Filipenses 1

Paulõ hatukiri xinãnikiaki, na hãtxarã

1Ẽ Paulo inũ Timóteõ, Jesus Cristõ tsumapã, mã habũ Jesus Cristo ikũwaĩbu Filipos anuabu inũ, habũ matu mekemisbu inũ, matu merabewamisbu mã dasibi Jesus Cristoki dasiabu nũ matu kene bumai uĩrakãwẽ. 2Nukũ Epa Deus inũ nukũ Shanẽ Ibu Jesus Cristõ hau matu unãnuma hiwemakĩ pewakĩ matu duawapakekubainũbũwẽ.

Paulo ikũwaĩbuwẽ nuikĩ Deus hatu yukashũkubainikiaki, na hãtxarã

3Hawẽtxaĩs matukiri xinãkĩ matuwẽ taeshũ ẽ Epa Deus ẽ kẽwãkubaĩmiski. 4Hanushũ habe hãtxai benimakĩ matu dasibikiri ẽ matu yukashũkubaĩmiski. 5Deusũ kakape hawẽ bakekiri matu anu hiki taeshũ ẽ matu yusĩa nĩkakĩ ikũwãtã ebetã txibãkĩ ea merabewanishũ hawa heneama natiã mã apakeaii. 6Eã ẽ matukiri xinãnã, haska Deusũ hawẽ daya matu anushũ taewanishũ haska abuai keska mã ikũwaĩ Jesusũ matu hiwemakubaĩkĩ niti akama matu pepa wakubaĩshanikiki, hanu Jesus Cristo txĩtũkiranaitianã. 7Txanima eã ẽ matukiri pe xinaĩnã, matuwẽ nuikĩ ẽ matu abuhairaii. Maturi dasibi mã ewẽ nuiaya Deusũ matuwẽ ea duawaikiki. Natiã ea bitximabu keska nia shanẽ ibubu bebũ hawa hatũ yunutikiri ẽ hãtxaisma eska besti yui ẽ txakabuisma pekiri hãtxai Deusũ kakape Jesus Cristokiri hatu unãmakĩ hakiri shabakabi ẽ txanikũkainaya mã ea merabewai ebetã teneai keskakubaĩkanaii. 8Haska inũ, matube dasibi haibunaĩ nũ pekubainiburã, Deusũ nuku unaĩkiki, Jesus Cristõ nui duapa ea inã ẽ matu ashuniwẽ taea matukiri ẽ hakimaismaki. 9Deus yukakĩ matu ea ashũkinã, hau hawẽ nui itxapawẽ matu ewawakĩ hau apakenũwẽ, heneamarã. Haska wakĩ Deusũ matu unãnepa wakĩ nĩkanika hau matu wakubainũ, iwanã, ẽ matu yukashũmiski, 10haska pepa besti abuai mã katukubainũbunã. Haskai hiwekĩ matũ hiwea shũpĩ hawa txakabuma ewakaini hawa txakabuki huti ika keskama nukũ Shanẽ Ibu Cristo huriamakẽ mã pepa hiwekubaĩtirubuki. 11Ha dikabi matu mã hatu bebushunaibunã, Jesus Cristowẽ taeshũ hawara pepa mã akai tsuabũra uĩkĩ Epa Deus duawakĩ kẽwãshãkanikiki.

Paulõ Jesus Cristõ kakape yusĩkubainikiaki, na hãtxarã

12Ẽ betsabu inũ ẽ puibuũ, ẽ bika betsa betsapa teneai anu bebirã bebiranaibu txanima kayabi haska yura betsa betsapabũ Deusũ kakape Jesus Cristokiri nĩkabirãbirãmisbukiri matu yuinũ nĩkakãwẽ. 13Haska Roma shanẽ ibũ hatu binũatũ hiwe ewapa hawẽrua anuabu soldadobũ ea mekemisbu inũ yura betsa betsapabũ ea uĩkĩ hanu ea pewayamabu anushũ Cristokiri kakape ẽ hawẽ hãtxa txaniai dasibibũ ea nĩkamisbuki, ha meketi hiwe anu ẽ hiwe anushunã. 14Na ea nenu eska wayamabu ewẽ dateama itxapabũ Cristo ikũwãkĩ hawẽ kakapewẽ benimakĩ dateama huĩti kuxitã nukũ Shanẽ Ibuki txiti itã Deusũ kakape hatu yusĩkubaũkanikiki.

15Huni betsa betsapabu hatũ huĩti pepa hayabu Cristokiri yura betsabu ikũwãmanũ, iwanã, pe yusĩkanikiki. Hakia hatiritũ ea binunũ ika eki sinatai keĩ pashkatã yusĩnanãriakanikiki. 16Txanima nenushũ Deusũ bakekiri ẽ pe yuikubainũ Deusũ ea nenu yunuyamakẽ habu ewẽ nuikĩ ha Cristokiri daya ẽ henebiranima habũ ea merabewakĩ kakape datã akĩ heneama yusĩbaũkanikiki. 17Hakia hatiritũ akinã, anikabia kẽkĩ mestẽwãtã akama pepabiakĩ ea binunũ ishũ habũ haska wakĩ ea ana bika tenemakubaĩkanikiki. 18Haskaibuwẽ taearã, earã, ẽ hatuwẽ nui ẽ hatuki sinatamaki, xinã pepawẽ txaniaibu kasmai xinã pe mirĩwẽ Cristokiri kakape txaniaiburã. Haskabaũkĩ ea benimawakanikiki.

Ẽ benima keyuriamarã, 19mã ea Deus dayashuniwẽ taea tsuki ẽ dakeamaki, hatũ ea mekeawẽ taearã. Haskakẽ tsuabũra berubi hawa hakiri dakeama natiã ẽ hiweawẽ inũ ẽ mawashũshanaiwẽ Cristo kuxipahaira ewẽ dasibibu ẽ hatu uĩmayukatsis ikaii. Haskawẽ taeshũ Jesus Cristõ Yushĩnĩ ea merabewakĩ ea kaĩmashanai xinaĩ ẽ benimakũkainaii. 20Haska inũ, Deus dayashuni tsuki ẽ dakeamaki, hatũ ea mekeawẽ taearã. Haskakẽ tsuabũra berubi hawa hakiri dakeama natiã ẽ hiweawẽ inũ ẽ mawashũshanaiwẽ Cristo kuxipahaira ewẽ dasibibu ẽ hatu uĩmayukatsis ikaii. 21Natiã ẽ hiweyuarã, Cristo ẽ hiweshũyukũkainaii. Hakia hawẽ taea ẽ mawarã, ẽ nenu hiwemis binuaki. 22Na ẽ yurawẽ ẽ hiweyukũkaĩkinã, hawẽ dayakĩ yurabu itxapa ẽ hatu ikũwãmatiruki. Haskakẽ ha dabe ẽ katutirumahairaki. 23Eã ibubis haska dabe ẽ katuarã, bikahairaki. Ẽ xinãnã, mawatã ẽ Cristobe ma hiwei kai pehairaki, enarã. 24Hamẽ betsarã, matu merabewayunũ ika ẽ hiweyuarã, peyuaki. 25Ẽ haska matukiri xinaĩwẽ taea haska mã Jesus Cristo txibaĩkiri matu merabewakĩ matu benimawakatsi iki ẽ matube ana hiweyui katiru ẽ xinaiĩ. 26Matu anu ana haska kaĩxĩshũ ẽ matu yusĩayã ewẽ taea benimai mã tse ishanaii, Jesus Cristo kẽhairawairã.

Jesus Cristo ikũwaĩ bika tenetikiri Paulõ hatu yusĩnikiaki, na hãtxarã

27Natiã mã hiweairã, Deusũ hawẽ bakekiri kakape unaĩ haska hiwekũkaĩtikiri benai na keska bestiwẽ hiwekubaĩkãwẽ. Haska ẽ matu uĩkatsis ikai inũ matu anu ẽ kamakẽ matukiria matũ kaka huai ẽ matukiri nĩkakatsis ikaii, haska mã txĩtuãma inũ mã ma dasi keyushũ bika tenebiai heneama matũ xinã kuxipawẽ ikũwaĩ mã Jesus Cristo txibaĩbunã. 28Habu matuki sinataibuki e iki dateyamakubaĩkãwẽ. Habu matuki haskabiaibũ mã pe hiwekĩ hatu uĩmakubaĩmiswẽ taeshũ Deusũ hanu shabakabi hatu kupikĩ habiatiãri matu besti mekeshanikiki. Deusũ haska wakĩ shabakabi hatu unãti wamashanikiki. 29Deusũ hawẽ pepawẽ matu kenakĩ katushũ ikũwãmanirã, ha besti ikũwaĩ pepa bestitimaki. Habiaskariai Cristowẽ bika mei nuitapariatiki. 30Haskakẽ ea inũ maturã, nũ bika tenekanaii. Haska uatiã ẽ ikai mã uĩnirã, na habiatiãri Cristo dayashũkĩ hamapai bika betsa betsapa ẽ tenekubainai mã ekiri nĩkakubainaii.

Currently Selected:

Filipenses 1: cbsBR

Highlight

Copy

Compare