Filipenses 2

Ikũwaĩbu xinãnãnaĩ hiwetikiri hatu yununikiaki, na hãtxarã

1Cristõ hawẽ kuxipa matu inãkinã, hawẽ xinã txãkãkaĩti matu inãniki. Mã nui haya matũ betsabu ha xinãwẽ matu yunua mã hatu daewatiruki. Tsuara mã Cristoki dasiarã, habias Yushĩ mã haya ikũwaĩ betsabuwẽ hatuya nui mã kashakũkaĩtirubuki. 2Haska dasibi binunãnãma habiaskas pashkama mã hiwearã, habias nui mã haya inũ, habias Yushĩ mã haya inũ, habias xinã mã haya ea nĩkamakĩ ea benimawakubaĩkãwẽ. 3Na haska hiwekaĩkinã, yurabu binunũ iki keãma hakia babutã bestibu: “Ea dukũ ẽ bebui pepakainaii”, ikĩ xinãma: “Betsabũri ea maemai ẽ hawamaki”, ikubaĩkãwẽ. 4Haska inũ, betsarã, hawara mã akai inũ mã biairã, matunas bestikiri xinãkĩ mã amis akama hakia ikũwaĩ betsa shabakabi hatu uĩmariakĩ hawara akaibu hatu merabewakĩ ashũriakubaĩkãwẽ.

Jesus Deus keskabia hawẽ tsuma keska hiwekũkainikiaki, na hãtxarã

5Tsuabũra Jesus Cristokiri haska mã xinaĩnã, haska Cristõ xinãkubaini keska betsabukiri xinaĩrakubaĩkãwẽ.

6“Cristo Deus itsabia haskas xinaĩ keãma hiweniki.

7Hawẽ kuxipa beshtekekĩ heneyubirã

nuku keskakĩ nukũ yura bitã

na mai anua dasibibu merabewai

habũ tsuma ikũkainikiaki.

8Hamebi babutã hawẽ Epã yunua txibãkubaini

mawanũ ika ikũkaini cruzki dunua mawaniki.

9Haskawẽ taeshũ Deusũ kẽhairawakĩ hatu binu keyumakĩ

kena kuxipa pepa tsua haska hayama Jesus inãniki,

10hau ha Jesusũ kena nĩkatã dasibibu nai anua inũ,

mai anua inũ, hanushũ mawabũ yushĩ manamisbu anushũ

habũ kẽwaĩ dãti itã

11dasibibũ unãkĩ:

‘Jesus Cristorã, txanima dasibibũ Shanẽ Ibu Yavéki’, ikĩ

Epa Deus kuxipa kẽwãshãkanikiki”.

Cristõ nuku hiwea inã henetimakiri Paulõ yusĩnikiaki, na hãtxarã

12Ẽ betsabu inũ ẽ puibuũ, matuwẽ ẽ nuiaya mã ẽ hãtxa txibãmis heneama akubaĩkãwẽ, ẽ matu uĩayã mã amis keska inũ, ẽ matu uĩyama txaihaira ẽ hiwebiakẽ ea nĩkakĩ txibãriakinã. Hawa kaneama uke merã hawara matũ hiwea Cristona wamakĩ mã inãni Cristoki mesekĩ heneama hawẽ mekepakekãwẽ. 13Matũ hiwea mã ma Cristo inãniwẽ taeshũ xinã betsawẽ Deusũ matu benimawakĩ haska matuwẽ dayakĩ hawẽ xinã pepa tashnimaya haska abuai keska matu amakĩ merabewaya shabakabi ashũkubaĩkãwẽ.

14Mã ma haskarã, ana tsuabura nãtakeabuki nĩkabumabiakẽ matũ hãtxa hamẽ ha ikĩ txakawama inũ ana ha irabeama pe hiwekubaĩkãwẽ. 15Mã haskai hiwea matu tibi mã txakabuma inũ mã kaneisma haska Deusũ bakebui ha yura txakabubu inũ atimapabu anua mexu nea keskama mã hatube hiwearã, bixĩ kuxipa txashai hawẽ unãbaĩti keskakĩ 16matubunã, Deusũ kakape hiweakiri hãtxa hatu unãmakubaĩkãwẽ. Mã haskaya ea ẽ matu anu hamẽ dayai kama iniwẽ taea ea matuwẽ keĩ ẽ tse iki ẽ benimashanaii, hanu Cristo ana huaitianã. 17Ẽ hiwea ẽ matu inãni keska wakĩ ẽ matu ikũwãmaniki. Matũri ikũwãkĩ matũ hiwea mã Deus inãkuĩyaiĩ. Haskawẽ taea ẽ hiwea yauxiama mawakinã, hau mã ikũwãkĩ heneyamanũbũ ẽ hiwea Deus ẽ matu inãkuĩshũtiruki. Ẽ matu haskashuni ẽ benima paewẽ dasibi ẽ matu yuiaii. 18Maturi benimarikãwẽ, ẽ ikai keska xinaĩ ewẽ benimairã.

Filipo anu Timóteo nitxĩkatsi inikiaki, na hãtxarã

19Nukũ Shanẽ Ibũ haska xinãyã matu anu Timóteo yunukatsi haska ẽ xinaiĩ, hau matu nĩkatãkĩ matũ kaka beshũ ea benimawayushanunã. 20Haska matukiri ẽ matu xinaĩ keska inũ ẽ matuwẽ nuimis keska tsuã matukiri pe xinãma txanima tsua betsa hayamaki. 21Ha betsabũ Jesus txibãbiai hatunas bestiwẽ nuikĩ xinãkanikiki, haska Jesus Cristõ abuai keska akamarã. 22Timóteo ẽ bake keskai ebe hiwea dayakũkaĩkĩ kakape Jesuskiri ebetã yusĩkĩ ea merabewakubaĩmis hawẽ hiwea mã unaiĩ. 23Ea haskara washanaibu hatũ matu unãmai hau ekiri matuki txani kanũ ha ẽ matu anu nitxĩkatsis ikaii. 24Haska kasmai ea kayabis kashũ ẽ matu uĩ katirumẽkaĩ, ishũ haska nukũ Shanẽ Ibũ xinã besti ẽ manaii, hawaira kanũ ishũ xinaĩnã.

Filipo anu Epafrodito ha dikabi nitxĩkatsi inikiaki, na hãtxarã

25Ha dikabi ha dabe ẽ hatukiri xinaĩnã, nukubetã ikũwaĩ Epafroditõ hau ea merabewanũ mã eanu nitxĩma ea merabewai ebe dayai bika tenekũkainai Cristokiri kakape yusĩmis ana matu anu ẽ nitxĩyukatsis ikaii.

26Haska isĩ teneaikiri mã nĩkaimabu hawẽ taea hakiri xinaĩ mã hawẽ punu nukaxina haska xinaĩ matuwẽri nui hari matu hakimamariki. 27Txanima ikimaki, isĩ paepa bitã tenei mawakeanirã. Hakia Deus hawẽ nuikĩ ewẽri nuiriakĩ hau ana ea bika betsa tenemayamanũ Deusũ shushawaimaki. 28Haskawẽ taeshũ matu anu hawa ana tea wama ẽ matu nitxĩshunaii, ana matu uĩma uĩ mã benimaya ana ẽ matuwẽ punu nukuyamanunã. 29Nukũ Shanẽ Ibuwẽ taea nukũ betsa Epafrodito kai benima paewẽ ikĩ peirawashãkãwẽ. Ha inũ, tsuabura ha keskaburi abukĩ hawẽ hãtxa nĩkanũ ishũ hatu ikubaĩkãwẽ. 30Tsuã mã ea haska watirubumahairabiakẽ Epafrodito ewẽ taea hawẽ hiwea yauxiama mesebiakẽ Cristo dayashunaiwẽ taea ea merabewai huima isĩ paepa bitã mawakĩ txanima nuku shunũkeanimaki.

Currently Selected:

Filipenses 2: cbsBR

Highlight

Copy

Compare