Hebreus 3

Moisés pepabiakẽ Jesusũ binunikiaki, na hãtxarã

1Nuku haska wakubainaiwẽ taea ẽ betsabu inũ ẽ puibuũ, nũ ikũwãshanũbũ Deusũ nuku kenakĩ katuniwẽ taea nũ hawenabuki. Haskakẽ Deusũ hawẽ bake hawẽ kuxipaya yununika wakĩ ha Deusbe nuku hãtxashunika Shanẽ Ibu Jesus Cristo dasibi betsabu hatu binunirã, ha besti xinãkubaĩkãwẽ. 2Deusũ nukũ shenipabu shanẽ ibu Moisés hawara yunua kaneama txibãkĩ Deusunabu mekekubainikiaki. Hanua Jesusri katunishũ hawẽ daya yunua Jesusũri kaneama txibãkĩ hawenabu kayabi nuku mekeriakubainikiki, Moisés binukinã. 3Hamẽ tsuãra hiwe bena pepawakẽ hawẽ hiwe kẽwãbiakĩ hawẽ ibu ha hiwe binumakĩ kẽhairawariamisbuki. Ha keska wakĩ Deusũ Moisés kẽwãbianikẽ hawẽ bake Jesusũ Moisés binunikẽ Deusũ ha binumakĩ kẽhairawakubainikiki. 4Ha inũ, hunibũ damiwakĩ hiwe inũ mabu wabiamisbũ hatu binukĩ nai inũ mai hirabi Deusũ hawẽ bakebetã damiwaniwẽ taeshũ yurabu hatu binua nũ unaiĩ. 5Hamẽ dasibi Deusũ ani txipu nũ nĩkashanai Deusũ enabu hawẽ hãtxa Moisés hatu yuishuni txibãbianirã, hawẽ tsuma besti iniki. 6Hakia Cristorã, txanima hawẽ bake kayabitũ Deusunabu mekei Deusbe hatu hãtxashuni kaneismaki. Haskakẽ Cristo ikũwãkĩ txibãkĩ xinã betsa wama nũ mestẽtã benimakĩ nũ manaibu Jesusũ nuku benubainama ishanikiki.

Deusũ enaburã, Deus anu huĩrukũti hayakiaki, na hãtxarã

7Haskawẽ taeshũ Deusũ Yushĩ Pepatũ hawẽ hãtxa yuishunai txanimani matu ana xinãmakĩ yuinũ nĩkakãwẽ.

“Natiã Deusũ hãtxa matũ mã nĩkaiburã,

8matũ huĩti kuxiyamakãwẽ,

nukũ shenipabu hanu tsua hiweabumanushũ

Deus nĩkama danãkĩ unãti wamakĩ sinatamanibu keskakinã.

9Ha inũ, hanu tsua hiweabumanushũ

ẽ kuxipawẽ hatu e imakĩ

unãmati dami 40 ano ẽ hatu ima atãbiranai uĩbiakĩ

ẽ hãtxa nĩkama ea unãti wakĩ

matũ shenipabũ ea sinatamakubaunibuki.

10Ha yurabũ ea haska waibu hatuki sinatakĩ hatu yuikĩ:

‘Ẽ xinã abukĩ unãti wakatsi ikama danãkĩ

hatũ huĩti pepariabumã hatũmebi benui mapuabuki’, iki

11haskawẽ taea hatukiri yubai:

‘Ẽ hatuki sinataiwẽ taea

hanu mai pakea pepa ẽ hatu yubabiani anu hau hikiyamashanũbũwẽ’ ”,

ika Deus yubakaniki.

12Haskawẽ taea ẽ betsabu inũ ẽ puibuũ, matũ huĩtinĩ txakabu xinãkĩ ana ikũwãti kuxiwama txĩtũtã Hamebi Hiwemis Deus henebaĩkatsi ikama matu tibi ibubis mekekĩ xinã pewarikubaĩkãwẽ. 13Haskama matuburã, haska Deusũ hãtxa natiã txaniaya natiã besti matũ xinã mã hawaira pewatirubuki. Haskawẽ taea manama benimarabe bestinãkãwẽ, bari tibirã, hau tsuã taska betsa matu parãyamanũbũ inũ txakabũ matu meshtea txĩtuĩ matũ huĩti mã kuxiyamanũbunã. 14Cristobe hiwekatsis ikĩ hawẽ kakape nĩkatã nũ ikũwãkĩ taewanirã, betsa wama habiaskas hakiri xinãkubainãkãwẽ.

15Deusũ hãtxa hawẽ Yushĩnĩ matu yuikĩ:

“Natiã Deusũ hãtxa matũ mã nĩkairã,

matũ huĩti kuxiyamakãwẽ,

matũ shenipabu hanu tsua hiweabumanushũ

Deus nĩkama danãkĩ unãti wakĩ sinatamanibu keskakinã”,

iniki.

16Tsuabũ animẽ, Deusũ hui nĩkabiatã txipu sinatamakinã? Habu Moisés Egito mai anua dasibi hatu pashawanibu habũ anibuki. Xinaĩrakãwẽ. 17Tsuabuki inimẽ, 40 ano Deus hatuki sinatairã? Hanu tsua hiweabumanushũ Deus nĩkama hatũ txakabuwẽ hatu kupia mawakubirãkĩ imanibuki. 18Ha mae pepa Canaã anu Deusũ hatu yubai hatukiri hãtxai: “Ẽ hatu hanu hikimatã hatu huĩrukũmamashanairã, habuã ẽ hãtxa nĩkama danaĩburã, habu hikiama ishãkanikiki”, iniki. 19Txanima Deusũ hãtxa ikũwãkĩ txibãkatsi ikama habu hikiabuma inibu haska hatukiri nũ unaiĩ.

Currently Selected:

Hebreus 3: cbsBR

Highlight

Copy

Compare