Zôo 39
39
1“Í góraŋ m̀ɛ́ tãi kɔ́lɔŋ ǹyéei su ƃoli-ŋai da dí kàa lai?
Ya tá sôlo-sua káa gɛ́ gàa?
2Í ŋ̀áloŋ kɔ́lɔŋ vɛnɛ-sãai ŋí koo a gɛ̀ dîai
da tãi da díkàa lai?
3Í tãi kɔ́lɔŋ da dímaa pɛ̂lɛ la díkɛ díkàa
a gɛɛ dílônii dífa lâa too lâa ǹɔii ma a díkaa tãi?
4Dílônii da ƃɔ̂lɔ ǹɔii su da kɛ̀tɛ dí dílee-ni lɛɛ naa
dí li díkpɔɔi yee ma dífa ŋɔ́nɔ lène pôlu dílee-ni pɔ́naa.
5“Ŋ̀wɛlɛ-sôo-ŋai nyii-ŋai dínuu-namu fé mai, gbɛ̂ɛ ƃé díŋuŋ ma ƃò,
é dífùloŋ é dílɛɛ naa díkɛ sìa díkpɔɔi yee mai?
6Ŋa dítɛ̀ɛ ǹɔii m̀ɛ́i núu da fa sêe naa, kpaa máŋ dí kpâlaŋ-ŋa tii kɛ́ naa.
Ŋa dítɛ̀ɛ ǹɔii m̀ɛ́i ma kala fa lɛ̂lɛ naa a dɔnɔ kpîŋ.
7Da díwoli kùla kpɔ́ daai su woo-ŋai su.
Dífa nûa wóo mɛni díkɛ làɣi dîa a gɛɛ dí tíi kɛ́.
8Da kɛ̂ ǹyéei su gwaa kélee ma kɔ̂rii díkɔnɔŋ mɛni ma,
ǹyaŋ da duma-lâa ŋunu-pɛlɛɛi kélee kpôloŋ ma dí kɛ́ mìi.
9“Ya pɔ̂ri gɛ̂ tou-sirɛ é tíi kɛ́ yɛ̂?
A pɔ̂ri pâi a gɛɛ é nyíi ƃɛ́i ya ítaa-tulɛ-ŋai kɔ́nɔŋ kùla naai?
10Ya pɔ̂ri ɣɛli toôi ma í gɛ́ é kpîri wuyɛɛ siɣêi yɛ̂,
kpaa máŋ í lɔii siŋ-kɔli kpulɔŋ ma a gɛɛ é lɔii síŋ yɛ̂ɛ sí-sɛŋ sí mɛni ma?
11Ya pɔ̂ri íkili tɔɔ̂i ŋɔwála-wala-laa kɛ́tɛi ma í ítii tɛ́ɛ bɔ́ gɛ́ mɛni ma?
Kpaa máŋ í íkili láa ma ítii kpanaŋ-ŋai kɛ́ mɛni ma?
12Ya pɔ̂ri lâai la a gɛɛ é pá pôlu a ímii-sɛŋ,
m̀ii-sɛŋ táŋ kwaai ma?
13“Dua-too ŋɔ̂ni a kɛ̂ goôŋ kpɛ̃lînii.
Nyíti fa nɛ̀ a gɛɛ a pɔ̂ri koônii.
14Dua-too ŋɔni a ŋ̀áloŋ tòo nɔ́ ǹɔii ma é ǹɛɛ naa é lí ǹîa kwaa ma.
Ǹyaŋ a ŋ̀áloŋ lɛ̀ɛ naa a gɛɛ ŋ̀ayai é vãa.
15Va kɛ̂ a gbáaŋɔɔ a gɛɛ sɛŋ da a pɔ̂ri dí wôloi,
kpaa máŋ fɛnɛ-sɛŋ da é ƃɔ́rɔŋ dîa é dí wólo.
16Vé kpaaŋ-ni ǹônii mɛni ma.
A tûa nɔ́ a dia yɛ̂ɛ sɛŋ ƃé dífe a ǹônii.
Ǹyaŋ vé kpaaŋ-ni m̀ɛni-solii è gàa dí maa mɛni mai ma.
17Ńyãa ƃé gɛ̀ vé táre ní.
Ńyãa ƃé ŋɔmɛni ŋá káa kpèra.
18Kɛ́lɛ tãi a mù sìɣe lai, a pɛ̂lɛ kîrɛ síɣeɛɛ ma.
À kɛ̂ ɣɛ́lɛ-maa kulâi zooi da zia-nuu kponôi.
19“Yá ƃé ya zoo-ŋai díwala-wala-laai tɛ̂ɛ dí pɔ́i?
Yá ƃé gɛ̀ díkɔlɔ ma-leɣa é kúla a gôyaa, ǹɛ́lɛɛi?
20Yá ƃé gɛ̀ díkɛ pìli yɛ̂ɛ gotó-ŋa,
díkɛ núu maa yâo a dí lɛ̂woi?
21Da kɛ̂ ǹɔii sinîi a dísôlo a gɛɛ dí díwala-wala-laai lɛ́.
Da tɛ̂ gɔ́-kɔ ŋenei ŋá, berei máŋ dí kpɔara-ƃelai díkɔ-kɔ-sãai a kɛ̂ la díyêei.
22Yao maa kili-ŋa sia fa kɛ̂ dîa a dɔnɔ kpîŋ.
Ƃɛ́i gɔ́i a kɛ̂ a gbɔ́lɔɔ naai, naa ƃé da lî naa.
23Zoo-sia-ƃelai dítɔ̃a-ŋai tíŋ a kɛ̂ tɛ̂i daâi
da kɛ̀ liî vóloi kɛ́ lèŋ díkpala kpaya-kpayai da bɛlɛ-pɛlɛɛi dîa.
24Dífa tɔ̂ɔ tɔ̀ŋ tãi da dúrui wóo mɛ̀ni la a gɛɛ dí lí kɔ́ mai.
Da kɛ̂ kpɛ̃lînii a kili kûla pere díkɛ kîrɛ sìɣe a díwala-walai kélee.
25Da gɔ́i kúŋ mɛ̀ni vãai su tãi da kɛ̂ la kwaa kôyaa mai.
Da gɔkuluƃa-ŋai mɛi-nuui wóo mɛ̀ni gɛ́ gɔkuluƃa-ŋai tɛ̀ɛ dítii-ŋai dîa.
Ǹyaŋ tãi da gɔ́kɔ-turuii wóo mɛ̀ni lai, da dílɛ̂wo tòo.
26“Í mɛni-ŋa kâai ƃé a gɛ̀ kpã́aŋ kɛ́ kòoŋ ŋ̀elei su póŋ-poŋ?
Kpaa máŋ gɛ́ goôŋ fùloŋ gɛ́ kôoŋ gɛ́ lì séɣai-perei?
27Ya ƃé ya mò guɛi ma
a gɛɛ é daa tɔ́ɔ kpɔ́ ŋ̀elei su póŋ-poŋ?
28A daa tɔ̂ɔ ǹyéei tôŋ su
gɔni-ŋai sáma.
29A lɛ̂ɛ naa gɛ́ kwaa kôyaa ma kàa
gɔ́nɔŋ kɔ̀ri mɛni ma.
30Ǹônii da díŋa tɛ̀ mà ƃɛ́i zua poma-ŋai da kɛ̂ naai
díkɛ díŋãa kpêle.”
Currently Selected:
Zôo 39: KWB
Highlight
Copy
Compare
Share
Want to have your highlights saved across all your devices? Sign up or sign in
