Niɛmaya 10
10
1Ǹûai díyee pɔ̀ɔ kɛ̀ gono têe kɔlɔi sui, dia ƃa, Ɛkelia ǹóŋ Niɛmaya nyii kɛ̀ a ǹɔii kpîniŋ tí mɛi-nuu kɛ́tɛi da Zɛdikaya. 2Zâla láa soŋ-ƃelai ŋí máŋ díyee pɔ̀ɔ kɛ̀ gɔlɔi ŋí su: Seraya, Azaria, Zɛlemaya, 3Pasiɔ, Amaria, Maakiza, 4Atusi, Sibania, Malusi, 5Ariŋ, Mɛrimɔ, Obadaya, 6Danîa, Zinɛtɔŋ, Baru, 7Mɛsulaŋ, Aƃiza, Mizamiŋ, 8Maazia, Begai da Simaya. 9Liiva-ŋai ŋí dí díyee pɔɔ kɛ̀ gɔlɔi su: Azaniya ǹóŋ-surɔŋ Zasua, Inada ŋɔsuui su-nuui Binui da Kamɛɛ. 10Dí ƃaraâi láa ká ŋí: Sibania, Odaya, Kelita, Pilaiya, Anaŋ, 11Maka, Libɔ, Asabiya, 12Zakɔ, Seribaya, Sibania, 13Odaya, Bani da Bininu. 14Ǹûai láa túɛ-ƃelai láa ká ŋí: Parosi, Paa-moa, Elaŋ, Zatu, Bani, 15Buni, Aga, Bebai, 16Adoniza, Bivai, Adiŋ, 17Atɛ, Ɛsekaya, Azɔ, 18Odaya, Asuŋ, Bizai, 19Arii, Anatɔ, Nibai, 20Mapiasi, Mɛsulaŋ, Ɛziɛ, 21Misizabɛ, Zadɔ, Zadua, 22Pelatia, Anaŋ, Anaya, 23Osia, Ananaya, Aasɔɔ, 24Aloɛsi, Pila, Sobɛ, 25Leuŋ, Ɛsana, Maaseia, 26Aiya, Ɛnaŋ, Anaŋ, 27Malusi, Ariŋ da Baanaa.
Ǹûai díkono-tee wooi
28Kúai a Eezuɛ-ŋai, nya ƃa zâla láa soŋ-ƃelai, Liiva-ŋai, Ŋ̀âla-pɛrɛ Kɛ́tɛi mɛi káa-ƃelai, Ŋ̀âla-pɛrɛ Kɛ́tɛi mu wule too-ƃelai, Ŋ̀âla-pɛrɛ Kɛ́tɛi mu tii kɛ́-ƃelai da ǹûai láa túɛ-ƃelai kélee da ŋ̀ɔ̃ya-ŋai nyii-ŋai da díyee sée Kúɣâlai ŋɔtɔ̂ŋ mui, dí kɛ́ Ɣâla ŋɔtɔ̂ŋ mɛi kâai, é pɛ́lɛ kú lônii dîa nyii-ŋai da mɛni ŋá kàai. 29M̀ɛni ma kwa kúkono tée sâa kwa kúlaa túɛ-ƃelai a gɛɛ, kwa pâi kúyee seêi Ɣâla ŋɔtɔ̂ŋ mu, nyíi è wɔ́lɔ dɛ̀ɛ kúpɔ ŋɔtíi kɛ́-nuui Mose sârai, kú sía a m̀ɛni-ŋai kélee Yâwɛɛ è wɔ́lɔ mòi. Kwa pâi dɔ̂ŋ-ŋai, zɛŋ lɛ́ɛ-ŋai da m̀ɛni-ŋai kélee kùla Kúnuu-namui yêei, ŋ̀aa see kɛ̂i a ǹɛ́lɛɛ.
30Kúfe pâi ŋɔ́nɔ kúlônii-nɛyãai tɛɛ̂i sirɛ-taai sîi da kpɛ́ni-ŋa su. Kúfe pâi tela dílônii-nɛyãai da kulâi a nɛnî kúmɛni ma kpaa máŋ kúlônii sinaai.
31Kúfe pâi pɔni tɔɔ̂i núu da kélee yêei a Vii-tɔɔ-ɣelei da Ɣâla ŋɔɣele maa wáa da kpɛ́ni-ŋai.
Dɔ̂ŋ nyii m̀o a gɛɛ ǹɔii é víi tɔ́ɔ a góraŋ ǹɔ́ɔlu mɛi feerɛi, kwa pâi maa tɔ̂ŋ mɛi kâai. Kúfe pâi kpâlaŋ ŋá tii kɛ̂i a maa kôraŋ tí. Diai kélee kúkpa káa dîai, kwa pâi kúyee kulâi maa kpa-ŋai tí su a góraŋ tí.
32Kwa kú kóno tée ŋɔ́nɔ a gɛɛ kú kélee kwa pâi kane kpua tɛi-tɛi tɛɛ̂i a kóraŋ kélee kú Ɣâlai ŋɔpɛ́rɛi ŋɔtíi kɛ́ mɛni ma yɛ̂ɛ berei gáa la dɔ̂ŋ lá-woo mai.
33Kwa pâi kɛ̂i zãâi ŋí tɛɛ̂i Ŋ̀âla-pɛrɛ Kɛ́tɛi ŋɔtíi-ŋai kɛ́ mɛni ma, zâla kula kpôlo maa-waai, mii-sãai díkaa ŋ̀ele kélee salai kula mɛni mai, daa tulɛ-ŋai díkaa géreŋ sala-ŋai kula mɛni ma a ɣele kéleei, da Vii-tɔɔ ɣele-ŋai ma sâla sãai. Kwa pâi kɛ̂i zãâi ŋí tɛɛ̂i máŋ, Ŋ̀áloŋ ninai maa kûu kula sãai da gúu da kpɛ́ni-ŋa kula sãai, Eezuɛ ŋɔsɔnyɔ̂ŋ-ŋai su-mɛni-lɛɛ sâla sãai é pɛ́lɛ zãâ kpéle-ŋai kélee díkaa Ɣâla fɛli mɛni ma Ŋ̀âla-pɛrɛ Kɛ́tɛi mu tii-ŋai kɛ́ mɛni mai dîa.
34Kúai a zâla láa soŋ-ƃelai, Liiva-ŋai da ǹûai kélee, kwa gbɛ̀tɛ a gɛɛ kwa pâi pâi a Ŋ̀âla-pɛrɛi ŋɔkɔi sama sãai kúnâŋ ni dísuui ma a kóraŋ kélee. Kwa pâi kɛ̂i gɔi-ŋai ŋí kérenîi Kúɣâlai Yâwɛɛ ŋɔteƃelei ma Ŋ̀âla-pɛrɛ Kɛ́tɛi mu yɛ̂ɛ berei Mose ŋɔtɔ̂ŋ è ǹɛ la kûai.
35Kwa fáa ma máŋ a gɛɛ kwa pâi kɛ̂i pâi a kúsi-sãai m̀á maa ŋuŋ-ŋai a kóraŋ kélee Ŋ̀âla-pɛrɛ Kɛ́tɛi mu.
36Kwa pâi pâi a kúlônii-sinaai maa-ŋuŋ-ŋai da kútaa tûlɛ-ŋai dílônii maa-ŋuŋ-ŋai zâla láa soŋ-ƃelai pɔ́ tíi kɛ̂i Kúɣâlai ŋɔpɛ́rɛi mu, yɛ̂ɛ berei bɔ̃yɛɛ̂i ŋɔ́nɔ la Mose ŋɔtɔ̂ŋ sui.
37Kwa pâi pâi a kúsama-sãai ŋí zâla láa soŋ-ƃelai pɔ́ tíi kɛ̂i Kúɣâlai ŋɔpɛ́rɛi mui. Dia ƃa kúfilaƃa-fũa lɛ́lɛɛ-ŋai maa-ŋuŋ-ŋai, kúsi-sãai m̀á maa-ŋuŋ-ŋai, kúŋwã̂ai da kúɔle-wulɔ ninai. Daa-ŋai kwa kpalaŋ ŋá tii kɛ̂i zu a tɛ̀ɛ-ŋai, kwa pâi kúsi-sãai buu ɣelei kulâi ǹaa kú dɛ̀ɛ Liiva-ŋai pɔ́. Zãâi ŋí kula mɛ̂ni káa a Liiva-ŋai maa mɛni. 38Kwa kɛ̀ zãâi ŋí tɛɛ̂i Liiva-ŋai pɔ́, fɛ̂ɛ Eelɔŋ ŋɔsuui su sâla láa soŋ-nuui da è kɛ́ naa. Tãi da pâi zãâi ŋí kélee sɔlɔ ƃôi lai, Liiva-ŋai dí gélee pú gîei, dí ŋ́aa kɔlɛ puu. Dí buui dɔnɔ siɣe dí lí la zãâi pûi kɛ́ kwaai ma Ŋ̀âla-pɛrɛ Kɛ́tɛi mu. 39Kúai a Eezuɛ-ŋai da Liiva-ŋai, kwa pâi liî a wîi, ŋwã̂ai da ɔle-wulɔi Ŋ̀âla-pɛrɛ Kɛ́tɛi ŋɔsãâ pûi kɛ́ kwaai ma ƃɛ́i da Ŋ̀âla-pɛrɛi mu tii kɛ́-sãai pûi kɛ̀ naai. Gwaai tɔnɔi ŋí ma ƃé zâla láa soŋ-ƃelai, Ŋ̀âla-pɛrɛi mɛi káa-ƃelai da ŋ̀ule too-ƃelai dí kɛ̂i káa naa.
Kúfe pâi kúyee kulâi Kúɣâlai ŋɔpɛ́rɛi maa mɛ̂ni mu.
Currently Selected:
Niɛmaya 10: KWB
Highlight
Copy
Compare
Share
Want to have your highlights saved across all your devices? Sign up or sign in
