu ina liko. 7Ko loka lofoso lonelonsumola, ate, Emala, Petelo, yakaka ko laka. 8Ko laamba, emite, Ef’oko, Nkolo, lacina iyema in’etaketaka la iyema ina nsefo itatua en’onyua’onami. 9Koko lofoso lonkutwela lakina ena loola, ate, Iyema iniki Yakomba osongaka, e tatangake iho mbindo. 10Yoi line yilama beila besaso, ko bomongoci’oko botambama lakina ena loola. 11Koko lenda, nk’isasanga bato’asaso baemala ena mbiolo en’otumba bonoki’m’okisak’ase, banaki Kolunelio otomaka eneyal’emi. 12Ko Bolimo aondaka lacina ncu l’iyo, ntakandakandake. Bifili bine botoa baocoa l’emi, ko totua en’otumba bon’oto’oho. 13Ende aotosumola bokotua bonoki’nd’oenaka ekima ena loola aemali en’otumb’onande, ko aila, ate, Tom’ato ena Yafo oyelela Simona onotangama Petelo; 14ende angokosumola baoyi banangi eamene l’omboi’one bohotu oikyama. 15Ko eneki’m’omatsaka litenda, Bolimo bon’olotsi amakwela, nk’eyok’onoki’nd’otokwelak’iso ena limatsako. 16Ko lokanedya yoi lina Nkolo, yok’onoki’nd’otendaka, ate, Yoane ainaki bato en’asi solosolo, koko ino bonginama ena Bolimo bon’olotsi. 17Yombo Yakomba afak’iyo nganji nk’eho eneki’nd’o tofak’iso enek’is’oimedyaka Nkolo Yesu Masiya, emi vo, nsokokolana lifomana la Yakomba bosamb’oya? 18Enek’iy’ookaka baoyi’ane baoyala nko mwi; ko baokumya Yakomba, iy’ate, Yakomba amofa Befenda nkoho eumbelo en’aoyi’owe lacina baike.
19Iy’anafalangasanyi bili l’ili la binyomelo binimatsaki lacin’ena Setefano baocoa, baoyela Poinike, la Kupulio, la Antiokia; koko baosumola bosimo bona Yoi nk’eneyali Ba-Yuda kei. 20Koko bamoi’aniyo bayaaki baise Kupulio la baise Kulene, ko enek’iy’oyelaka Antiokia, baotenda la Ba-Elene nkoho, bamasumola bosimo bon’olotsi, nko bona Nkolo Yesu. 21Ko likasa lina Nkolo liyaaki l’iyo; ko bike bon’ato bimedya, ko baohalingwa eneyali Nkolo. 22Koko bosimo bona yoi liho bookana en’atoi ban’ekelesia eneyaaki ena Yelusalema; ko iyo baotoma Balunaba ena Antiokia. 23Ko ende, eneki’nd’oyaka, ko aena isei ina Yakomba, aonyangela; ko amakiky’iyatu, ate baundamele Nkolo l’eango mene en’otema. 24lacin’oka ende ayaaki boto’on’olotsi, onololaki la Bolimo bon’olotsi ko l’imeedyo; ko bike bon’ato bambana la Nkolo. 25Koko aocoa Taluseu oyofona Saula. 26Ko eneki’nd’osungyaka, aoya l’ende ena Antiokia. Koko mbula emoko botutuma baosolongana l’ekelesia, ko baolaka bato bike mene. Ko bili bon’oso bonoki bakili otangamaka Ba-Masiya nk’ena Antiokia.
27En’esik’eho basumoli bamoi baocika Yelusalema ko baoya ena Antiokia. 28Ko omoi’oniyo onotangama Agabo aemala, ko aeyanya la Bolimo, ate loci mene lona njala longokwela benyanga behetu bena loko. Ko loci loho loyaki kuma Kulaudio ayali Kaisala. 29Ko bakili bahatu baoyalama la lisangya lacina batomele bifili banatongaki ena Yudea nganji in’isei, boto l’oto yok’onoki’nd’oataka. 30Ko baila yoi liho, ko baotomela bingambe nganji iho l’akasa bana Balunaba la Saula.
Currently Selected:
Bikambwa Biniki Bikima 11: BBY62
Highlight
Copy
Compare
Share
Want to have your highlights saved across all your devices? Sign up or sign in
Bokanda Bona Yakomba Bon’ototo © Alliance Biblique de la R. D. Congo, 1962
