Zɛkɛrâya 9
9
Ǹɔii-ŋûŋ-ŋai dímɛni ŋa-teɛɛi
1Yâwɛɛ a pâi tɔ̂ŋ pûi Adura-lɔii ma da Dɛmɛika taa-leei. Kpɛ́ni fêi, daa-lêe-ŋai kélee díkaa Araŋ lɔii sui, díkaa a Yâwɛɛ pɔ́ɔ yɛ̂ɛ berei zîi-ŋai kélee díkaa Eezuɛ-lɔii sui díkaa la a bɔ́ɔi. 2Ama máŋ nyii gáa gɔyaŋ pere mai, Taya da Sidɔŋ-ƃelai berei máŋ dítareɛ̂i lai, Yâwɛɛ pɔ́ɔ ƃa dîa. 3Taya-ƃelai dí siɣãŋ tînaŋ dí-taai ma dí káne da gôo ŋá tɛ́ gîe ma yɛ̂ɛ muluŋ. 4Kɛ́lɛ Kúnuu-namui a pâi gɔ̃̂liŋ kélee kulâi ǹyêei é gélee píli yúo su é daa-lêei kéreŋ kpɔ́ kpɔlɔwɔ.
5Asikɛlɔŋ taa-leei a pâi gâai é yao. Ǹyaŋ Geza taa-leei líi a pâi sɛ̂lɛnii, Ɛkulɔŋ-ƃelai máŋ díkili-kɛ-zui é kpɛ́ɛ. Geza kaloŋ a pâi saâi, núu fé pâi lɛɛ̂i Asikɛlɔŋ taa-leei su. 6Yâwɛɛ è mò ǹyɛɛi, “Sîi támaa da pâi seêi Asɔdɔ. Ǹyaŋ ŋa pâi Felesia-ŋai díyoŋka-teei kperâi. 7Ŋa pâi dísua ŋãa miɛɛi kperâi da dí tĩ́ya-ŋai miɛɛ. Diai pâi lɛɛ̂i pôlui da pâi kɛ̂i máŋ a ḿbɔɔ, da pâi kɛ̂i yɛ̂ɛ Zuda ŋɔsuui su-ƃelai da, ǹyaŋ Ɛkulɔŋ a pâi kɛ̂i yɛ̂ɛ Zɛbusi-ŋai. 8Ŋa pâi siɣãŋ tínanîi ŋápɛrɛi ma ŋ́gɛ nàa mɛi kâa a gɛɛ kɔ-kûluƃa da fé lɔ̀ naa. Ŋwana-lɔ̂ɔ-nuu fé pâi ŋɔ́nɔ pɛlɛ̂i dímɛi, kpɛ́ni fêi, ŋá gàa berei dí mɛni-sôli kàa lai.”
Gâloŋ pâi pâi
9Óo lii-nɛ̃̂ɛ kúla Zãiyɔŋ-loŋ-nɛnii!
Óo Zerusâlɛŋ ǹóŋ-nɛnii, láɣi ɣelêi!
Gáa, íkâloŋ káa pâi ípɔ!
Zã̂ai ƃálo-laa kɛ́ ƃò ǹyêei,
ǹíi maa yeŋɔɔ,
gɛ́ ƃò seêni wɛlɛ-sôo-loŋ mɛi.
10Yâwɛɛ ǹyɛɛi, “Ŋa pâi gɔ́-keleŋ-ŋai kulâi Ifiraŋ,
ŋá gɔ́kɔ-sôo-ŋai kúla Zerusâlɛŋ-ƃelai yêei.
Ŋa pâi gɔ́kɔ-keraŋ-ŋai su têei.
Kákâloŋ a pâi a lii-sêe ǹɔii-ŋûŋ-ŋai pɔ́.
Ŋɔlɔii su a pâi kɛ̂tɛi é síɣe yúo ma é tóo yúo ma.
É síɣe ŋɔ́nɔ ǹyá-lêei ma é tóo ǹɔii kpɛɛ ŋá ma.”
Ɣâla ŋɔnûai li-mɛ̂ni pôlu dípɔ tâai
11Yâwɛɛ ǹyɛɛi,
“À kɛ̀ a yá, yɛ̂ɛ berei ŋá ŋãa-sâlaŋ maa kôno tèe kɛ̀ la íyêei,
ŋa pâi íkɔ-sôŋ-ŋai ŋuŋ ma ƃôi
dí kúla ǹóai su ƃɛ́i yá fé naai.
12Káai a gɔ́-sôŋ-ŋai
ka lene pôlu a kili-kɛ-zu kásiɣãŋ su.
Sâa ŋa pâi kákɔ̃liŋ tɛ̂i gîei feerɛ
ŋá dɛɛ kápɔ.
13Ŋá Zuda kpíri yɛ̂ɛ ŋákerâŋ,
ŋá Ifiraŋ kɛ́ a kerâŋ-ɣɛli.
Óo Zãiyɔŋ, ŋa pâi ílônii kɛ̂i a ƃóa-sɔ̂kpɔ-ŋa
Gurii-ŋai dílônii mɛi.
Ǹyaŋ ŋa pâi íkɛ̂i yɛ̂ɛ kɔ-kûluƃa ŋɔƃóa-sɔ̂kpɔ.”
14Gɛ̀ ní Yâwɛɛ a pâi pâi dípɔ,
ǹyaŋ ŋɔtɔ̃ai a pâi siâi yɛ̂ɛ ŋ̀éle-gbana-kao.
Ŋ̀wála-wâla kélee Yâwɛɛ a pâi dúrui fɛ̂ɛi
é lí vãa kɛ́tɛi su ǹɔii kwára-pere.
15Ŋ̀wála-wâla kélee Yâwɛɛ a pâi dímaa kɔ̃ɔ̂i,
ǹyaŋ da pâi díkpɔara-ƃelai paâi.
Ǹyaŋ da pâi ǹûai ŋãa kpelêi yɛ̂ɛ ŋwã̂ai,
dílaa é fɛ́ɛ yɛ̂ɛ kawúlu,
dímaa é yɔɔ yɛ̂ɛ berei
ŋ̀âla-teƃelei zônoŋ su-ŋai díkaa lai.
16Maa ɣêlei tí, Yâwɛɛ nyii gáa a Díɣâlai,
a pâi díƃalôi, kpɛ́ni fêi,
dia ƃé díkaa a ŋɔƃála-ŋai,
kpɛ́ni fêi, díkaa yɛ̂ɛ gane-ŋai
da kɛ̂ kâloŋ ŋûa-ƃɔrɔ mai,
da pâi fôloi ŋɔlɔii su.
17Tɔ̃yâ ma a pâi kɛ̂i a mɛni lɛ́lɛɛ!
Zí-sɛŋ-ŋai da pâi ǹyaŋkpa-ŋai kɛ̂i dí ƃɔlɔ,
ǹyaŋ ŋwã̂ai nina é ǹɛyâa-nɛyãai kɛ́ dí ƃɔlɔ.
Currently Selected:
Zɛkɛrâya 9: KWB
Highlight
Copy
Compare
Share
Want to have your highlights saved across all your devices? Sign up or sign in
