Zôo 37
37
1“Vãai è gɛ̀ ŋá yao kpɔ́ ńii kɛ́ kpɛ̃liŋ ŋ́goi.
Ŋá yào kpɔ́ ńii é tée ŋ́goi.
2Kà káwoli tɔ́ɔ Ɣâla wóo ma.
Ŋ̀óo káa yɛ̂ɛ ŋ̀ele-gbana à kɛ̀ toôi.
3A gɛ̀ ŋ̀ele-gbanai ŋɔmãla-mãlai kɛ́ tɛ̀ɛ ŋ̀elei su.
Ŋ̀elei ŋɔmãla-mãlai ŋí a kɛ̂ tɛɛ̂i ŋ̀elei m̀éla kélee ma.
4A kɛ̀ tí, Ɣâla wóo a kɛ̂ tɛ̂i a wála-wala-pere.
Ǹyaŋ bere sîi tɔnɔi tí nɔ́ ƃé a kɛ̂ ŋ̀elei ŋɔmãla-mãlai tɛɛ̂i la.
5Ɣâla a lòno, ŋ̀óo a kɛ̂ yɛ̂ɛ ŋ̀ele-gbana tíŋ,
ǹyaŋ ya ŋ̀óo mɛ̀ni, a kɛ̂ a mɛni maa pɔlɔ-pɔlɔɔ.
A mɛni kpaya-kpaya kɛ̀ nyii núu fa tarê zui.
6Ɣâla a sãɔ tɛ̀ɛ ǹɔii ma,
é gɛ́ tuna kɛ́tɛ é pú ǹɔii ma.
7Ɣâla a gɛ̀ ǹûai dítee dítii-ŋai kɛ́ɛ ma
a gɛɛ dí ŋɔwála-wala-laai kɔ́lɔŋ.
8Ǹɔɔ fɛnɛ-sãai da dílòo ǹóa-ŋai su.
9Duna-fãai a kûla yá-kwara-pere,
gɔ́lɛi kɛ́ kùla yá-ŋua-pere.
10Ɣâla a ǹɛ̂wo pù ǹyá-ŋai dîa
dí kpanaŋ kpɔ́ yɛ̂ɛ kɔ́lɛ kane.
11Ɣâla a ŋ̀ele-kɔlɔŋ láa fɛ̀ɛ a tuna,
é gɛ́ ŋ̀ele-gbanai kɛ́ kɛ̀ mãla-mãla ŋ̀ele-kɔlɔŋ su.
12Ɣâla a gɛ̀ ŋ̀ele-kɔlɔŋ kolei kɛ́ tìnaŋ,
a gɛɛ é Ɣâla wóo ŋ̀aa see kɛ́ ŋ̀éniɛi gwaa kélee.
13Ɣâla a tuna tɛ̂ɛ a gɛɛ é ǹɔii yɔ́ɔ.
Tãi da a dɛ̀ɛ a gɛɛ é núu kúla maa kɛ́,
kpaa máŋ é ŋɔwɛli kɛ́-maai lɛ́.
14“Zôo, ye tɔɔ í m̀ɛni maa pɔlɔ-pɔlɔɔ-ŋai káa Ɣâla a gɛ́i.
15Í bere kɔ́lɔŋ Ɣâla a gɛ̀ la ŋ̀ele-kɔlɔŋ kolei kɛ́ ŋ̀óo mɛnii?
Kpaa máŋ é gɛ́ ŋ̀elei ŋɔmãla-mãlai kɛ́ tɛ̀ɛ ŋ̀ele-kɔlɔŋ kolei sui?
16Í berei kɔ́lɔŋ ŋ̀ele-kɔlɔŋ kolei kɛ́-pere káa la ŋ̀elei sui,
nyii gáa a díi kpaya-kpayai Ɣâla a gɛ́i?
17Tãi séɣai-pere fãai a kɛ̂ pâi lai,
a gɛ̀ íkponôi é wúleŋ.
18Ya pɔ̂ri kpɔnîi Ɣâla ma ŋ̀ele-kɔlɔŋ kolei kpɛtɛ mɛni ma
gɛ́ fôlo yɛ̂ɛ mɛ̃lɛ-mɛ̃lɛ?
19M̀ɛnii lɛ́ kûa nyii kwa pɔ̂ri môi mài.
Kúkili-ŋa tɛiɣiɛ̂ɛi kúfa pɔ̂ri mɛni da ƃôi.
20Ḿva pɔ̂ri mare kɛ̂ɛ kɛ̂i a gɛɛ ŋá lóno Ɣâla pɔ́.
Núu da fa pɔ̂ri kɛ̂i a moɔɔ a gɛɛ é gɛ́ Ɣâla é bàa.
21“Núu da fa pɔ̂ri vólo-kaoi kâai ŋ̀elei su,
tãi vãai a ŋ̀ele-kɔlɔŋ kolei kûla la berei.
A kɛ̂ fóloi kpɔ́ a ŋánaa.
22Ɣâla ŋɔfólo-laai è kùla yá-ŋua pere.
Ŋ̀wála-wâla kélee Ɣalai ŋɔmaa waa-laa kɛ́tɛi a gɛ̀ kú yao m̀a.
23Núu da fa Ŋ̀wála-wâla kélee Ɣâlai kâa.
Ŋɔwála-wala-laai kɛ̂tɛi.
Zɔŋ lɛ̂lɛɛi, deniŋ ƃôɔɔ, va núu fìli.
24M̀ɛni ma nûa da yâo m̀a.
Ǹúui kélee a gbîŋ sìɣe a táre-nuui, Ɣâla fa ǹyée sèe mu.”
Currently Selected:
Zôo 37: KWB
Highlight
Share
Compare
Copy
Want to have your highlights saved across all your devices? Sign up or sign in
