Zɛkɛrâya 10
10
Yâwɛɛ è ŋuŋ-maa-ƃô kono-tee kɛ̀
1Yâwɛɛ marê kɛ́ tuna mɛ̂ni ma a fólo-laa-ƃoɔɔ, ǹúui a gɛ̀ tuna kpîni é tóo gɛ́ gɛ̀ ya-kpôloŋ kɛ́ tɛ̀ɛ núu kélee ŋɔkpâlaŋ ŋá. 2Tɛli kpɛ́-ƃela da ƃoo lôno kɛ̀, ǹyaŋ mɛni ƃóɔɔ nàa-tuɛ-ƃelai díkɛ lɛ́ɛ kɛ̀. Zee-wôo ƃó-ƃelai díkɛ lɛ́ɛ see-woo ƃò, díkɛ núu ŋánɛnɛ-woo ƃò kpɛ́ni-kpɛni. M̀ɛni ma ǹûai da pù lɔ̂ɔi yɛ̂ɛ ƃála-ŋa dímaa tée-têɛɛ, kpɛ́ni fêi, dímɛi-káa-nuu fé ma. 3Yâwɛɛ è mò ǹyɛɛi, “Ńii ŋwânai m̀ála-mɛi-káa-ƃelai dîa, ǹyaŋ ŋá pâi tɔ̂ŋ kpɛ̂i ǹúu-ŋuŋ-tuɛ-ƃelai dîa kpɛ́ni fêi, Ńyãai a Ŋ̀wála-wâla kélee Yâwɛɛi, Ŋ́gbaaŋɔɔ̂i ŋáƃala-ŋai mɛni ma Zuda lɔii su, ǹyaŋ ŋa pâi díkɛ̂i yɛ̂ɛ ŋákɔkɔ-sôo-ŋa. 4Bɛ́rɛi zônoŋ-su-kɔni a pâi kulâi dísama, kêre-pîlaŋ-wuru da kɔ́kɔ-keraŋ, núu-mɛi-ƃela kélee da pâi kulâi dísama. 5Díkelee púɔɔ gîe ma, da pâi kɛ̂i yɛ̂ɛ kɔ́kɔ-ƃela támaa, díkɛ ƃɔ̀rɔŋ díkpɔara-ƃelai mɛi gɔ́li-ŋai loai bârai su. Da pâi kɔ́ kɔ̂i, kpɛ́ni fêi, Yâwɛɛ káa dípôlu, ǹyaŋ da pâi diai yée mɛi ɣâlei díkaa gɔ́kɔ-sôo-ŋai mɛi.
6“Ŋa pâi Zuda-ƃelai su kpananîi,
ŋá Zosɛ ŋɔpɛ́rɛi mu-ƃelai ƃálo.
Ŋa pâi pâi a dîa pôlu,
kpɛ́ni fêi, ŋá dímalôŋ kàa.
Ǹyaŋ da pâi kɛ̂i yɛ̂ɛ ǹyaa ƃe fé ńyee kula ní dímu.
Ńyãa ƃa Yâwɛɛ Díɣâlai, ǹyaŋ ŋa pâi díwoo su toôi.
7Ǹyaŋ Ifiraŋ a pâi kɛ̀i yɛ̂ɛ kɔ́-kuluƃa wála-wâla,
ǹyaŋ dílii a pâi nɛ̃ɛ̂i yɛ̂ɛ berei núu líi a nɛ̃̂ɛ la ŋwã̂ai mai.
Mɛnii ŋí a pâi lɛɛ̂i dílônii kíli ŋá,
ǹyaŋ dílii a pâi nɛ̃ɛ̂i Yâwɛɛ ŋɔkpɔŋ-mâai mɛni ma.
8“Ŋa pâi dítôli,
ŋá pá a dia.
Ŋa díŋuŋ maa ƃôi,
ǹyaŋ da pâi kɛ̂i a dítamaa yɛ̂ɛ berei dí kɛ̀ la a bɔlɔi.
9Berei máŋ ŋá dítàa-taa la ǹɔii ŋuŋ-ŋai sui,
berei máŋ díkaa ǹɔii su kôyaa-ŋai sui,
da pâi díkili ŋá siâi é pîlaŋ ḿâ.
Ǹyaŋ da pâi lɛɛ̂i a dífulu dí léne pôlu da dílônii.
10Ŋa pâi díkulâi Ize da Asiria ŋá pá a dia dípɔ-taai,
ŋá dísee Gilia-lɔii su da Lɛƃanɔŋ-lɔii su máŋ.
Ǹɔii láa a pâi fɛɛ̂i a núu-kpune
é lɛ́ɛ la zu núu-seêi fa ŋɔ́nɔ kɛ̀ naa.
11Da pâi tɛɛ̂i dímɛni kpɔ̂lu ya-leei su.
Ǹyái ŋɔzigɛ-zigɛi ŋá a pâi yenîi.
Ǹâai Ya-leei zinîi kélee a pâi kpâlai.
Asiria ŋɔyoŋka-téɛɛi ŋá a pâi yenîi,
ǹyaŋ Ize ŋɔwála-wâla-laai a pâi kpɛɛ̂i.
12Ŋa pâi díkponôi kpananîi,
ǹyaŋ dífolo-laai maa a pâi tɛ̂i ńaai su.”
Yâwɛɛ ƃé mò.
Currently Selected:
Zɛkɛrâya 10: KWB
Highlight
Copy
Compare
Share
Want to have your highlights saved across all your devices? Sign up or sign in
