Niɛmaya 11
11
Ǹûai díseɛɛ è kɛ̀ Zerusâlɛŋ
1Ǹûai láa túɛ-ƃelai da dínûai dí nâa sèe Zerusâlɛŋ nyii gáa a daa-lee maa waai. Kɛ́lɛ pɛ́rɛ támaa fé kɛ́ ní naa ǹɔii lônii kpéli-ŋai mɛni ma. Núu suu puu sáma, dɔnɔ nɔ́ ƃé zu-ƃela kɛ̂i è kɛ̀ ma daa lêei su. Dí kpɛɛŋ tôo a gɛɛ dí ǹúu suui káa zu-ƃela da pɔ̂ri seêi ǹaa. Kɛ́lɛ ǹûai kpéli-ŋai dí sèe Zuda lɔii ŋɔtaa-lee kpéli-ŋai su. 2Ǹûai kélee dí Ɣâla marê kɛ̀ a gɛɛ é lûwa láa gbakolo-ŋai dîa dílii é kùla a gɛɛ dí sée Zerusâlɛŋ. 3Eezuɛ-ƃelai da-ni, zâla láa soŋ-ƃelai, Liiva-ŋai, diai kɛ̀ tíi kɛ̂i Ŋ̀âla-pɛrɛ Kɛ́tɛi mui, da Gâloŋ Saloma ŋɔtíi kɛ́-ƃelai dísuui su sinaai dí lì dí sée Zuda lɔii ŋɔtaa-leei gbéli-ŋai su dí kɔ̃liŋ-ŋai mɛi. Kɛ́lɛ ǹɔii kpîniŋ-ŋai mɛi-ƃelai dí sèe Zerusâlɛŋ da dínûai.
4-5Zuda da Bɛŋsima dí suui su-ƃelai da-ni dí sèe Zerusâlɛŋ. Zuda ŋɔsuui su-ƃelai veerɛ ƃé sèe Zerusâlɛŋ da dínûai. Ǹûa feerɛi ŋí láa ƃé kɛ̀ a Adaia da Maaseia. Adaia ŋɔnúu pɔ̂lɔ-ŋai láa ká ŋí. Maâlalɛ nyii kùla Pɛrɛzi ŋɔsuui sui ǹóŋ-surɔŋ ƃé kɛ̀ a Sifatia. Sifatia ǹóŋ-surɔŋ ƃé kɛ̀ a Amaria. Amaria ǹóŋ-surɔŋ ƃé kɛ̀ a Zɛkɛraya. Zɛkɛraya ǹóŋ-surɔŋ ƃé kɛ̀ a Uzia. Uzia ǹóŋ-surɔŋ ƃé kɛ̀ a Ataya. Maaseya ǹyaŋ ŋɔnúu pɔ̂lɔ-ŋai láa ká ŋí. Zɛkɛraya nyii kùla Sila ŋɔsuui sui, ǹóŋ-surɔŋ ƃé kɛ̀ a Zoyaribi. Zoyaribi ǹyaŋ ǹóŋ-surɔŋ ƃé kɛ̀ a Adaia. Adaia ǹóŋ-surɔŋ ƃé kɛ̀ a Azaya. Azaya ǹóŋ-surɔŋ ƃé kɛ̀ a Kowozɛ. Kowozɛ ǹyaŋ ǹóŋ-surɔŋ ƃé kɛ̀ a Maaseya. 6Pɛrɛzi ŋɔsuui su-ƃelai sèe Zerusâlɛŋ, díkɛ̀ a kpakolo wála-walaa ŋuŋ náaŋ pôlu buu lɔ́ɔlu mɛi da kao lɔ́ɔlu mɛi saaƃa (468).
7Bɛŋsima ŋɔsuui su-ƃelai láa túɛ-ƃelai nyii-ŋai sèe Zerusâlɛŋ ƃé kɛ̀ a Salu nyii kɛ̀ a Mɛsulaŋ ǹóŋ. Mɛsulaŋ nyaŋ è kɛ̀ a Zoɛ ǹóŋ ŋɔloŋ. Dínûa-pɔ̂lɔ ŋai da-ni ƃe kɛ̀ a Pidaya, Kolaya, Maaseia, Itiɛ da Zesaya.
8Gabai da Salai díkɛ̀ a Salu ŋɔkáayɔɔ ŋa. Bɛŋsima ŋɔsuui su ƃelai nyii kélee sèe Zerusâlɛŋ, díkɛ̀ a kpakolo ŋuŋ lɔ́ɔlu mɛi náaŋ pôlu buu feerɛ kao lɔ́ɔlu mɛi saaƃa (928). 9Zikari ǹóŋ-surɔŋ Zooɛ ƃé kɛ̀ a dílaa túɛ-nuu daa-leei su. Asɛnua ǹóŋ-surɔŋ Zuda ǹyaŋ gɛ́ ƃò a gɔlɛ ma-nuu.
10Zâla láa soŋ-ƃelai dínuu suui láa túɛ-ƃelai nyii-ŋai sèe Zerusâlɛŋ dia ƃa, Zidaya nyii kɛ̀ a Zoyaribi ǹóŋ-surɔŋ, Zakiŋ. 11Seraya ǹâŋ láa ƃe kɛ̀ a Ɛɛkea, nyii kɛ̀ a Mɛsulaŋ ǹóŋ ŋɔloŋ. Dínâŋ pɔ̂lɔ-ŋai ƃe kɛ̀ a Zadɔ, Mɛraiɔ, da Aitu, nyii kɛ̀ a zâla-laa-soŋ nuu kɛ́tɛi. 12Seraya ŋí ŋɔsuui su-sinaai kɛ̀ tíi kɛ̂i Ŋ̀âla-pɛrɛ Kɛ́tɛi mui, díkɛ̀ a núu ŋuŋ lɔ́ɔlu mɛi saaƃa pôlu buu feerɛ kao feerɛ (822). Zâla láa soŋ-nuui
Adaia máŋ è sèe Zerusâlɛŋ. Ǹâŋ láa ƃé kɛ̀ a Zɛroaŋ. Ǹâŋ pɔlɔ kpéli-ŋai láa ƃé kɛ̀ a Pilaliya, Aŋzi, Zɛkɛraya, Pasiɔ, da Maakiza. 13Adaia ŋí ŋɔsuui su-ƃelai kélee dí kɛ̀ a sinâa ŋuŋ feerɛ pôlu buu náaŋ kao feerɛ (242).
Zâla láa soŋ-nuui Amasai ǹyaa máŋ è sèe Zerusâlɛŋ. Ǹâŋ láa ƃé kɛ̀ a Azarɛ. Ǹâŋ pɔlɔ kpéli-ŋai ƃé kɛ̀ a Azai, Mɛsilemɔ, da Imɛ. 14Gɔ-kuluƃa-ŋai kɛ̀ ǹúu-suui ŋí sui, díkɛ̀ a kpakolo ŋuŋ tɔnɔ pôlu buu feerɛ kao lɔ́ɔlu mɛi saaƃa (128). Dí láa túɛ-nuu kɛ́tɛi ƃé kɛ̀ a Agidoliŋ ǹóŋ-surɔŋ Zadiyɛ.
15Liiva-ŋai dámaa dísèe Zerusâlɛŋ. Maa-ŋuŋ ƃé kɛ̀ a Simaya nyii kɛ̀ a Aasɔɔ ǹóŋ-surɔŋ. Ŋɔnûa pɔlɔ-ŋai ƃé kɛ̀ a Azirikaŋ, Asabiya da Buni. 16Liiva nuu feerɛi ŋí, Sabɛtai da Zozaba dia máŋ dí séɛɛ è kɛ̀ Zerusâlɛŋ. Ǹûai ŋí ƃé kɛ̀ Ŋ̀âla-pɛrɛ Kɛ́tɛi ŋ̀íne ŋá tii kɛ́ mɛni-ŋai mɛi.
17Matania è kɛ̀ a Liiva-nuui dɔnɔ nyii zeɛ́ɛ è kɛ̀ Zerusâlɛŋ. Ǹâŋ láa ƃé kɛ̀ a Maka. Matania ǹâŋ pɔlɔ-ŋai ƃé kɛ̀ a Zadí da Asafa. Matania ŋí ƃé kɛ̀ a Ŋ̀âla-pɛrɛ Kɛ́tɛi ŋɔwule too-ƃelai láa túɛ-nuu. È kɛ̀ a ŋ̀ule too-ƃelai téniŋ tɔ̀ɔ nûu zɛɣɛi fé wule-ŋai tòo pere su.
Bakukiya ƃé kɛ̀ a Matania kɔlɛ ma nuu. Aƃida nyaa máŋ è kɛ̀ a Liiva-nuui dɔnɔ nyii zeɛ́ɛ è kɛ̀ Zerusâlɛŋ. Ǹâŋ láa ƃé kɛ̀ a Samua. Ǹâŋ pɔlɔ-ŋai láa ƃé kɛ̀ a Gala da Zedutuŋ. 18Liiva-ŋai sèe Zerusâlɛŋ daa-lee maa-waai sui, díkelee díkɛ̀ a núu ŋuŋ feerɛ pôlu buu lɔ́ɔlu mɛi saaƃa kao náaŋ (284).
19Ŋ̀âla-pɛrɛ Kɛ́tɛi mɛi káa-ƃelai da díkaayɔɔ-ŋai sèe Zerusâlɛŋ díkɛ̀ a kpakolo ŋuŋ tɔnɔ pôlu buu lɔ́ɔlu mɛi feerɛ kao feerɛ (172). Dí láa túɛ-ƃelai ƃé kɛ̀ a Aku da Taamɔŋ.
20Eezuɛ-ŋai, zâla láa soŋ-ƃelai da Liiva-ŋai kélee dífe kwaa ma sɔlɔ ƃó ní Zerusâlɛŋ taa-leei su. Diai dífe kwaa ma sɔlɔ ƃó nii, dí lì Zuda lɔii su taa-ŋai su dí sée dí ǹûai kɔ̃liŋ-ŋai mɛi tɛi-tɛi. 21Ŋ̀âla-pɛrɛ Kɛ́tɛi mu tii kɛ́-ƃelai dí sèe Zerusâlɛŋ taa-leei m̀ɛ́i da dòli a Ofɛɛ Yeei ma. Ziɣa da Zipa ƃé kɛ̀ a dílaa túɛ-ƃela.
22Liiva-ŋai kɛ̀ seê ni Zerusâlɛŋ dí láa túɛ-nuui ƃé kɛ̀ a Uzii. Uzii ǹâŋ láa ƃé kɛ̀ a Bani. Ǹâŋ pɔlɔ-ŋai ƃé kɛ̀ a Asabiya, Matania da Asafa. Asafa ŋɔsuui su-ƃelai ƃé Ŋ̀âla-pɛrɛ Kɛ́tɛi mu-wule too mɛ̂nii è kɛ̀ dîa. 23Gâloŋ è tɔ̂ŋ kpɛ̀tɛ ŋ̀ule too-ƃelai mɛni ma. Dɔ̂ŋ ŋí è diai lɛ̂ dímaa nɛ̃ɛ̂i dí wule tóo a ŋ̀ele-kuu tɛi-tɛi da ŋ̀ule-ŋai maa nɛ̃ɛ̂i dí doo Ŋ̀âla-pɛrɛ Kɛ́tɛi mu a dí tãi.
24Pitaiya ƃé kɛ̀ a Eezuɛ-ŋai ŋɛ́i gáo Pɛsia kaloŋ ŋɔkâloŋ laai su. Pitaiya ǹâŋ láa ƃé kɛ̀ a Misizabɛ. Misizabɛ è kùla Zera ŋɔsuui su. Zera nuu suui ŋí séɛɛ è kɛ̀ Zuda lɔii kpiniŋ su.
Daa lêe-ŋai da daa da kpɛ́ni-ŋa su-ƃelai
25Zuda-ƃelai da-ŋa dí sèe daa-ŋai ŋí su da ǹaa kɔlɛ ma kpanaŋ-ŋai: Kiria Aba, Dibɔŋ, da Zɛkazɛɛ. 26Da-ŋa dí sèe Zasua, Molada da Bɛpelɛ. 27Da-ŋa dí sèe Azasua, Bɛɛsiba da ǹaa kɔlɛ ma kpanaŋ-ŋai lá. 28Da-ŋa dí sée Zikila, Mikona da ǹaa kɔlɛ ma kpanaŋ-ŋai lá. 29Da-ŋa dí sèe máŋ Ɛrimɔŋ, Zora, Zamu, 30Zanoa, Adulaŋ da dí kɔlɛ ma kpanaŋ-ŋai. Da-ŋa dí sèe Lakee da ǹaa kɔlɛ ma kpanaŋ-ŋai lá, Azika da ǹaa kɔlɛ ma kpanaŋ-ŋai lá. Da-ŋa dí sée Bɛɛsiba da Inɔŋ Tiŋ-tiŋ su loai.
31Bɛŋsima ŋɔsuui su-ƃelai dí sèe daa-ŋai ŋí su: Giƃa, Misimasi, Aiza, Bɛtɛ, da naa kɔlɛ ma kpanaŋ-ŋai lá. 32Da-ŋa dí sèe Anatɔ, Nobi, Ananaya, 33Azɔ, Lama, Gitaiŋ, 34Aadi, Zeboiŋ, Nɛbala, 35Lɔɔ, Ono da Ǹyɛrɛ kpakolo-ŋai dí Tiŋ-tiŋ su. 36Liiva-ŋai dí núu-kpulu-ŋai da-ni nyii-ŋai dí séɛɛ è kɛ̀ Zudai, dí dítɛ̀ɛ dí sée Bɛŋsima ŋɔsuui su-ƃelai sáma da dîa-ni díkɛ tíi kɛ̀ gîe ma.
Currently Selected:
Niɛmaya 11: KWB
Highlight
Copy
Compare
Share
Want to have your highlights saved across all your devices? Sign up or sign in
