Niɛmaya 8
8
Ɛzura è dɔ̂ŋ lôno ǹûai dîɛ
1Ŋ̀áloŋ ǹɔ́ɔlu mɛi feerɛi su, Eezuɛ-lonii kélee kùla gɔ-soŋ-laai sui, dí nâa kɛ̀ a dí séɛɛ dí taa-ŋai su. Ŋ̀áloŋ tí ŋɔfóloi maa-ŋuŋ, dí kélee dí díŋaa tɛ̀ díkîe ma ziɣãŋ lá da ǹaa tòli a Ǹya Siɣãŋ lá Zerusâlɛŋ taa-leei sui. Dí mò zâla láa soŋ-nuui Ɛzura ma nyii kɛ̀ a dɔ̂ŋ lɛ́-nuui dîyɛɛ mai, “Pá a dɔ̂ŋ kɔlɔi nyii Yâwɛɛ è wɔ́lɔ dɛ̀ɛ Eezuɛ-ŋai pɔ́ Mose sârai, í ǹóno kûɛ.” 2Nya ƃe Ɛzura è pà a gɔlɔi. Diai kélee da mɛni ŋá kâa mai dí kɛ̀ naa. Ǹûai ŋí dí kɛ̀ a sinâa, nɛyâa da nîa-pɛlɛɛ. 3Ɛzura è Mose ŋɔtɔ̂ŋ kɔlɔi ŋí lòno naa dîɛ é kúla ɣele-wala pɛ-pɛ ma, é lɛ́ɛ la zu vóloi é tɛ́ ŋuŋ ma. È kɛ̀ tɔɔ̂ni Ǹyá Siɣãŋ lá. È kɛ̀ Dɔ̂ŋ-ŋai ŋí lônoi ǹûai kélee wóli tɔ̂ɔ ma kpɔ́ tɔ̀ŋ-tɔŋ.
4Ɛzura è tɛ̀ é tɔ́ɔ ǹyeŋkêŋ ŋá nyii dí dɔ̀ɔ gɔyɛ̂ŋ ŋí mɛni mai. Zinâai ŋí ƃé kɛ̀ ǹáa mii-yee mɛi pere: Matitia, Sima, Anaya, Yuraya, Ɛɛkea da Maaseia. Zinâai ŋí dia máŋ dí kɛ̀ tɔɔ̂ni gɔɔ-yee mɛi-pere: Pidaya, Misãŋ, Maakiza, Asuŋ, Asibadana, Zɛkɛraya da Mɛsulaŋ.
5Ɛzura è kɛ̀ tɔɔ̂ni ǹyeŋkêŋ ŋá ǹûai kélee ŋɛ́i pîlaŋɔɔ ma. Tãi è gɔlɔ láa ƃò lai, dí kélee dí dímu sìɣe dí tɔ́ɔ. 6Ɛzura è mò ǹyɛɛ, “Laa maa tɛ̂ tɛɛ Yâwɛɛ pɔ́ nyii gáa a Ŋ̀âla kɛ́tɛi!”
Ǹûai kélee dí díyee tɛ̀ ɣelêi dí láɣi, dîyɛɛi, “É kɛ́ tí-oo, é kɛ́ tí.” Dí pìlaŋ dí kpelêŋ ŋá, dí díŋuŋ ma pîlaŋ ǹɔii ma dí Yâwɛɛ fɛli.
7Dɔ̂ŋ-kɔlɔi lónoɔɔ pôlu ma Ɛzura mii, Eezuɛ-ŋai kélee dí lɛ̀ɛ tɔɔ̂ni Liiva-ŋai ŋí dí kɛ́ dɔ̂ŋ-ŋai ŋáa lɛ̀ dîa: Zasua, Bani, Seribaya, Zamiŋ, Aku, Sabɛtai, Odaya, Maaseia, Kelita, Azaria, Zozaba, Anaŋ da Pilaiya. 8Mose ŋɔtɔ̂ŋ kɔlɔi Ɛzura è ǹono ǹûai dîɛi, Liiva-ŋai ŋí dí ŋ̀á lɛ́ kpɔ́ dîa a zu ponoɔɔ a gɛɛ dí táre zu.
9Tãi ǹûai dí Mose ŋɔtɔ̂ŋ-ŋai ŋí lóno woo mɛ̀ni lai, díkelee dí wɔ̀lɔ a zu kɛ́tɛ. Nya ƃe Zuda lɔii kpiniŋ mɛi nuui Niɛmaya, zâla láa soŋ nuui Ɛzura, nyii kɛ̀ a dɔ̂ŋ-ŋai lɛ́ nuui dɔnɔi da Liiva-ŋai nyii-ŋai kɛ̀ dɔ̂ŋ-ŋai ŋá lɛ̂i ǹûai dîai, dí mò dîa dîyɛɛi, “Ŋ̀elei ŋí maa waai Káɣâlai Yâwɛɛ mɛni ma. M̀ɛni ma, káfe sèe a malôŋ pere, kpaa máŋ ká wɔ́lɔ.” 10Niɛmaya è mò ǹûai dîa ǹyɛɛi, “Ka lí nâa kápɛrɛ-ŋai lá. Ka lí ká kátaa tûlɛ-ŋai da paa, ká kúu kɛ́, ká ŋwã̂ai kpele, ká lii nɛ̃ɛ kùla. Kà zãâi ŋí da tɛ̀ɛ diai pɔ́ da kɔ́ri pɔ̂ri maa fé dîɛi. Káfe sèe a malôŋ pere. Ŋ̀elei ŋí káa a ɣele maa waa Kánuu-namui Yâwɛɛ mɛni ma. A pâi lii sêe tɛɛ̂i kápɔ é kákponôi kpanaŋ.”
11Liiva-ŋai dí kɛ̀ ǹûai ŋáa nɛnɛ̂i dîyɛɛi, “Ɣele maa waa ká ŋí. Káfe kɛ̀ a ká malôŋɔɔ.” 12È kɛ̀ tí, ǹûai kélee dí lì dípɛrɛ-ŋai lá, dí kúu kɛ́tɛ kɛ́, dí dílaa míi, dí ŋwã̂ai kpele. Dí zãâi ŋí da-ŋa tɛ̀ɛ diai pɔ́ da kɔ́ri pɔ̂ri fé kɛ́ ní dîɛi, kpɛ́ni fêi, dɔ̂ŋ-ŋai Ɛzura è ǹono dîɛi, dí ŋ̀á kàa.
M̀ûu mû Kuui kula mɛni
13Ŋ̀áloŋ ǹɔ́ɔlu mɛi-feerɛi ŋɔfólo feerɛ ɣele, ǹûai dísuui su-ƃelai láa túɛ-ƃelai, zâla láa soŋ-ƃelai da Liivai-ŋai dí pà Ɛzura pɔ́. Dí pà bɔ́ naa a gɛɛ Dɔ̂ŋ Ɣâla è dɛ̀ɛ Mose pɔ́i é ŋ̀á lɛ́ dîa dí táre zu a ǹɛ́lɛɛ. 14Ɛzura kɛ́ɛ Dɔ̂ŋ lɛ̂i dîai, dí gàa bɔ̃yɛɛ Dɔ̂ŋ su a gɛɛ Eezuɛ-ŋai da kɛ̀ M̀ûu mû Kuui kulâi a góraŋ ŋɔɣáloŋ lɔ́ɔlu mɛi feerɛi, fɛ̂ɛ dí kɛ́ nyiî ƃûu-ŋa mu. 15Tãi ǹûai dí m̀ɛnii ŋí ŋá kàa la mai, dí worɛ̂-ŋa tɛ̀ɛ Zerusâlɛŋ taa-leei su da Zuda lɔii kpiniŋ su taa lee-ŋai su, dîyɛɛ naa ƃelai dîai, “Ka lí ǹɔɔi su ká ŋ̀úru-ŋai ŋí láa tée. Dia ƃé kwa pâi m̀ûu-ŋai kwa pâi nyiî dímui tɔɔ̂i a dia. Maa wûru-ŋai ŋí ƃa, ɔle, fîi, tóu da wúru da kpɛ́ni-ŋa láa. Nyíŋi ƃé bɔ̃yɛɛi Mose ŋɔtɔ̂ŋ su.”
16Nya ƃe ǹûai dí lì dí pá a wúru laa-ŋa. Dí ƃûu-ŋa tɔ̀ɔ dípɛrɛ-ŋai mɛi-pere a tɛ̀ɛ-ŋa. Da-ŋa dí díwɔ̂-ŋai tɔ̀ɔ dípɛrɛ-ŋai kɔlɛ ma, da-ŋa dí díwɔ̂-ŋai tɔ́ɔ Ŋ̀âla-pɛrɛ Kɛ́tɛi kɔlɛ ma. Da-ŋa dí díwɔ̂-ŋai tɔ̂ɔ Ǹyá Siɣãŋ lá kɔlɛ ma, da-ŋa dí díwɔ̂-ŋai tɔ́ɔ Ifiraŋ Siɣãŋ lá. 17Ǹûai kélee kùla ǹuɛ laai su Babelɔŋ, dí ƃûu-ŋa tɔ̀ɔ díkɛ ƃò mu. É síɣe Nuŋ ǹóŋ Zasua ŋɔtãi ma é tóo tãi ŋí ma, Eezuɛ-ŋai dítãi maa ŋuŋ ká ŋí kɛ̀ gúui ŋí kulâi. Dí líi è nɛ̃ɛ kpɔ́ a ŋ̀ánaa. 18Dí gúui ŋí kɛ̀ fólo lɔ́ɔlu mɛi feerɛ yée mu. Ɛzura è Ɣâla ŋɔtɔ̂ŋ kɔlɔi lɛ̀ ǹûai dîa a ɣele kélee ŋ̀ele kûu lɔ́ɔlu mɛi feerɛi ŋí yée mu. Ŋ̀ele kûui ǹɔ́ɔlu mɛi saaƃa ɣelei, ǹûai kélee dí díŋaa tɛ̀ gîe ma kwaa tɔ̂nɔ ma dí gúui láa tɛ́ yɛ̂ɛ berei bɔ̃yɛɛi là Mose ŋɔtɔ̂ŋ sui.
Currently Selected:
Niɛmaya 8: KWB
Highlight
Copy
Compare
Share
Want to have your highlights saved across all your devices? Sign up or sign in
