Hebreus 1

Natiã Deusũ hawẽ bakewẽ hawẽ hãtxa nuku unãmanikiaki, na hãtxarã

1Hãtxa pepa ẽ matu bumai uĩkĩ nĩkairakãwẽ. Ha dukunã, nukũ shenipabube Deus hãtxairã, hawẽ hãtxa yuishunika tibiwẽ hawẽ hãtxa hatu yuimakĩ hawẽtxaĩs hatu yusĩkĩ betsa tibiwẽ tashnimakĩ hatu yuikubainiki. 2Haska wabiakubaĩkĩ hawẽ bake kuxipa watã mai hirabi dasibi damiwamanishũ dasibi ibu wamanishũ natiã hawẽ henekĩ hawẽ huni bake hãtxamakĩ Epa Deusũ hawẽ hãtxa nuku unãmaniki. Haskakiri matu ana yusĩnũ nĩkakãwẽ. 3Hawẽ Epã kuxipaya txashakapa hawẽrua keskaritũ dasibi betsa betsapa damiwani hawẽ hãtxa kuxipawẽ mekekubaĩmiski, hau hawa benuyamanũbunã. Ha inũ, hawẽ Epa nuku daewashuni mawakĩ nukũ txakabu buatã hawẽ Epa kuxipahaira dasibi binu keyuatũ yusiuri tsauwa nai anua ma habe shanẽ ibukũkainikiaki.

Deusũ bake pepatũ nai tsumabu binu keyunikiaki, na hãtxarã

4Hau Jesusũ dasibibu yunu keyukubaĩshanũ Deusũ yuikĩ: “Narã, ẽ bakeki”, akĩ nai tsumabu dasibi hatũ kuxipa binumaniki, hawẽ kena tushkutima inãkinã. 5Deus hawẽ bakekiri hãtxani matu yuinũ nĩkakãwẽ. Deusũ hawẽ nai tsuma betsa yuikĩ:

“Mĩ ẽ bakeki”,

akĩ betsa yuitaskama inikiaki. Hakia hawẽ bake bestikiri hãtxairã, eskaniki:

“Mĩ ẽ bakerã,

natiã ẽ hiwea mia inãkĩ ẽ mia yunuaii”,

aniki. Ha inũ, hawẽ nai tsumabukiri haska yuiamabia hawẽ bakekiri yuikĩ:

“Earã, ẽ hatũ epa ikũkaĩshanaii, hawenarã.

Harã, ẽ bake ikũkaĩshanikiki, enarã”,

Deusũ arianiki. Hakia hawẽ nai tsumabu hawẽ bakebumawẽ taea haska hatu yuitaskama iniki. 6Kene betsa anushũ hawẽ bake bestitxai nukũ Hutxi Kayabi Iuwa yurabube hiwemashanaikiri hatuki txanikĩ yuikĩ:

“Hau dasibi ẽ nai tsumabũ ẽ bake duawakĩ kẽwãriashanũbũwẽ”,

arianiki. 7Hakia hawẽ nai tsumabukiri yuikĩ:

“Ẽ daya hau ea ashunũbũ

niwe birenepa inũ txi here kuxipa keska wakĩ

ẽ nai tsumabũ hau daya betsa betsapa ea habuã ashũkubaĩshanũbũ

ẽ hatu yununiki”,

anikiaki. 8Hanushũ hawẽ bakekiri yuikĩ:

“Deusuũ, mia shanẽ ibuirã,

mĩ ea keska shanẽ ibui ikibi ipakeshanaii,

shanẽ ibui hawa txakabu hayamarã.

9Hawara pepa abukĩ hamapai txakabu mĩ danãmisrã,

mĩ haskamiswẽ taeshũ ea ẽ mĩ mekenika Deusũ ẽ mia katuaki.

Sheni mashu akĩ unãti wakĩ ẽ miwẽ benimaii,

mĩ haibuaibu keskawama hatu mia binumakinã”,

aniki. 10Ana hawẽ bake yuikĩ:

“Shanẽ Ibuũ, hawa hayamahairabiakẽ

mianã, damiwakĩ taewakĩ nai inũ mai hirabi ibubis mĩ damiwaniki.

11Miarã, hawa betsama mĩ ipakeshanaii.

Hakia mĩ dami wanirã, keyushãkanikiki, tari txukai keskairã.

12Tari katũkĩ akawamisbu keska wakĩ

dasibi tsuãra tari pekatã betsa sawemis keska wakĩ

nai inũ mai mĩ ana bena washanaii.

Hakia miarã, maei mĩ betsatirumahairaki,

mĩ hiwea keyuisma mĩ hayarã”,

aniki. 13Hanushũ Deusũ hawẽ nai tsumabu betsa eska hatu yuitaskama iniki:

“Miki sinatakĩ mia danaĩbu kupikĩ

ẽ hatu mia maemakĩ keyumariama manai ẽ yusiuri tsauyuwe”,

aki hawẽ bakekiri besti hãtxanikiaki, hawẽ nai tsumabukiri yuiamarã. 14Ha inũ, Deusũ hawenabu kayabi habũ hiwea ikibi ika bitã nũ pashashanaibu nuku yauxikĩ hawẽ nai tsumabũ hau nuku mekekubainũbũ Epa Deusũ hatu yunukubaĩmiski. Dasibi Deusũ nai tsumaburã, yushĩki, habũ Deusũ daya ashũmisburã.

Currently Selected:

Hebreus 1: cbsBR

Highlight

Copy

Compare