Niɛmaya 7
7
1Kú ziɣãŋ tɔ̂ɔ Zerusâlɛŋ taa-leei ma pôlu kú gbôŋ-ŋai tóo ziɣãŋ-ŋai gbôŋ láƃelei. È kɛ̀ tí, ŋá Ŋ̀âla-pɛrɛ Kɛ́tɛi mɛi káa-ƃelai, Ŋ̀âla-pɛrɛ Kɛ́tɛi mu wule-too-ƃelai da Liiva-ŋai pù dí tíi-ŋai mɛi. 2Ŋá ńêɣe-surɔŋ Anani kɛ̀ a Zerusâlɛŋ taa-leei láa túɛ-nuu. Ŋá Ananaya kɛ̀ a gɔlɛ mâ ǹuu. Nya ƃe kɛ̀ a ziɣãŋ nyii kɛ̀ a dínaŋɔɔ Zerusâlɛŋ mai láƃelei mɛi káa-ƃelai mɛi nûu. Ŋá gɛ̀ tí, kpɛ́ni fêi, Ananaya è kɛ̀ a teniŋ ƃô nuu, yao maa da ƃaa kɛ́ maa kɛ́ ƃò ǹyêei Ɣâla mɛni ma é tɛ́ɛ ǹúui dámaa dîa. 3Ŋá dí lia wôo ƃò a gbanaŋɔɔ a gɛɛ dífe Zerusâlɛŋ taa-leei ŋɔsiɣãŋ-ŋai da lá ƃò é lɛ́ɛ la zu vólo nɛ̂nɛŋ é kpanáŋ. Ŋá mò dîa a gɛɛ dí gɛ́ a dí ma kpa díkɛ ziɣãŋ-ŋai lá tɛ́, díkɛ wúru-ŋa tɔ̀ɔ dípôlu vólo kâoi é lɛ́ɛ pâi yenîi, nàa mɛi káa ƃelai dí lɛ́ɛ pâi kulâi naa. Kwaa ŋa mɛni kpanaŋɔɔ-ŋa da koli ŋa díkɛ̀ Zerusâlɛŋ taa-leei su. Ŋá mò dîa a gɛɛ dí kpakolo-ŋa siɣe dí dípu kwaa-ŋai ŋí ma ǹaa mɛi káa mɛni ma. Da-ŋa díkɛ ziɣãŋ m̀ɛ́i mɛi kâa nyii ǹaa káa dípɛ́rɛ-ŋai téniŋ mai.
Diai lène pôlu dí kúla gɔ́ sóŋ laai sui
(Ɛzura 2:1-70)
4Zerusâlɛŋ è kɛ̀ a taa-lêe kɛ́tɛ, kɛ́lɛ núu támaa fé kɛ́ ní naa. Bɛrɛ-ŋai kɛ̀ naai, dífe kɛ́ ní a dítamaa. 5Ɣâla è ńii mù sìɣe a gɛɛ ŋá ǹûai, dílaa túɛ-ƃelai, da diai kɛ̀ naa a gâloŋ ŋɛ́i gaoi, kélee tóli kwaa tɔnɔ ma, a gɛɛ ŋá dílaa síɣe dísuu mâ a tɛ̀ɛ-ŋa. Ŋá Zûu nuu suu-ŋai dímɛni pɔ̂lɔ kɔlɔi kâa. Diai kùla gɔ-soŋ-laai su dí pá a maa ŋuŋ, ŋá dílaa kàa gɔlɔi ŋí su dísuu mâ yɛ̂ɛ berei díkɛ̀ pâi lai. Berei ŋí ƃé dílaa è kɛ̀ a bɔ̃yɛɛ la gɔlɔi ŋí su:
6Ǹûai kɛ̀ gɔ-soŋ-laai su Babelɔŋ lɔii kpiniŋ sui, dí támaa ɣele dí lène pôlu Zerusâlɛŋ da Zuda. Dí lì dítaa-ŋai su a tɛ̀ɛ-ŋa. Babelɔŋ kaloŋ Nɛbukinaza è wɔ́lɔ Zerusâlɛŋ taa-leei yée mɛi ɣâle é lí a dínûai Babelɔŋ kɔ soŋ laa su. 7Dí páa pôlui, dílaa túɛ-ƃelai ƃé kɛ̀ a: Zɛrubabɛɛ, Zasua, Niɛmaya, Azaria, Laamia, Naɣamani, Mɔdikai, Beesãŋ, Mezipirɛ, Bivai, Neuŋ da Baanaa.
Eezuɛ ǹuu suui su kpakolo-ŋai kùla gɔ-soŋ-laai su dí lène pôlui, dílaa ká ŋí da díkɔnii:
8Parosi ŋɔsuui su sinaai díkɛ̀ a wála feerɛ pôlu ŋuŋ tɔnɔ pôlu buu lɔ́ɔlu mɛi feerɛ kao feerɛ (2,172). 9Sifatia ŋɔsuui su sinaai díkɛ̀ a ŋuŋ saaƃa pôlu buu lɔ́ɔlu mɛi feerɛ kao feerɛ (372). 10Araa ŋɔsuui su sinaai díkɛ̀ a ŋuŋ lɔ́ɔlu mɛi da pôlu buu lɔ́ɔlu kao feerɛ (652). 11Paa-moa ŋɔsuui su sinaai díkɛ̀ a wála feerɛ pôlu buu lɔ́ɔlu mɛi saaƃa pôlu puu kao lɔ́ɔlu mɛi saaƃa (2,818). Paa-moa ŋí ŋɔsuui è Zasua da Zoa dísuui su. 12Elaŋ ŋɔsuui su sinaai díkɛ̀ a wála tɔnɔ pôlu ŋuŋ feerɛ pôlu buu lɔ́ɔlu kao náaŋ (1,254). 13Zatu ŋɔsuui su sinaai díkɛ̀ a ŋuŋ lɔ́ɔlu mɛi saaƃa pôlu buu náaŋ buu kao lɔ́ɔlu (845). 14Zakai ŋɔsuui su sinaai díkɛ̀ a ŋuŋ lɔ́ɔlu mɛi feerɛ pôlu buu lɔ́ɔlu mɛi da (760). 15Binui ŋɔsuui su sinaai díkɛ̀ a ŋuŋ lɔ́ɔlu mɛi da pôlu buu náaŋ kao lɔ́ɔlu mɛi saaƃa (648). 16Bebai ŋɔsuui su sinaai díkɛ̀ a ŋuŋ lɔ́ɔlu mɛi da pôlu buu feerɛ kao lɔ́ɔlu mɛi saaƃa (628). 17Aga ŋɔsuui su sinaai díkɛ̀ a wála feerɛ pôlu ŋuŋ saaƃa pôlu buu feerɛ kao feerɛ (2,322). 18Adonikaŋ ŋɔsuui su sinaai díkɛ̀ a ŋuŋ lɔ́ɔlu mɛi da pôlu buu lɔ́ɔlu mɛi da kao lɔ́ɔlu mɛi feerɛ (667). 19Bivai ŋɔsuui su sinaai díkɛ̀ a wála feerɛ pôlu buu lɔ́ɔlu mɛi da kao lɔ́ɔlu mɛi feerɛ (2,067). 20Adiŋ ŋɔsuui su sinaai díkɛ̀ a ŋuŋ lɔ́ɔlu mɛi da pôlu buu lɔ́ɔlu kao lɔ́ɔlu (655). 21Atɛ nyii da dòli máŋ a Ɛsekayai, ŋɔsuui su sinaai díkɛ̀ a buu lɔ́ɔlu mɛi náaŋ kao lɔ́ɔlu mɛi saaƃa. 22Asuŋ ŋɔsuui su sinaai díkɛ̀ a ŋuŋ saaƃa pôlu buu feerɛ kao lɔ́ɔlu mɛi saaƃa (328). 23Bizai ŋɔsuui su sinaai díkɛ̀ a ŋuŋ saaƃa pôlu buu feerɛ kao náaŋ (324). 24Arii ŋɔsuui su sinaai díkɛ̀ a ŋuŋ tɔnɔ pôlu puu kao feerɛ (112). 25Gibiɔŋ ŋɔsuui su sinaai díkɛ̀ a buu-lɔ́ɔlu mɛi náaŋ kao lɔ́ɔlu.
26Diai díkaa-ƃelai séɛɛ è wɔ́lɔ kɛ̀ daa-ŋai ŋí su gɔ́i é lɛ́ɛ pâi toôi, dia máŋ dí lène pôlu a tɛ̀ɛ ŋa. Daa-ŋai kpîŋ láa ká ŋí da zinâai lène pôlui: Bɛpeleɣɛ̃ɛ da Nɛtofa taai su sinaai díkɛ̀ a núu ŋuŋ tɔnɔ pôlu buu lɔ́ɔlu mɛi saaƃa kao lɔ́ɔlu mɛi saaƃa (188). 27Anatɔ taai su sinaai díkɛ̀ a núu ŋuŋ tɔnɔ pôlu buu feerɛ kao lɔ́ɔlu mɛi saaƃa (128). 28Bɛ-azimavɛ taai su sinaai díkɛ̀ a núu buu náaŋ kao feerɛ. 29Kiria-zeriŋ, Sifira da Bɛɛrɔ taa-ŋai su sinaai díkɛ̀ a núu ŋuŋ lɔ́ɔlu mɛi feerɛ pôlu buu náaŋ kao saaƃa (743). 30Lama da Giƃa taa-ŋai su sinaai díkɛ̀ a núu ŋuŋ lɔ́ɔlu mɛi da pôlu buu feerɛ kao tɔnɔ (621). 31Misima taai su sinaai díkɛ̀ a núu ŋuŋ tɔnɔ pôlu buu feerɛ kao feerɛ (122). 32Bɛtɛ da Eea taa-ŋai su sinaai díkɛ̀ a núu ŋuŋ tɔnɔ pôlu buu feerɛ kao saaƃa (123). 33Nibo taai su sinaai díkɛ̀ a núu buu lɔ́ɔlu kao feerɛ. 34Elaŋ taai su sinaai díkɛ̀ a núu wála tɔnɔ pôlu ŋuŋ feerɛ pôlu buu lɔ́ɔlu kao náaŋ (1,254). 35Ariŋ taai su sinaai díkɛ̀ a núu ŋuŋ saaƃa pôlu buu feerɛ (320). 36Zɛleko taai su sinaai díkɛ̀ a núu ŋuŋ saaƃa pôlu buu náaŋ kao lɔ́ɔlu (345). 37Lɔɔ, Aadi da Ono taa-ŋai su sinaai díkɛ̀ a núu ŋuŋ lɔ́ɔlu mɛi feerɛ pôlu buu feerɛ kao tɔnɔ (721). 38Senaa taai su sinaai díkɛ̀ a núu wála saaƃa pôlu ŋuŋ lɔ́ɔlu mɛi náaŋ pôlu buu saaƃa (3,930).
39Zâla láa soŋ-ƃelai dísuui su ƃelai kùla gɔ-soŋ-laai su dí lene pôlui, dílaa ká ŋí da dílônii-sinaai díkɔnii: Zidaya nyii kula Zasua ŋɔsuui sui díkɛ̀ a núu ŋuŋ lɔ́ɔlu mɛi náaŋ pôlu buu lɔ́ɔlu mɛi feerɛ kao saaƃa (973). 40Imɛ ŋɔsuui su-sinaai díkɛ̀ a núu wála tɔnɔ pôlu buu lɔ́ɔlu kao feerɛ (1,052). 41Pasiɔ ŋɔsuui su-sinaai díkɛ̀ a núu wála tɔnɔ pôlu ŋuŋ feerɛ pôlu buu náaŋ kao lɔ́ɔlu mɛi feerɛ (1,247). 42Ariŋ ŋɔsuui su-sinaai díkɛ̀ a núu wála tɔnɔ pôlu puu kao lɔ́ɔlu mɛi feerɛ (1,017).
43Liiva-ŋai dísuui su ƃelai kùla gɔ-soŋ-laai su dí lène pôlu dílaa ká ŋí da dílônii-sinaai díkɔnii: Zasua da Kamiɛɛ díkula Odavia ŋɔsuui su. Dísuui su-sinaa díkɛ̀ a núu buu lɔ́ɔlu mɛi feerɛ kao náaŋ. 44Ŋ̀âla-pɛrɛ Kɛ́tɛi ŋɔwule too-ƃelai dí kùla Asafa ŋɔsuui su. Dísuui su-sinaai díkɛ̀ a núu ŋuŋ tɔnɔ pôlu buu náaŋ kao lɔ́ɔlu mɛi saaƃa (148). 45Ŋ̀âla-pɛrɛ Kɛ́tɛi mɛi káa-ƃelai dí kùla Saluŋ, Atɛ, Taamɔŋ, Aku, Atita, da Sobai ni dísuui su. Dísuui su-sinaai díkɛ̀ a núu ŋuŋ tɔnɔ pôlu buu saaƃa kao lɔ́ɔlu mɛi saaƃa (138).
46-56Ŋ̀âla-pɛrɛ Kɛ́tɛi mu tii kɛ́-ƃelai kùla gɔ-soŋ-laai su dí lène pôlui, dínâŋ-ni láa ƃa Ziɣa, Asufa, Tabao, Kɛrɔ, Sia, Padɔŋ, Lebana, Akɔ, Aku, Aga, Saŋlai, Anaŋ, Gidɛɛ, Gaɣa, Liaya, Leziŋ, Nikoda, Gazaŋ, Uza, Pasia, Besai, Asina, Meuniŋ, Nɛfisiŋ, Baƃu, Akufa, Aaɔ, Bazulu, Meida, Asafa, Bakɔ, Sisela, Tema, Bali, Meida, Aasa, Bakɔ, Sisela, Tema, Nɛzia da Atifa.
57Saloma ŋɔtíi kɛ́-ƃelai dílônii nyii-ŋai kùla gɔ-soŋ-laai su dí lène pôlui, dínâŋ-ni láa ƃa Sotai, Soferɛ, Pɛrida, 58Zaala, Dakɔ̃ŋ, Gidɛɛ, 59Sifatia, Ati, Pokɛrɛ-azɛbaiŋ, da Amɔŋ.
60Diai kɛ́ tíi kɛ̂i Ŋ̀âla-pɛrɛ Kɛ́tɛi mui da Saloma ŋɔtíi kɛ́-ƃelai dísuui su ƃelai da-ŋa dí kùla gɔ-soŋ-laai su dí lène pôlu. Díkɛ̀ a núu ŋuŋ saaƃa pôlu buu lɔ́ɔlu mɛi náaŋ kao feerɛ (392).
61-62Kɛ́lɛ diai lène pôlui, dí ta-ŋa dífa kâa pɔ̀ri ǹɛ̂i núu da ma a gɛɛ dínuu pɔlɔ-ŋai díkɛ̀ a Eezuɛ lonii. Ǹûai ŋí díkɛ̀ a Dilaiya, Tobaya da Nikoda ni dísuui su-ƃela. Dí kɛ́ɛ Babelɔŋ lɔii sui, dí séɛɛ è kɛ̀ daa-ŋai ŋí su: Tɛɛ Mela, Tɛɛ Asafa, Siru, Adɔŋ da Imɛ. Dí kɛ̀ a núu ŋuŋ lɔ́ɔlu mɛi da pôlu buu náaŋ kao feerɛ (642).
63-64Zâla láa soŋ-ƃelai ŋí tãi dílônii dí lène la pôlu Zerusâlɛŋ, dífe pɔ̂ri ní ǹɛ̂i a gɛɛ dínuu pɔ̂lɔ-ŋai díkɛ̀ a Eezuɛ ŋɔsâla láa soŋ-ƃela kpɛ́ni fêi dínuu suui láa fé kɛ́ ní Eezuɛ ŋɔmɛni pɔ̂lɔ kɔlɔi su. Dia ƃà Obaiya nyíi kùla Akozi, da Bazilai. Bazilai è wɔ́lɔ Gilia nuui Bazilai ǹônii-nɛnî dɔ̀nɔ kùla a ŋɔnɛnîi. Nya ƃe è ŋɔnɛnîi ǹâŋ ŋɔnúu suui láa sèe ǹya kpîŋ m̀a. Tãi nɔ́ zâla láa soŋ-ƃela saaƃai ŋí dísuui láa fé kɛ́ ní la Eezuɛ-ŋai dímɛni pɔ̂lɔ kɔlɔi su a sâla láa soŋ-ƃelai, Eezuɛ-ŋai dífe fáa ní ma a gɛɛ díkɛ a zâla láa soŋ ƃelai da. Dí m̀o a gɛɛ díkaa a nani-ƃela, dímaa fé waa ní. 65Zuda-ŋai dílɔii kpîniŋ mɛi nuui è mò ǹûai ŋí dîa a gɛɛ dífe m̀ii sɛŋ maa waai da mìi. Dí lɛ́ɛ pâi da miî, fɛ̂ɛ zâla láa soŋ-ƃelai da nyii a Uliŋ da Tumiŋ tòoi é ǹɛ́ a gɛɛ da pɔ̂ri da miî. 66Diai kélee kùla gɔ-soŋ-laai su dí lène pôlu dípɔ taai díkɛ a núu wála buu náaŋ kao feerɛ pôlu ŋuŋ saaƃa pôlu buu lɔ́ɔlu mɛi da (42,360). 67Dítii kɛ́ ƃelai, zinâai da ǹɛyâai dîkɛ̀ a núu wála lɔ́ɔlu mɛi feerɛ pôlu ŋuŋ saaƃa pôlu buu saaƃa kao lɔ́ɔlu mɛi feerɛ (7,337). Dí wule too-ƃelai díkɛ̀ a sinâa da nɛyâa ŋuŋ feerɛ pôlu buu náaŋ kao lɔ́ɔlu (245). 68Dí soo-ŋai díkɛ̀ a ŋuŋ lɔ́ɔlu mɛi feerɛ pôlu buu saaƃa kao lɔ́ɔlu mɛi da (736). Dísoo ƃóloŋ-maa-ŋai díkɛ̀ a ŋuŋ feerɛ pôlu buu náaŋ kao lɔ́ɔlu (245). 69Dí soo fáleŋ-ŋai díkɛ̀ a ŋuŋ náaŋ pôlu buu saaƃa kao lɔ́ɔlu (435). Dí wɛlɛ sôo-ŋai díkɛ̀ a wála lɔ́ɔlu mɛi da pôlu buu lɔ́ɔlu mɛi feerɛ pôlu buu feerɛ (6,720).
70Ǹûai dámaa ɣele dí sama sãa tɛ̀ɛ a kpɔŋ maa a gɛɛ dí Ŋ̀âla-pɛrɛ Kɛ́tɛi mu kpɛtɛ la. Zuda lɔii mɛi nuu kɛ́tɛi ǹyaa kpîŋ è gôo pãŋ ŋuŋ feerɛ pôlu buu lɔ́ɔlu mɛi feerɛ (270) da gbora tɛ̀ɛ a kpɔŋ maa. È sâla kula kâwulu buu lɔ́ɔlu tɛ́ɛ Ŋ̀âla-pɛrɛ Kɛ́tɛi mu tii kɛ́ mɛni ma da yokpo ŋuŋ lɔ́ɔlu pôlu buu saaƃa (530) zâla láa soŋ-ƃelai mɛni ma. 71Eezuɛ nuu suui su-ƃelai láa túɛ-ƃelai dí sãâ tɛ̀ɛ Ŋ̀âla-pɛrɛ Kɛ́tɛi mu tii kɛ́ mɛni ma. Zãâi ŋí ƃé kɛ̀ a gôo pãŋ buu saaƃa pôlu buu lɔ́ɔlu mɛi feerɛ kao lɔ́ɔlu (375) da káne pãŋ wála feerɛ pôlu buu lɔ́ɔlu mɛi da pôlu buu lɔ́ɔlu mɛi feerɛ (2,670). 72Ǹûai kpéli-ŋai kélee dí gôo pãŋ ŋuŋ saaƃa pôlu buu lɔ́ɔlu mɛi feerɛ kao lɔ́ɔlu (375) tɛ̀ɛ da káne pãŋ wála feerɛ pôlu buu lɔ́ɔlu (2,500). Dí ŋɔ́nɔ yokpo buu lɔ́ɔlu mɛi da kao lɔ́ɔlu mɛi feerɛ tɛ̀ɛ zâla láa soŋ-ƃelai mɛni ma.
73Ǹûai ŋí dí see Zuda lɔii kpiniŋ su taa-ŋai su a tɛ̀ɛ-ŋa. Zâla láa soŋ-ƃelai, Liiva-ŋai, Ŋ̀âla-pɛrɛ Kɛ́tɛi mɛi káa-ƃelai, Ŋ̀âla-pɛrɛ Kɛ́tɛi mu wule too-ƃelai, Ŋ̀âla-pɛrɛ Kɛ́tɛi mu tii kɛ́ kpakolo-ŋai, da Eezuɛ-ƃelai da-ŋa.
Currently Selected:
Niɛmaya 7: KWB
Highlight
Copy
Compare
Share
Want to have your highlights saved across all your devices? Sign up or sign in
