Zôo 36
36
1Ɛliu è lì a ŋ̀óo tuɛ-pere.
2Ílii kpéle í maa kpɛ̂ŋ kɛ́ a da-loŋ.
Mɛni káa ńa a gɛɛ ŋá mó yâ Ɣâla láai su.
3Ŋa pâi nɛ̂i yâ a gɛɛ ŋá mɛni ŋá káai su kɛ̂tɛi.
Ǹyaŋ ŋa pâi nɛ̂i yâ a gɛɛ Ŋ́gbɛtɛ-nuui Ɣâla a tûa a teniŋ ƃô-pere.
4Ŋa môi yâ a gɛɛ m̀ɛnii kélee ŋa môi vé a lɛ́ɛ.
Ǹúui nyii dáreɛɛ̂i é tɛ́ɛ yâi, gáa tɔɔ̂ni íkɔlɛ ƃɛ́.
5Ɣâla wála-walai.
Va bôlu tɔ̀ɔ núu da ma.
Mɛni da fé naa nyii vá ŋá kàa.
6Ɣâla fa nɛ̀ɛ naa ŋ̀wana-lɔ̂ɔ-ƃelai díkɛ ɣeniɛi su é kôyaa.
Kɛ́lɛ gáa naa gɛ́ gôlo-ƃelai mɛi kâa a teniŋ ƃô-pere.
7Diai da Ɣâla wóo mɛ̀ni díkɛ ŋ̀aa see kɛ̀i, a dímaa kɔ̃̂ɔ.
A ƃaa kɛ́-maa tɛ̀ɛ dípɔ é dí sée kâloŋ see-sɛŋ-ŋa ŋá wɔ́lɔ-wɔlɔ da wɔlɔ-wɔlɔ.
8Ǹyaŋ à kɛ̀ da dípìli kpini-pɛrɛ mu,
díkɛ mɔ̃lɛ dísɔnyɔ̂ŋ mɛni ma,
9gɛ̀ ní Ɣâla a ǹɛ̂i dîa a gɛɛ da sɔnyɔ̂ŋ kɛ́,
da kɛ́tɛ díkpîŋ ŋɛ́i.
10Ɣâla a gɛ̀ dí díwoli tɔ́ɔ kpɔ́ mà a ǹɛ́lɛɛ,
é mó dîa a gɛɛ dí dípôlu tɔɔ dítûa-pere nyɔ̂ŋ-ŋai dîa.
11À kɛ̀ da díwoli tɔ̀ɔ mà díkɛ̀ ƃò bôlu,
a pâi gɛ̂i dí díkɛ ɣeniɛi kɛ́ a lii-nɛ̃ɛ da lii-see.
12Kɛ́lɛ à kɛ̀ da wàla díwoli tɔ́ɔ,
da pâi saâi díƃooi su.
13Diai dífe láa-ni a Ɣâlai, dílii ŋwânai nɔ́ a tãi kélee.
Ǹyaŋ é máŋ díkula maa kɛ́, dífa kpîŋ tìnaŋ dí m̀arê kɛ́ a gɛɛ é kpɔ́ŋ dîa.
14Da lɛ̂ɛ a díŋunu dísaa.
Díkɛ̀ ɣéniɛi kpéli a kpɛ̂ɛ a ƃaa kûla-maa.
15Diai díkaa mɔ̃lɛi Ɣâla a mɔ̃lɛ-laai sìɣe a gɛɛ é díŋuŋ ma ƃó la.
A nɛ̀ɛ naa dímɔ̃lɛ a gɛɛ dí díwoli tɔ́ɔ mà.
16Ɣâla a í kùla mɛni kpɔ̂lu su,
é zãâi nyii ya ŋ̀wɛ̂lii tɛ́ɛ ípɔ.
Ǹyaŋ a mii-sãa lɛ́lɛɛ-lɛlɛɛ-ŋa sèe íŋɛi-tuɛ.
17Ɣâla a íkula maa kɛ̂ a mɔ̃lɛ-laa
nyii maa nɛ̃ɛ̂i í zɔlɔ ƃoi.
18Ímɛi káa. Ífe nɛ̀ɛ naa sɛŋ-kao é í ƃòo.
Ífe nɛ̀ɛ naa ǹûai dí gɛ́ íkɛ a wôya-nuu sɛŋ-kao mɛni ma.
19Íwɔlɔ-wooi fa pɔ̂ri mɛni lɛ́lɛɛ sii kélee da kɛ̂i yɛ̂.
Íwala-wala-laai fa pɔ̂ri íkulâi lii-too pôlu su.
20Ífe kpíni maa fɛ̂li a gɛɛ é pá.
M̀aa tãi ƃé ǹɔii-ŋûŋ-ŋai kélee su a pâi karâi la a maa félaa.
21Ípôlu tɔɔ mɛni nyɔ́mɔɔ kɛ́ɛ ma.
Mɔ̃lɛ-laa è pà ípɔ a gɛɛ é gɛ́ í ípôlu tɔɔ mɛni nyɔ́mɔɔ kɛ́ɛ ma.
22Ye gáa berei Ɣâla ŋɔwála-wala-laai kɛ̂tɛi lai.
Nya ƃe gáa a zɛŋ-lɛ nuu kɛ́tɛi.
23Núu da fa pɔ̂ri m̀ɛnii lɛ̂i Ɣâla ma maa nɛ̃ɛ̂i é gɛi.
Núu da fa pɔ̂ri môi Ɣâla ma a gɛɛ a mɛni nyɔ́mɔɔ kɛ́.
24Ǹûai da laa maa-tɛ tɛ̀ɛ Ɣâla pɔ́ a tãi kélee.
Ya máŋ ye ǹáa maa tɛ́ m̀ɛni-ŋai a gɛ̀ yɛ̂ɛi m̀ɛni ma.
25Núu kélee a Ɣâla kɛ́-mɛni káa,
kɛ́lɛ a gàa nɔ́ kwaa kôyaa ma.
26Ɣâla kɛ̂tɛi kpɔ́ a maa pɔlɔ-pɔlɔɔ.
Kúfa pɔ̂ri târei m̀aa mɛ̂ni su.
Kúfa pɔ̂ri Ɣâla ŋɔpɔlɔ-pɔlɔ-laa lɛ̂i.
27Ɣâla è ǹyá-ŋai sîɣe é dítɛ ɣelêi,
é díkɛ a tuna.
28Ǹyaŋ a gɛ̀ dunai ŋí é kúla ŋ̀ele-kɔlɔŋ su
gɛ́ pù ǹûai dîa kwaa kélee ma.
29Núu da fé berei kɔ́lɔŋ Ɣâla a gɛ̀ la ŋ̀ele-kɔlɔŋ kolei kɛ́ sìa ŋ̀ele-kɔlɔŋ mai.
Kpaa máŋ berei ŋ̀ele-gbana a kɛ̂ lâɣii la ŋ̀elei su Ɣâla-taai.
30A gɛ̀ ŋ̀ele-gbana ŋɔkwaa ponoɔɔi kɛ́ tɛ̀ɛ ŋ̀elei su.
A yúo mɛi pɛ̂lɛ mù-pere é kpíni.
31Berei sîi ŋí ƃé Ɣâla a núu-kpune ŋáa kɔ̀ŋ naa
gɛ́ mii-sãa támaa tɛ̀ɛ dípɔ mìi mɛ̂ni ma.
32A ŋ̀ele-gbanai sòŋ a ǹyée,
é dóo ƃɛ́i a dɛ̀ɛ naai.
33Ŋ̀elei su a kɛ̀ duâi, gɛ̀ ní fãa kɛ́tɛ a kɛ́ pâi.
Daa tûlɛ-ŋai máŋ da gɔ̀lɔŋ a gɛɛ fãa káa pâi.
Currently Selected:
Zôo 36: KWB
Highlight
Share
Compare
Copy
Want to have your highlights saved across all your devices? Sign up or sign in
