Niɛmaya 12
12
Zâla láa soŋ-ƃelai da Liiva-ŋai
1Zâla láa soŋ-ƃelai da Liiva-ŋai láa ká ŋí nyii-ŋai da Siatiɛ ǹóŋ Zɛrubabɛɛ ni díkùla gɔ́ soŋ-laai su é pɛ́lɛ Zasua ma nyii kɛ̀ a zâla láa soŋ-nuu kɛ́tɛi, dí pá pôlu Zerusâlɛŋ. Zâla láa soŋ-ƃelai ƃé kɛ̀ a Seraya, Zɛlemaya, Ɛzura, 2Amaria, Malusi, Atusi, 3Sikania, Leuŋ, Mɛrimɔ, 4Ido, Ginetɔ, Aƃiza, 5Mizamiŋ, Maadiya, Beega, 6Simaya, Zoyaribi, Zidaya, 7Salu, Amɔ, Ɛɛkea da Zidaya. Zinaai ŋí ƃé kɛ̀ a díƃarâa sala láa soŋ-ƃelai láa túɛ-ƃela Zasua ŋɔtãi ma.
8Liiva-ŋai ŋí ƃé kɛ̀ ŋ̀ule-too mɛnii láa túɛ da sɛɣɛ-fêi tɛɛ́ Ɣâla pɔ́ mɛni. Zasua, Binui, Kamiɛɛ, Seribaya, Zuda, da Matania. 9Babukiya da Uŋno é pɛ́lɛ dí ƃaraâi dîa díkɛ̀ dí kɔlɛ ma a ŋ̀ule-ŋai vaa mú-ƃela.
Zâla láa soŋ-nuu kɛ́tɛi Zasua ŋɔsuui
10Zasua è kɛ̀ a Zoiakiŋ ǹâŋ. Zoiakiŋ kɛ́ ƃò a Iliasi ǹâŋ. Iliasi ǹyaŋ kɛ́ ƃò a Zoiada ǹâŋ. 11Zoiada è kɛ̀ a Zonetaŋ ǹâŋ. Zonetaŋ ǹyaŋ è kɛ̀ a Zadua ǹâŋ.
Zâla láa soŋ-ƃelai dísuui láa túɛ-ƃelai
12Tãi Zoiakiŋ è kɛ̀ la a sâla láa soŋ-nuu kɛ́tɛi, zâla láa soŋ-ƃelai ŋí díkɛ̀ a dísuu-ŋai láa túɛ-ƃelai. Miraya è kɛ̀ a Seraya nuu-suui láa túɛ-nuu, Ananaya kɛ́ ƃò a Zɛlemaya nuu-suui láa túɛ-nuu. 13Mɛsulaŋ è kɛ̀ Ɛzura nuu-suui láa túɛ, Zioanaŋ kɛ́ ƃò Amaria nuu-suui láa tuɛ. 14Zonetaŋ è kɛ̀ Malusi nuu-suui láa túɛ, Zosɛ kɛ́ ƃò Sibania ǹuu-suui láa túɛ. 15Adina è kɛ̀ Ariŋ nuu-suui láa túɛ, Ɛkai kɛ́ ƃò Mɛraiɔ nuu-suui láa tuɛ. 16Zɛkɛraya è kɛ̀ Ido nuu-suui láa túɛ, Mɛsulaŋ kɛ́ ƃò Zinɛtɔŋ nuu-suui láa tuɛ. 17Zikari è kɛ̀ Aƃiza nuu-suui láa túɛ, Pitai kɛ́ ƃò Meniamiŋ da Môadiya dínuu-suu-ŋai laa tuɛ. 18Samua è kɛ̀ Beega nuu-suui láa túɛ, Zionetaŋ kɛ́ ƃò Simaya nuu-suui láa tuɛ. 19Matenai è kɛ̀ Zoyaribi nuu-suui láa túɛ, Uzii kɛ́ ƃò Zidaya nuu-suui láa tuɛ. 20Kalai è kɛ̀ Salai nuu-suui láa túɛ, Ibɛ kɛ́ ƃò Amɔ nuu-suui láa tuɛ. 21Asabiya è kɛ̀ Ɛɛkea nuu-suui láa túɛ, Nɛtaniɛ ǹyaŋ kɛ́ ƃò Zidaya nuu-suui láa tuɛ.
Zâla láa soŋ-ƃelai da Liiva-ŋai maa mɛni pɔlɔi
22Zâla láa soŋ-ƃelai da Liiva-ŋai dí dínuu-suu-ŋai da dílaa túɛ-ƃelai láa pɔ̃yɛ kɔlɔ ma. Dí bɔ̃yɛ a tãi Iliasi, Zoiada, Zoanaŋ da Zadua ni díkɛ̀ la a zâla láa soŋ-ƃela kpaya-kpayai. Dí kpɛ̀ɛ gɔlɔi ŋí ma a tãi Gâloŋ Darɔ è kɛ̀ la a kâloŋ Pɛsia lɔii mɛi. 23Iliasi ǹóŋ ŋɔlóŋ Zoanaŋ sàa pôlu ma, Liiva-ŋai da díkaayɔɔ-ŋai maa mɛ̂ni pɔ̂lɔ kɔlɔ fé kɛ́ ní Zuda lɔii su.
Dí ǹûai sèe dítii-ŋai mɛi Ŋ̀âla-pɛrɛi Kɛ́tɛi mu
24Tãi Asabiya, Seribaya, Zasua, Bɛnui da Kamiɛɛ ni díkɛ̀ la a Liiva-ŋai láa túɛ-ƃelai, dí Liiva-ŋai pù díkpulu ma a tɛ̀ɛ-ŋa. Da kâa ǹúu-kpulu-ŋai veerɛ kùla a tãi tɔnɔ a gɛɛ dí kɛ́ laa maa tɛ̂ tɛ̀ɛ Ɣâla pɔ́ díkɛ zɛɣɛ̂i fè, yɛ̂ɛ berei Gâloŋ Deeƃé è wɔ́lɔ bɔ̃yɛ a gɛɛ díkɛ gɛ̀ lai.
25Ŋ̀âla-pɛrɛ Kɛ́tɛi mɛi káa-ƃelai ŋí díkɛ̀ ǹaa díkɛ zãa lâai kɛ́ loŋpo-ŋai mɛi kâai nyii-ŋai kɛ̀ Ŋ̀âla-pɛrɛ Kɛ́tɛi ŋɔsiɣãŋ-ŋai lá kɔlɛ mai. Dia ƃa Matania, Babukiya, Obadaya, Mɛsulaŋ, Taamɔŋ da Aku.
26Ǹûai ŋí dí wɔ́lɔ kɛ̀ ɣele ma a Zasua ǹóŋ-surɔŋ Zoiakiŋ nyii kɛ̀ a Ziozada ǹóŋ ŋɔlóŋ ŋɔtãi. È kɛ̀ máŋ a tãi Niɛmaya è kɛ̀ la a ǹɔii mɛi kâloŋ, da tãi Ɛzura è kɛ̀ la a sâla láa soŋ-nuu gɛ́ ƃò ŋɔ́nɔ a Dɔ̂ŋ lɛ́ nuui.
Niɛmaya è Daa-leei ŋɔsiɣãŋ tɛ̂ɛ Ɣâla pɔ́
27Dí kɛ́ɛ pâi Zerusâlɛŋ siɣãŋ tɛɛ̂i Ɣâla pɔ́i, dí Liiva-ŋai kélee kùla ƃɛ́ɛ-ŋai díkɛ̀ a séɛɛ naai dí pá a dia Zerusâlɛŋ. Dí pà a dia a gɛɛ da kɛ̀ ziɣãŋ tɛɛ̂i Ɣâla pɔ́, díkɛ ǹii-nɛ̃ɛ kuláai su, díkɛ sɛɣɛ-fêi tɛ̀ɛ Ɣâla pɔ́ a wule-ŋa tóɔɔ, díkɛ nyɛ̃ŋ-nyɛ̃ŋ-ŋa da kɔnîŋ-ŋa ɣàle. 28Liiva-ŋai díkaayɔɔ-ŋai nyii-ŋai kɛ̀ a wule too-ƃelai díkelee dí kùla Zerusâlɛŋ kɔlɛ ma taa-ŋai su da Nɛtofa taai kɔlɛ ma kpanaŋ-ŋai lá. 29Da-ŋa dí kùla máŋ Bɛɛgiga, Giƃa da Azimavɛ. 30Zâla láa soŋ-ƃelai da Liiva-ŋai dí sâla kùla díkpîŋ maa-waa mɛni ma, ǹûai, ziɣãŋ-ŋai lá, da daa-lêei ŋɔsiɣãŋ.
31Nya ƃe ŋá Zuda láa túɛ-ƃelai ŋáa tɛ́ díkîe ma ziɣãŋ mɛi-pere, ŋá dí pú núu-kpulu kpaya-kpaya feerɛ láa túɛ a gɛɛ dí tínaŋ daa lêei ma díkɛ sɛɣɛ-fêi tɛ̀ɛ Ɣâla pɔ́. Ǹúu-kpului maa-ŋuŋ è lì laa-mii-yee mɛi siɣãŋ mɛi-pere Dúluŋ-ŋa Siɣãŋ naa-pere. 32Osaya è kɛ̀ siâi ŋ̀ule too-ƃelai pôlu-pere. Dí Zuda lɔii láa túɛ-ƃelai ŋáa kɔ̀lɛ gîei feerɛ, gbulu tɔ̂nɔ kɛ́ sìa bôlu-pere. 33Diai lɛ̀ɛ ǹûai láa túɛ-ƃelai pôlui, ƃé kɛ̀ a zâla láa soŋ-ƃelai Azaria, Ɛzura, Mɛsulaŋ, 34Zuda, Bɛŋsima, Simaya da Zɛlemaya. 35Zâla láa soŋ-ƃelai ŋí kú dílaa lɛ̀i, dia ƃé kɛ̀ dúrui fɛ̂ɛi. Ǹúui lɛ̀ɛ dípôlui ƃé kɛ̀ a Simaya ǹóŋ Zonetaŋ ǹóŋ Zɛkɛraya. Zɛkɛraya ǹyaŋ ŋɔsuui su-ƃelai da-ni ƃé kɛ̀ a Matania, Mikâya da Zakɔ nyii-ŋai kùla Asafa ŋɔsuui sui. 36Zɛkɛraya ŋɔnúu suui su-ƃelai lɛ̂ɛ bôlui ƃa Simaya, Azarɛ, Milalai, Gilalai, Maai, Natɛnia, Zuda da Anani. Ɣale sãâ è kɛ̀ díkelee díyêei díkɛ ŋ̀ale yɛ̂ɛ nyii Ɣâla ŋɔnúui Gâloŋ Deeƃé a kâa kɛ̀ ŋàlei. Dɔ̂ŋ lɛ́-nuui Ɛzura ƃé kɛ̀ gbɔ̀ŋ nyíŋi láa túɛ díkɛ lì. 37Tãi dí sèri la Ǹya-tôŋ-mâ Siɣãŋ lái, dí lì ƃɛ́i núu a tɛ̂ naa gɛ́ tɛ̀ Deeƃé ŋɔtaa lêei sui. Dí tɛ̀ɛ Deeƃé ŋɔkâloŋ-pɛrɛ kɛ́tɛi ma, dí lɛ́ɛ liî dí tɛ́ɛ Ǹyá Siɣãŋ lá nyii kɛ̀ daa lêei ŋɔfólo kulâi-perei.
38Ŋ̀ule too-ƃela kpului veerɛ-ɣelei dí lì ziɣãŋ m̀éla kpéli ma-pere. Ŋá kɛ̀ dípôlu, Zuda lɔii láa túɛ-ƃelai gbului kpéli kɛ́ ƃò ḿbôlu. Kú lì kú tɛ́ɛ Gbólo-kpɛtɛ Yeŋkêŋ ma, kú lí ziɣãŋ M̀éla Kɛ́tɛi ma pere. 39Kú ŋɔ́nɔ kùla naa kú pá Ifiraŋ Siɣãŋ lá. Kúkula naa kú lí Zesana Siɣãŋ lá, kú tɛ́ɛ naa kú pá Ǹyɛ̃ɛ Siɣãŋ lá. Kú kuláa Ǹyɛ̃ɛ Siɣãŋ lái, kú pà Ananiɛ Yeŋkeŋ ḿâ. Kú tɛ̀ɛ naa kú pá Ŋuŋ Tɔ̂nɔ (100) Yeŋkêŋ ma. Kú tɛ̀ɛ naa kú pá M̀ála Siɣãŋ lá. Kú nâa sèri Ŋ̀âla-pɛrɛi lá ƃɛ́i kú kpèra naai.
40Nya ƃe ŋ̀ule too nuu-kpului feerɛi su-ƃelai dí lɔ̀ Ŋ̀âla-pɛrɛ Kɛ́tɛi mu. Ǹûai láa túɛ-ƃelai gbulu tɔ̂nɔ su-ƃelai dí kɛ̀ ŋ́gɔlɛ. 41Zâla láa soŋ-ƃelai ŋí dí kɛ̀ ŋ́gɔlɛ máŋ. Dia ƃa Iliakiŋ, Maaseia, Meniamiŋ, Mikâya, Ɛlioenai, Zɛkɛraya da Ananaya ni, túru-ŋa kɛ́ ƃò díyêei. 42Gbéli-ŋai ƃa, Maaseia, Simaya, Ilieza, Uzii, Zioanaŋ, Maakiza, Elaŋ da Izɛ. Zeraya ƃe kɛ̀ ǹûai ŋí láa túɛ díkɛ wule tôo.
43Maa ɣêlei tí, ǹûai dí sâla támaa kùla dí lii-nɛ̃ɛ támaa kúla kpɛ́ni fêi Ɣâla a pá dípɔ a lii-nɛ̃ɛ. Ǹɛyâai da ǹîa-pɛlɛɛi kélee díkɛ̀ lii-nɛ̃ɛ kulâi. Dí lii-nɛ̃ɛ kula-wooi è sèri Zerusâlɛŋ kɔlɛ ma taa-ŋai kélee su.
Ŋ̀ala-pɛrɛ kɛ́tɛi mu tii maa mɛ̂ni
44Maa ɣelei tí, ǹûai láa túɛ-ƃelai dí díyee lɛ̀ nûa dîa a gɛɛ díkɛ Ŋ̀âla-pɛrɛ Kɛ́tɛi ŋɔsãâi lâai kɛ́ kwaai ma mɛni mɛi. Zãâi maa nɛ̃ɛ̂i ǹûai dí pá lai ƃa, dísama-sãai, dísi-sãai m̀á maa ŋuŋ-ŋai, da ǹûai kɔ́ri-sãai buu ɣêle-ŋai. Dîai dí díyee lɛ̀ diai dítii ƃa díkɛ lì gbâlaŋ-ŋai ŋá, a gɛɛ gbâlaŋ ǹâmela díkɛ díkɔri-sãai buu ɣêlei tɛ̀ɛ dípɔ. Zãai ŋí díkɛ zâla lá soŋ ƃelai da Liiva-ŋai mɛni ma yɛ̂ɛ berei Mose ŋɔtɔ̂ŋ è m̀o lai. Zuda-ƃelai díkɛ̀ a dílii láa a berei zâla láa soŋ-ƃelai da Liiva-ŋai díkɛ̀ dítii kɛ̂i lai. 45Díkɛ Ɣâla ŋɔtíi kɛ̂i, díkɛ ǹanii wâa ǹûai dîa. Dí wule too-ƃelai da Ŋ̀âla-pɛrɛi Kɛ́tɛi ŋɔsiɣãŋ lá mɛi káa-ƃelai díkɛ̀ tíi kɛ̂i yɛ̂ɛ berei Gâloŋ Deeƃé da ǹóŋ Saloma dí m̀o la ǹûai dîai. 46Deeƃé da Asafa dítãi ma Ŋ̀âla-pɛrɛ Kɛ́tɛi mu wule too-ƃela láa túɛ nuu kɛ́tɛ è kɛ̀ ma. Da kâa laa maa tɛ̂ da sɛɣɛ-fêi wule ŋa tòo Ɣâla ma. 47Zɛrubabɛɛ da Niɛmaya dítãi ma, Eezuɛ-ƃelai kélee da kâa ŋ̀ule too-ƃelai, Ŋ̀âla-pɛrɛ Kɛ́tɛi ŋɔsiɣãŋ mɛi káa ƃelai da Liiva-ŋai díɣele kélee mii sãai tɛ̀ɛ dípɔ a fólo kélee. A gɛ̀ tí, Liiva-ŋai da díwɔ̂ mii sãai ŋáa kɔ̀lɛ dí da tɛɛ zâla láa soŋ-ƃelai pɔ́.
Currently Selected:
Niɛmaya 12: KWB
Highlight
Copy
Compare
Share
Want to have your highlights saved across all your devices? Sign up or sign in
