Zôo 38
38
Ɣâla è Zôo wóo su tòo
1Naa kɛ́ɛ tíi, Yâwɛɛ è lòno Zôo pɔ́ vãa kɛ́tɛi su ǹyɛɛ mai,
2“Lé wala-wala-laa ƃé íyêei
a gɛɛ í ŋámɛni kpɛtɛɛi kpéra a í ƃoo lôno-ŋai?
3Í mu-siɣe í ísama ɣíri yɛ̂ɛ kpakolo.
Ŋa pâi í marê kɛ̂i ízu-kula mî.
4À kɛ̀ ya mɛni ŋá kàa kpɔ́ a ǹɛ́lɛɛ kɛ́ɛ ŋí,
mí ƃé íkɛ̀ naa tãi ŋá kɛ̀ ŋ̀éniɛi ŋí kɔ́ɔ pîlanii lai?
5Gbɛ̂ɛ ƃé gɔ̀ɔŋ-maa lɛ̂i?
Tɔ̃yâ ma í gɔ́lɔŋ.
Gbɛ̂ɛ ƃé gɔ̀ɔŋ é gáa a gɛɛ zãâi?
6Lé sɛŋ ƃé ŋ̀éniɛi yée mu-wuru-ŋai tɔɔ̂i mɛi?
Kpaa máŋ gbɛ̂ɛ ƃé zônoŋ-su kɔni-ŋai lâa ǹâai,
7ŋ̀ele-wala pɛmɛlɛŋ-kao-ŋai díkɛ̀ wule tôo mà
ŋ̀âla-taa kela-ŋai dí kɛ́ lii-nɛ̃ɛ kùlai?
8“Gbɛ̂ɛ ƃa yúo kpèra a gɛɛ vé ɣíliŋ ǹɔii ma gwaa kélee,
tãi ǹya-lee-ŋai da fɛ̂ɛ la dí táa-taa ǹɔii mai?
9Ńyãa ƃé yúo maa kpîniŋ a ŋ̀ele-kɔlɔŋ kolei,
ŋá gɛ́ a zu-kpiniɛɛ.
10Ńyãa ƃé yúo ŋɔgɔyɛŋ-perei lâa,
a gɛɛ vé fɛ̀ɛ é tɛ́ zîŋ ŋá.
11Ŋá mò ma ńyɛ̂ɛi, ‘Yúo, ya pɔ̂ri nɔ́ kperâi ƃɛ́.
Ífa naa maa tîyeŋ. Ƃɛ́ ŋí nɔ́ ƃé í kpéra naa a ízikɛ-zikɛi.’
12Íkɛ-ɣeniɛi su, ya tá wɔ́lɔ mó ɣele-ƃɔi tãi ma a gɛɛ é pá,
kpaa máŋ í gɛ́ ɣele é ƃɔ́?
13Ya tá gɛ́ ŋ̀ele-ƃɔi kwaa ponoɔɔi é táa-taa ǹɔii ƃéla kélee ma,
nyii a gɛ́ ŋ̀wana-lɔ̂ɔ-ƃelai dí púi?
14Ɣele a ƃɔ̀, núu a ǹyée-ŋai da diŋ-tiŋ-ŋai kélee kàa,
yɛ̂ɛ berei núu a seɣe pɔ̃yɛ kaa lai,
kpaa máŋ yɛ̂ɛ berei núu a pɔ́ɔ-ŋa kàa la ƃóo pɔ̂rɔ mai.
15Ŋ̀ele ƃɔ́ɔi su ponoɔɔ̂i a ŋánaa ŋ̀wana-lɔ̂ɔ-ƃelai mɛni ma.
A gɛ̀ dífa pɔ̂ri mɛni nyɔ́mɔɔ kɛ̂i a núu da.
16“Ya tá wɔ́lɔ lí yúo ŋɔya ɣîliŋ su,
kpaa máŋ í sía gáo ma?
17Núu da a tá wɔ́lɔ saa-taa perei su kpòŋ lá lɛ́ yâ,
nyii gáa a zaa-ƃelai dítaai su kpíniɛɛi lá kpoŋ?
18Í ŋ̀éniɛi ŋɔsu-kɛtɛ kɔ́lɔŋ?
Ye ŋ́oo su too à kɛ̀ í gɔ́lɔŋ.
19“Í ƃɛ́i kɔ́lɔŋ kwaa ponoɔɔ a kûla naai,
kpaa máŋ ƃɛ́i kpíni a lî naai?
20À kɛ̀ í naa kɔ́lɔŋ, gɛ̀ ní ya pɔ̂ri ƃɛ́i lɛ̂i dîa da lî naai
da ƃɛ́i da pɔ̂ri lenêi naa pôlui.
21Ya gɛ̂i yɛ̂ɛ sɛŋ ƃé í pɔlɔ-pɔlɔi
í kɛ́ ƃò naa a tãi ŋá kɛ̀ ǹɔii kpɛ̂tɛi lai.
22“Ya tá lí ƃɛ́i ŋá kɔ́lɛ
da sãɔ lâai kɛ̀ naai?
23Ŋa dílâai kɛ̀ mɛni kpɔ̂lu,
làa-sâa da kɔ́kɔ mɛni ma.
24Í ƃɛ́i kɔ́lɔŋ kwaa ponóɔɔ a kûla naai,
kpaa máŋ ƃɛ́i vãai nyii a kûla vóloi ƃélai perei a lî naai?
25“Gbɛ̂ɛ ƃé berei láa ƃò ŋ̀ele-gbanai perêi,
da duna kɛ́tɛi nyii a kɛ̂ pûi ǹɔii mai?
26Gbɛ̂ɛ ƃa gɛ̀ tuna kɛ́ pù gwaa-ŋai ma,
kpaa máŋ vɛ̃ɛ-kpâlaŋ su ƃɛ́i núu da fé naai?
27Gbɛ̂ɛ ƃa gɛ̀ tuna é pú ǹɔii kpâlai ma
a gɛɛ gala-ŋai dí sóoi?
28Tuna kpaa máŋ lúu ǹâŋ káa mà yɛ̂ɛ núu-kpune?
29Kɔ́lɛ ǹee káa mà nyii maa sɔlɔ ƃôi?
Kɔ́lɛ kâne ǹee káa mà yɛ̂ɛ núu-kpune,
30nyii a gɛ̀ ǹyái é kpanaŋ yɛ̂ɛ kɔni,
yúo é kpanaŋ?
31“Ya pɔ̂ri bɛmɛlɛŋ-kao kpului nyii da dòli a géleŋ ma-wûui kpulɔ̂ni gîe ma?
Kpaa máŋ ya pɔ̂ri bɛmɛlɛŋ-kao kpului nyii da dòli a ǹiyeŋ-kpului ŋ̀ɛli teêi ma?
32Ya pɔ̂ri gɛ̂i bɛmɛlɛŋ-kao-ŋai dítɔɔ ŋ̀elei su a tãi maa nɛ̃ɛ̂i dítɔɔ lai?
Ya pɔ̂ri gɛ̂i bɛmɛlɛŋ-kao kpulu-loŋ da gbulu kɛ́tɛi dí tɔ́ɔ dítɔ̂ɔi ŋ̀elei su?
33Í ŋ̀elei su mɛi káa tɔŋ-ŋai kɔ́lɔŋ?
Ya pɔ̂ri dɔ̂ŋ-ŋai ŋí kɛ̂i ŋ̀aa-see é kɛ́ ǹɔii ma ƃɛ́?
34“Ya pɔ̂ri lâɣii ŋ̀elei su ma
a gɛɛ tuna é pú ǹɔii ma?
35Ya pɔ̂ri gɛ̂i ŋ̀ele-gbana é tóo,
é pá é gólaŋ ƃó yɛ̂?
36Gbɛ̂ɛ ƃé táre tɛ̀ɛ ŋ̀ele-kɔlɔŋ pɔ́ a gɛɛ é tuna pú ǹɔii mai?
Gbɛ̂ɛ ƃé táre tɛ̀ɛ ǹuui pɔ́ a gɛɛ é pɛ́lɛ gɛ́ pui?
37Gbɛ̂ɛ ƃé táre káa ǹyêei a gɛɛ é ŋ̀ele-kɔlɔŋ kolei lóno,
kpaa máŋ é gɛ́ tuna é pu,
38é gɛ́ bɔ̂rɔi é kane a gbanaŋɔɔ,
é gɛ́ bɔ̂rɔ-kane-ŋai díkanaŋ díkîe-ni dîai?
39“Ya pɔ̂ri yala-sulu-ŋa ŋáa kɔŋ-nii?
Ya pɔ̂ri yala-sulu lonii-ŋa kɛ̂i dípila dílii é láa,
40a tãi da kɛ̂ la díkɔni wôlo-ŋai sui,
kpaa máŋ í díkɔnɔŋ lɔ́ dîa dí kɔni wôloi su?
41Gbɛ̂ɛ ƃa gɔ̃ɔ-ŋai kɔ́nɔŋ kùla a tãi puru a dílônii kɛ̂i lai,
díkɛ ɣíliŋ díkɛ wɔ̀lɔ Ɣâla ma a gɛɛ é kpɔ́ŋ dîa é dí kɔ́nɔŋ kulai?”
Currently Selected:
Zôo 38: KWB
Highlight
Share
Compare
Copy
Want to have your highlights saved across all your devices? Sign up or sign in
