Zɛkɛrâya 11
11
Zɔnyɔ̂ŋ-ƃelai da pâi toôi
1Lɛƃanɔŋ-ƃela, ka kálɔii ŋɔsiɣãŋ-ŋai láa ƃó a gɛɛ ŋɔŋ é káwolâ-ŋai kéreŋ. 2Wúru-ŋa, ka wɔ́lɔ, kpɛ́ni fêi, da ŋ̀olâi pɔ̂ŋ, ǹyaŋ ŋ̀úru lɛ́lɛɛ-ŋai su a kara! Basãŋ lɔii su wúru-ŋa ka wɔ́lɔ, kpɛ́ni fêi, da ŋ̀olâ su kpíniɛɛi pɔ̂ŋ! 3Ka ǹúu-mɛi-ƃela wɔ́lɔ-wôo mɛni, kpɛ́ni fêi, dínîa kɛ̂i su a kara!
M̀ála mɛi-káa-ƃela feerɛi
4Yâwɛɛ, Ŋáɣâlai è mò ḿâ ǹyɛɛi, “M̀ála-ŋai mɛi káa, da pâi dípaâi. 5Diai da m̀ála-ŋai tí yà dí dípaai, dífa tɔ̂ŋ kpɛ̀ dîa. Diai da zuai kɔ̂lɛi, da mò dîyɛɛ, ‘Lûwa káa Yâwɛɛ ma, kpɛ́ni fêi, kwa tɔɔ!’ Kpɛ́ni fêi, malôŋ kâa fé dímɛi káa-ƃelai yêei.” 6M̀ɛni ma Yâwɛɛ è mò ǹyɛɛ, “Fé pâi ŋɔ́nɔ núu-kpune malôŋ kâai ǹɔii ma ƃɛ́. Gáa, ŋa pâi gɛ̂i núu-kpune é mɛni-sôli káa díkîe-ni yêei, dí mɛni-sôli káa dímɛi káa-ƃelai yêei dí ŋɔ́nɔ gáa gâloŋ yêei. Ǹɔii a pâi karâi, ǹyaŋ fé pâi núu tɔnɔ kpîŋ kula yêei kɛ̂i.” 7Diai m̀ála-ŋai yâ díkɛ díkɔ̀lɛi, dí ńdòli a gɛɛ ŋá kɛ́ a m̀ála-ŋai mɛi-káa-nuu díkɛ liî dípaâi. Nya ƃe ŋá wúru kpua feerɛ sìɣe ŋá dɔnɔi tóli a ƃɛlɛ-sêe, ŋá dɔnɔ tóli a kɛ-zu-tɔnɔɔ. Ǹyaŋ ŋá m̀ála-ŋai mɛi kâa. 8Ŋá m̀ála-mɛi káa-ƃela saaƃa su kàra ɣâloŋ tɔnɔ yée mu. Ḿvii è kpɛ̀ɛ m̀ála-ŋa mɛni ma, diaŋ dí ŋ́gbɔara. 9M̀ɛni ma ŋá mò ńyɛɛi, “Fé pâi ŋɔ́nɔ kɛ̂i a kámɛi-kaa-nuu. Nyii maa nɛ̃ɛ̂i é sáai, tɔ́ɔ é sáa. Nyii maa nɛ̃ɛ̂i zu é karai, tɔ́ɔ zu é kara, tɔɔ dí díkîe-ni su kara.” 10Nya ƃe ŋá Ŋámaloŋ-kâa wuru kpuai sîɣe ŋá zu ɣále, ŋá ŋákono-têei su kara nyii ŋá gɛ̀ núu kélee mɛni mai. 11M̀ɛni ma gono-têei su è kàra a maa ɣêlei tí. Diai kɛ̀ m̀ála-ŋai yâi díkɛ díkɔ̀lɛi, dí kɛ̀ ŋ́gâai, dí nâa gɔ̀lɔŋ a gɛɛ gáa a Yâwɛɛ ŋɔwóoi. 12Nya ƃe ŋá mò dîa ńyɛɛ, “À kɛ̀ ká gɔ́lɔŋ gáa tí, gɛ̀ ní ka ḿvela-fé, kɛ́lɛ à kɛ̀ vé tí, gɛ̀ ní é lɛ́ɛ naa.” Nya ƃe dí ŋáfela-fêi kɔ̀ɔŋ ŋɔwuyɛ kɛ́ ƃò a káne kpua-kpua buu saaƃa ŋɔwuyɛ. 13Nya ƃe Yâwɛɛ è mò ḿâ ǹyɛɛ, “Bú Ŋ̀ála-pɛrɛ Kɛ́tɛi ŋɔsɛŋ-kao lâai-kɛ́-kwaai ma nyii dí ḿvela fè lai.” M̀ɛni ma ŋá lì la Ŋ̀ála-pɛrɛ Kɛ́tɛi ŋɔsɛŋ-kao lâai-kɛ-kwaai ma. 14Nya ƃe ŋá ŋáwuru kpua veerɛi sìɣe da dòli a kɛ-zu-tɔnɔi, ŋá zu ɣále, ǹyaŋ nao-laai kɛ̀ Zuda da Eezuɛ loai zu è kàra. 15Nya ƃe Yâwɛɛ è mò ḿâ ŋɔ́nɔ ǹyɛɛi, “M̀ála mɛi-káa-nuu nyɔ́mɔɔi ŋɔtíi-kɛ-sãai síɣe ŋɔ́nɔ. 16M̀ɛni ma, gáa, ŋ́gaa ƃála mɛi-káa-nuu tɛɛ̂i ǹɔii su nyii vé pâi kpáanîi diai mɛ̂ni ma da saai, kpaa máŋ é kpáaŋ diai mɛ̂ni ma díkaa lânii, kpaa máŋ é diai ƃálo pála káa dîa, kpaa máŋ é kpáaŋ diai mɛ̂ni ma díkɔlɔ̂i ponoɔ̂i, kɛ́lɛ a pâi gbaya-kpaya-ŋai paâi é dísôlo táa-tâa. 17Kpalo ƃelaâi ŋáƃala-mɛi káa-nuu nyɔ́mɔɔi ma nyii a m̀ála-ŋai lɛ̂ɛi! Tɔ́ɔ ƃóa-sɔkpɔi é ǹyee dɔnɔ tée ma é ǹáa-mii-yee-mɛi ŋɛi wólo! Tɔɔ ǹyée dɔnɔ é sáa ma, ǹáa-mii-yee mɛi ŋɛi é pú!”
Currently Selected:
Zɛkɛrâya 11: KWB
Highlight
Copy
Compare
Share
Want to have your highlights saved across all your devices? Sign up or sign in
