Niɛmaya 13
13
Eezuɛ-ŋai dí kùla ŋ̀ɔ̃ya-ŋai sáma
1Maa ɣelei tí, dí Mose ŋɔtɔ̂ŋ kɔlɔi lôno ǹûai dîɛ Ŋ̀âla-pɛrɛ Kɛ́tɛi mu. Dí gɔlɔi ŋí gwaa da ma lòno nyíi m̀o a gɛɛ Ɣâla ŋɔnûai da Amɔŋ da Môa ni dísuui su-ƃelai dífe wɔ́lɔ Ɣâla fɛli gîe ma. 2Mose è m̀ɛnii ŋí kɛ̀ a tɔ̂ŋ kpɛ́ni fêi, tãi è Eezuɛ-ŋai kùla la Ize lɔii su gɛ́ lì a diai, ǹúu suu feerɛi ŋí dífe mii sãa da kpele ya tɛ́ɛ ní dípɔ. Dí Bâlaŋ féla fè a sɛŋ káo a gɛɛ é Eezuɛ-ŋai náɣaŋ. Kɛ́lɛ Ɣâla è dínaɣaŋ lâai pène a lûwa Eezuɛ-ŋai mɛni ma. 3Tãi Eezuɛ-ŋai dí dɔ̂ŋ ŋí lóno woo mɛni lai, dí ŋ̀ɔ̃ya-ŋai kélee kpɛ̀ Díɣâla fɛli kwaa-ŋai ma.
Niɛmaya è maa fâleŋ-ŋa kɛ̀
4Zâla láa soŋ nuui Iliasi ƃé kɛ̀ a Ŋ̀âla-pɛrɛ Kɛ́tɛi ŋɔsãâi lâai kɛ́ kwaai ma mɛni láa túɛ. Da Tobaya díkɛ̀ a dínɛ̃ɛ a tãi su kôyaa. 5Loŋpo kɛ́tɛ tɔnɔ è kɛ̀ naa Ŋ̀âla-pɛrɛ Kɛ́tɛi ŋɔsama sãai ŋí lâai kɛ́ mɛni ma. Dia ƃa wîi, kéreŋ sãa kúŋ nɛ̃ɛ, Ŋ̀âla-pɛrɛ Kɛ́tɛi mu sɛŋ-folo-ŋai, da zâla láa soŋ-ƃelai dísama sãai. Wîi, ŋwã̂ai da ɔle-wulɔ sama sãa buu ɣelei díkɛ̀ naa máŋ Liiva-ŋai, Ŋ̀âla-pɛrɛ mu wule too-ƃelai da Ŋ̀âla-pɛrɛi mɛi káa ƃelai mɛni ma. Kɛ́lɛ Iliasi è lôŋpoi ŋí tɛ̀ɛ Tobaya pɔ́. 6Ńyãa Niɛmaya fé kɛ́ ní Zerusâlɛŋ tãi Iliasi è m̀ɛnii ŋí kɛ̀ lai. Ŋá lì pôlu Babelɔŋ kaloŋ Atasɛra pɔ́ naa a gɛɛ ŋá koraŋ ƃô tɛɛ bɔ́ m̀ɛni-ŋai ŋí kɛ̂i m̀ɛni ma. Ŋá lí bɔ́ naa ŋɔkâloŋ laa koraŋ buu saaƃa káo feerɛi su. Tãi kpɛ́-kpɛɛ tɛɛ́ pôlu ma, ŋá gâloŋ marê kɛ̀ a gɛɛ é ǹɛɛ naa ŋá lene pôlu. 7Nya ƃe è fàa ma ŋá lene pôlu Zerusâlɛŋ. Ńiɛɛ̂i, è kɛ̀ a gùlaa a ńyãa a gɛɛ Iliasi a Ŋ̀âla-pɛrɛ Kɛ́tɛi ŋɔloŋpoi dɔnɔ tɛɛ Tobaya pɔ́. 8M̀ɛnii ŋí è ńii tòo pôlu kpɔ́ a ŋ̀ánaa. Nya ƃe ŋá Tobaya kɔ̃liŋ kélee kùla lôŋpoi kpîŋ su ŋá bili. 9Ŋá m̀o zâla láa soŋ-ƃelai dîa a gɛɛ dí ǹanii wáa loŋpo-ŋai ŋí dîa, dí zãâi ŋí pú naa pôlu. Dia ƃa, Ŋ̀âla-pɛrɛ Kɛ́tɛi mu sɛŋ-folo-ŋai, m̀ii-sɛŋ sama sãai, da géreŋ sãa kúŋ nɛ̃ɛ sama sãai.
10Ŋá gàa máŋ a gɛɛ ŋ̀ule too-ƃelai da Liivai-ŋai da-ŋa da lí kpâlaŋ ŋá tii kɛ̂i, kpɛ́ni fêi dí kɔ́nɔŋ kula nûu fé ŋɔ́nɔ kɛ́ ni ma. 11Ŋá ńii ŋwàna ǹúu láa túɛ-ƃelai dîa kpɛ́ni fêi, dí ǹɛɛ naa Ŋ̀âla-pɛrɛi ŋɔtíi mɛni é tóo pôlu Ŋ̀âla-pɛrɛi mu. Nya ƃe ŋá pà a ŋ̀ule too-ƃelai da Liiva-ŋai dí pɛ́lɛ ŋɔ́nɔ dítii ma. 12Gɛ́ɛ tíi, Eezuɛ-ŋai kélee dí ŋɔ́nɔ pɛ̀lɛ pâi a dí wîi sama sãai buu ɣelei, ŋwã̂ai da ɔle-wulɔi. 13Ŋá zinâai ŋí tɔ̀ɔ zama sãai ŋí púi kɛ́ loŋpo-ŋai mɛi káa mɛni láa túɛ. Dia ƃa zâla láa soŋ-nuui Silɛmaya, Dɔ̂ŋ lɛ́-nuui Zadɔ, da Liivai-nuui Pidaya. Ŋá ŋɔ́nɔ ńyee lɛ̀ Anaŋ ma nyii kɛ̀ a Zakɔ ǹóŋ-surɔŋ nyii kɛ̀ máŋ a Matania ǹóŋ ŋɔlóŋ-surɔŋ a gɛɛ é kɛ́ a díkpɔŋ maa nuu. Ńâai la ǹûai ŋí díkaa a teniŋ ƃô ƃela. Da pâi kɛ̂i díi kɛ́-ƃelai dí mii sãai ŋáa kɔlɛ̂i dîa a bɔriɛɛ.
14Óo Ŋáɣâlai, díi-ŋai kélee ŋa gɛ̂i ípɛrɛi mɛni ma da berei ŋa ífɛli perei púi la pere mai, gélee kíli é lɛ́ɛ íŋa.
15Tãi ŋá pà la pôlu Zudai, ŋá nûa kàa díkɛ Vii-tɔɔ-ɣelei maa tĩa kàra. Da-ŋa díkɛ̀ kpɔmɔ-ƃa lúanîi, da-ŋa díkɛ ŋwã̂ai, fîi, wîi, kpɔmɔ-ƃa kpiri-ŋa da kpîri da kpɛ́ni-ŋa pûi wɛlɛ-sôo-ŋa mɛi díkɛ pà a dia Zerusâlɛŋ a Vii-tɔɔ-ɣelei. Nya ƃe ŋá dílîa woo ƃò a gɛɛ dífe pɔni tɔ̂ɔ a Vii-tɔɔ-ɣelei. 16Taya taa-leei su-sinaai da-ŋa nyii-ŋai dí séɛɛ è kɛ̀ Zerusâlɛŋ, díkɛ̀ pâi máŋ a nyɛ̃ɛ da sɛŋ fôlo-ŋa díkɛ díkɔ̀lɛ Zuda da Zerusâlɛŋ-ƃelai dîa a Vii-tɔɔ-ɣelei. 17Nya ƃe ŋá ńii ŋwàna Zuda-ŋai láa túɛ-ƃelai dîa ńyɛɛ dîai, “Ká káa Vii-tɔɔ-ɣelei maa tĩa karâi. Mɛni nyɔ́mɔɔ ká tí ka gɛ̂i. 18M̀ɛni tɔ̂nɔi ŋí nɔ́ ƃé ká nâŋ-ni dí wɔ́lɔ gɛ̀ Ɣâla kɛ́ díkula maa kɛ̂. È dísu kàra da daa lêei ŋí. Ká káa nɔ́ Vii-tɔɔ-ɣelei maa tĩa karâi a tãi kélee. Nyíŋi a gɛ̂i Ɣâla ŋɔlii ŋwânai su kɛ́ kɛ̀tɛ Eezuɛ ma.”
19Ŋá mò a gɛɛ dí daa lêei ŋɔsiɣãŋ-ŋai láa tɛ́ a Vii-tɔɔ-ɣelei maa tûa ɣele wulii. Dífe dílaa ƃò é lɛ́ɛ la zu Vii-tɔɔ-ɣelei é tɛ́ɛ. Ŋá ŋátii kɛ́-ƃelai da-ŋa pù ziɣãŋ-ŋai kélee lá a gɛɛ núu da fé tɛ̀ daa lêei su a kpîri a Vii-tɔɔ-ɣelei. 20Pɔni sîi támaa tɔɔ-ƃela dí pà ziɣãŋ-ŋai ŋí lá Zerusâlɛŋ gîei tɔnɔ kpaa feerɛ a Vii-tɔɔ-ɣelei maa tûa ɣele wulii dí nyíi naa kpɛ́ni fêi, pere fé kɛ́ ní naa a gɛɛ dí lɔ́. 21Kɛ́lɛ ŋá dília wôo ƃò ńyɛɛ diai, “Ka lí pôlu. A nɛ̃ɛ ma kpîŋ ká lɛ́ɛ ƃɛ́ ɣele é ƃɔ́ ká fé pâi lɔ̂i. Ka ŋɔ́nɔ pà ƃɛ́ pôlu, ŋa pâi gɛ̂i dí ká kpɛ́.” É kúla tãi tí ma, dífe wɔ́lɔ pá ní pôlu a Vii-tɔɔ-ɣelei. 22Naa pôlu ma, ŋá m̀o Liiva-ŋai dîa a gɛɛ dí ǹanii wáa dîa, díkɛ pà ziɣãŋ-ŋai lá díkɛ ǹaa mɛi kâa a Vii-tɔɔ-ɣelei kélee núu da fé maa tĩa kàra.
Óo ŋá Ɣâlai, ŋ́gili é lɛ́ɛ í ŋá m̀ɛnii ŋí mɛni ma. Íwɛli kɛ́ maai kɛ̂tɛi. Ŋá fúlu-laai maa kɔ̃ɔ.
23Ŋá ŋ̀á kàa máŋ a tãi tí a gɛɛ Zuda-sinaai dámaa ɣele dí sîi nɛyaa kùla. Zîi nɛyâai ŋí dí kùla Asɔdɔ, Amɔŋ da Môa nuu-suu-ŋai sáma. 24Dílônii gbulu tɔ̂nɔ da kâa Asɔdɔ sii wooi ƃò da sîi woo da kpɛ́ni ŋa. Da fa kâa pɔ̀ri Ibulu-wooi ƃôi nyíi gáa a kúkpɔɔi sii wooi. 25Ŋá ńii ŋwàna dîa ŋá dí náɣaŋ. Ŋá da-ŋa lòkwa, ŋá díŋuŋ nîa wêyeŋ. Ŋá gɛ̀ dí dífoo a Ɣâla láa a gɛɛ dífe pâi wɔ́lɔ ŋɔ́nɔ sîi da kpɛ́ni ŋa dílônii-nɛyâai da kulâi a dínɛyâa kpaa máŋ dílônii-nɛyãai da é sîi da kpɛ́ni kúla a surɔ̂ŋ. 26Ŋá m̀o dîa ńyɛɛi, “Sîi da kpɛ́ni nɛni kúlaa ƃé gɛ̀ Gâloŋ Saloma kɛ́ Ɣâla ŋɔtɔ̂ŋ kâra. Lɔii ŋuŋ da mɛi kâloŋ fé kɛ́ ní a zeriɛɛ bɔ́. Ɣâla è ŋ̀wɛli a ŋ̀ánaa é gɛ́ a Eezuɛ lɔii gwaa kélee mɛi kâloŋ. Berei máŋ è kɛ̀ tí lai, sîi nɛyaa kula mɛni è gɛ̀ sɔnyɔ̂ŋ è ǹyée mɛi ɣále. 27A kɛ̀ tí kwa pɔ̂ri siai ká kɔ́ɔ pɔ̂ɔi, kú Ɣâla ŋɔwóoi píli a sîi nɛyaa da kpɛ́ni-ŋa kuláa?”
28Iliasi è kɛ̀ a sâla láa soŋ nûu kɛ́tɛ. Ǹóŋ-surɔŋ láa ƃé kɛ̀ a Zioada. Zioada ǹônii-sinaai dɔnɔ è Saŋbala ǹóŋ-nɛnii kùla a ŋɔnɛnî. Saŋbala pɔ́ taai ƃé kɛ̀ a Bɛ-orɔŋ. Nya ƃe ŋá gɛ́ dí Zioada kpɛ́ Zerusâlɛŋ.
29Óo Ŋáɣâlai, gono têei í gɛ̀ zâla láa soŋ-ƃelai da Liiva-ŋai yêei, da díyee kúla mù. M̀ɛni ma dí kula maa kɛ́.
30Ǹanii kélee dí zìɣe ǹɔii da kpɛ́ni su-ƃelai dîai, ŋá gélee wàa dîa. Ŋá zâla láa soŋ-ƃelai da Liiva-ŋai dítii-ŋai kɛ́ pere su sãa, a gɛɛ díkelee díkɛ a dítii kɔ́lɔŋɔɔ a tɛ̀ɛ-ŋa. 31Ŋá m̀ɛni-ŋai ŋí kélee kɛ́ pere su sãa. Tãi maa nɛ̃ɛi dí pá la a géreŋ sãa kéreŋ kɔi, tãi maa nɛ̃ɛi dí pa la a wîi maa ŋuŋ da tãi maa nɛ̃ɛi dí dísi-sãai m̀á buu ɣele-ŋai ŋáa tɛ́ la gîe mai.
Óo Ŋáɣâlai, m̀ɛnii ŋí kélee é lɛ́ɛ íkili ŋá, í lûwa láa ḿâ.
Currently Selected:
Niɛmaya 13: KWB
Highlight
Copy
Compare
Share
Want to have your highlights saved across all your devices? Sign up or sign in
