Hebreus 2

Hawẽ pashati kayabi danaĩnã, mesekiaki, na hãtxarã

1Deusũ bakẽ nai tsumabu binuatũ hamebi hatu yusĩni haskakiri hãtxa nũ nĩkanirã, ana hakiri nĩkahairakubainãkãwẽ, ha henetã bai betsawẽ nũ buyamanũbunã. 2Ha inũ, hawẽ nai tsumabu hãtxamakĩ uatiã Deusũ hawẽ hãtxa hawẽ nai tsumabuwẽ hatu yusĩmapauniki. Ha Deusũ yunuti inũ hawẽ nemati kuxipa hayaniburã, tsuãra nĩkakĩ txibãma txakabu waibu hawẽ taeshũ hawa kaneama Deusũ hatu kupikubainiki. 3Uĩwẽ. Ha dukũ nukũ Shanẽ Ibũ hamebi hawẽ pashati hakiri ibubis bebũkiri txani taeniki. Hanushũ nuku yubakĩ tsuabũra hakiri nĩkai txanima Deusũ hãtxa nũ unãkubainibuki. Nukuburã, hawẽ pashati ewapa txanima hubianikẽ mekei peama hiwe kayabikatsi ikamarã, haskatã ibubis nũ pashatirubumaki.

Deusũ bake nukũ yura keska iyunikiaki, na hãtxarã

4Ha inũ, hawẽ Yushĩ Pepawẽ hawẽ e imakĩ unãmati damiwamakĩ na yuba bena Jesusũ tsumabubetã Epa Deusũ hatu mestẽwãmaniki. Haska wanishũ hawẽ xinãnẽ nuku tibi hawẽ daya betsa betsapa nuku inãmiski, haska xinaĩ keska nuku tibi inãkinã. 5Bawaitiã na mai anu Deusũ damiwani anu yurabu hiwebaũshanaibu anushũ hau Deusũ nai tsumabũ yunuyamashanũbũ Deusũ hanu hatu yunuama iniki, na haskakiri nũ hãtxairã. 6Hamẽ kene betsa anushũ Davĩ shabakabi wakĩ yuini matu yuinũ nĩkakãwẽ:

“Nũ yurabu hawauma keskabiakẽ

haska mĩ nukuwẽ nuimis ẽ xinãmiski.

7Mĩ nai tsumabu hatu kuxipa watã

yurabu hatu kuxipa inãkĩ mĩ hatu beshmas wayuniki,

dasibi mĩ damiwani

hatu ibuwamayukĩ hatu duawakinã.

8Haskakẽ dasibi hau mekekubaĩshanũbũ mĩ hatu yununiki”,

aniki. Haskabiakẽ mai hirabi damiwani hau hawẽ shanẽ ibushanũbũ Epa Deusũ hatu yuba keyubiani yurabũ dasibi ibuwai shanẽ ibuaibu nũ uĩriamaki. 9Nai tsumabu kuxipa keskama Jesus kuxipa beshmas keska wayutã Deusũ hawẽ nui nuku uĩmakĩ Jesus tashnimatã hau dasibibuwẽ taea mawatã bestẽnũ Deusũ yunua haska txibaĩ nuitapatã mawatã binuniwẽ taea natiã Jesus kuxipahaira dasibibu binua hawẽ ibu dapi ma tsauwa nũ unaiĩ.

10Deusũ dasibi damiwakinã, hawena aniki, hawẽ kuxipawenã. Haska abuai keska dasibi hawẽ bakebu hawẽ kuxipayari hau habe hiweshanũbũ haska xinãkĩ Deusũ hawẽ bake Jesus Cristo nuitapawakĩ dasibi menemakĩ nukũ mekenika nuku washuniki. 11Dasibibũ nũ Deus abukĩ txibaĩburã, nukũ Epa Deus meribitũ nuku hawẽ bakebu wakĩ nuku meribi wamiski. Haskawẽ taea hawẽ bake Jesus Cristo nukuki dakeama nuku kenakĩ: “Ẽ betsabuki”, ikĩ nukukiri yuimiski. 12Deusũ hãtxa yuishunikatũ Deusũ Messias tashnimashanaikiri yuikĩ:

“Ẽ betsabu inũ ẽ puibu anushũ

mĩ ẽ Deus mia kẽwãkĩ

mikiri nawakĩ ẽ hatu unãmakubaĩshanaii”,

iniki. 13Hanua kene betsa anushũ yuikĩ:

“Eãri mĩ ẽ Deus ẽ mia ikũwãkubaĩshanaii”,

iwanã, ana yuikĩ:

“Habu Deusũ hawẽ bakebu ea inãtã

ea hatu mekemanibe ẽ hatube nenuki”,

iniki.

14Hatũ ibubũ hatu bake bikĩ habias nami inũ himi haya wamiski. Haska keskariai Jesus damiriatã tashninũ ika yurabũ nami inũ himi keska biniki. Haska bitã hawẽ hatu tenãmis kuxipa diabo Satanás haya maemakĩ binũtã hatu meshpamanũ ika hawẽ yurawẽ Jesus yurabu mawashuniki. 15Ha mawaiwẽ hatu haska washũkĩ habu mawaki datei hiwekubaĩmisbu dasibi Jesusũ nũ habũ ikũwaĩbu ana hawa mawaki datetima nuku washuniki, bai txakabu pewakĩ akawakinã. 16Haskawẽ taea txanima nai tsumabu merabewanũ ika huama hakia Abraãonẽ Deus ikũwãpauni keska hawẽ bababu merabewanũ ika Deusũ bake huniki. 17Hawẽ betsabu inũ hawẽ puibu keskatã hatũ yura bitã Deus dayashuni ha bebunua hawenabu hãtxashunika binua inũ ika hawẽ yura Deus inaĩ mawai hawa txĩtuãma pepa duapa iniki, yurabu Deus hatuki sinatamis hatu merabewakĩ hatũ txakabu buashunũ ikarã. 18Hanushũ Deusũ bake unãti wanũ ishũ Satanásã parãpanã Jesus ibubis yumãkĩ binũ keyuniwẽ taeshũ natiã tsuabura Satanásã parãriai Deusũ bakẽ nuku merabewariatiruki.

Currently Selected:

Hebreus 2: cbsBR

Highlight

Copy

Compare