Zôo 34
34
1Ɛliu è ŋɔ́nɔ mò ǹyɛɛi,
2“Káai ká táreɛɛ̂i é tɛ́ɛ núu kélee mai, ka káwoli tɔ́ɔ ḿâ.
Káai dîɛ ká sɛŋ kélee kɔ́lɔŋ, ka ká wóli tɔ́ɔ ḿâ.
3Berei wóli a mɛni mɛ̂ni la é gɔ́lɔŋ a kɛ̀ gáa a tɔ̃yâi,
bere nɔ́ ƃé lá a mii-sɛŋ kɔ̀ɔŋ lá é gɔ́lɔŋ à kɛ̀ ǹɛ̃ɛ̂i.
4Kwâa m̀ɛnii maa kpɛ́ɛ nyii ya môi é pîlaŋ Ɣâla mai.
Tɔɔ kú gáa a kúkpɔɔi kili-ŋa-sia à kɛ̀ ǹɛ̂lɛɛi.
5Zôo, í mò yɛ̂ɛi, ‘Ḿve niî mɛni nyɔ́mɔɔ da kɛ́ ní.
Ǹyaŋ Ɣâla a ŋátɔ̃yâi kúla ńyêei.
6Mɛnii Ɣâla è mò é pîlaŋ ŋá mɛnii mâi vé kɛ́ ní a zãa.
Berei máŋ ḿve niî mɛni nyɔ́mɔɔ da kɛ́ ní lai, Ɣâla a mɛni ŋánaa láa ḿâ. Mɛni ma ŋ́gaa naa saâi.’
7“Ka tá wɔ́lɔ núu da káa m̀óloŋɔɔ Zôo ŋí ma
nyii va ŋumɛ mâa tɛ̀ɛ Ɣâla pɔi?
8A núu nyɔ́mɔɔ-ŋa kɛ́ a ǹáoi-ni
gɛ́ sìa nɔ́ yɛ̂ɛ dia.
9È mò ǹyɛɛi, ‘Lé ƃé núu a pɔ̂ri zɔlɔ ƃôi a kɛ̀ da Ɣâla da kɛ̀ a dínɛ̃ɛ.’
10“M̀ɛni ma káai a dáre-ƃelai, ka káwoli tɔ́ɔ ḿâ.
Ŋ̀wála-wâla kélee Ɣalai a pɔ̂ri mɛni nyɔ́mɔɔ kɛ̂i?
Vé tí a dɔnɔ kpîŋ!
11Ɣâla a núu féla fè gɛ́ tîi mɛni ma.
A véla fè dûa-pere ma.
12Gáa a tɔ̃yâ a gɛɛ Ŋ̀wála-wâla kélee Ɣalai fa mɛni nyɔ́mɔɔ kɛ̀.
A pâi m̀ɛni-ŋai ŋá têei a teniŋ ƃô-pere.
13Ɣâla fa núu da kélee marê kɛ̀ a gɛɛ é wála-wala-laa tɛɛ bɔ́ naa
a gɛɛ é tíi kɛ́ la ŋ̀éniɛi su.
14À kɛ̀ Ɣâla a ŋɔmɔ̂leŋ kùla núu-kpune yêei,
é ŋɔfúlu-laa lɛwoi sóŋ ǹyêei,
15gɛ̀ ní fúlu-sɛŋ kélee a pâi saâi a ɣele tɔ̂nɔ,
núu-kpune máŋ é sáa é kɛ́ pôlu a pɔ̂rɔ.
16“À kɛ̀ m̀ɛnii ŋa môi ya ŋá kâai ma,
gɛ̀ ní íwoli tɔ́ɔ ḿâ.
17À kɛ̀ Ɣâla fa mɛni-sâa ŋá tèe a tɔ̃yâ-pere, gɛ̀ ní a pɔ̂ri ǹɔii mɛi kâai leŋ?
Ŋ̀âlai nyii gɛ̂tɛi, deniŋ ƃôɔɔi, ya pɔ̂ri ŋɔmɛnii ŋá têei?
18Núu fa pɔ̂ri kɛ̂i kâloŋ ma, ‘Íŋa kpɛɛ̂i yâ!’
Kpaa máŋ ǹyɛɛ ǹúu-pɔlɔ-ŋai dîa, ‘Kákaa a ŋwana-lɔ̂ɔ-ƃela!’
19Ɣâla fa tɔ̂ɔ ǹúu láa-tuɛ-ƃelai pôlu.
A dɔɔ-ƃelai da gôlo-ƃelai dímɛnii ŋá tèe a bɔriɛɛ,
kpɛ́ni fêi ǹya ƃé díkelee díkpɛ̀tɛ.
20Saa a pá gbínii sâmai a m̀aa félaa.
Ɣâla a núu-kpune lòkwa é dóo é zu kara.
A ǹúu mɛi-ƃelai su kàra nɔ́ a naa fii kpɛ̂ɛ.
21Kɛ́lɛ Ɣâla a núu-kpune sia-pere maa kpɛ̂ɛ,
gɛ́ ƃɛ́i kélee kàa a kɛ̀ liî naai.
22Kɛ́lɛ kpíni sîi da fé naa nyii a pɔ̂ri gɛ̂i Ɣâla fa pɔ̂ri núu kâai
a kɛ̀ mɛni nyɔ́mɔɔ kɛ̂i.
23Vé Ɣâla ma a kpà a gɛɛ é núu kɔ́lɔŋ,
a gɛɛ é lí la ŋɔmɛni-sâa ƃó-kerei mu é ŋɔmɛnii ŋá tée.
24Ɣâla a ǹúu láa-tuɛ-ƃela wála-walaa-ŋai díwala-wala-laai kûla díyêei,
é núu da kpɛ́ni pú dípɔɔ ŋá.
25Kɛ́lɛ tãi Ɣâla è dítûa-perei kɔ̂lɔŋ lai,
a díyee mɛi ɣâle gbínii su é díwala-wala-laai su kàra.
26A zɔnyɔ̂ŋ-ƃelai kùla maa kɛ̂ gbɔŋ ŋɛ́i-tuɛ
dímɛni nyɔ́mɔ-ŋai dí gɛ̀i mɛni ma.
27A gɛ̀ tí kpɛ́ni fêi, dí dípôlu tɔ̀ɔ mà,
dífa díwoli tɔ̀ɔ m̀ɛnii mâ è mò dîa a gɛɛ dí gɛ́i.
28Da tua nyɔ̂ŋ kɛ̀ a gôlo-ƃelai.
Da díkɛ̀ díkɛ wɔ̀lɔ Ɣâla ma a gɛɛ é kpɔ́ŋ dîa.
Ǹyaŋ a díwɔlɔ-woo mɛni é kpɔ́ŋ dîa.
29“À kɛ̀ Ɣâla káa víi tɔ̂ɔi, gbɛ̂ɛ ƃa pɔ̂ri gɛ̂i é ǹíi maa fáleŋ?
Maa-nuu fé mà.
À kɛ̀ a ŋ̀ɛ́i lòo, màa-nuu fé mà é gáa.
30Ɣâla fa ǹúu-pɛlɛ-ƃelai da sìɣe dísama
é gɛ́ a núu láa-tuɛ-nuu dílɔii mɛi va lâa pɛlɛ la dímɛi.
31“Núu da a tá wɔ́lɔ mó Ɣâla ma ǹyɛɛ,
‘Ŋ́gaa a sɔnyɔ̂ŋ nuu kɛ́lɛ ŋa pâi kperâi sɔnyɔ̂ŋ kɛ̂i?
32Berei lɛ́ ḿâ nyii ŋá sɔnyɔ̂ŋ kɛ̀ la ńdɛ̂i-perei.
À kɛ̀ ŋá sɔnyɔ̂ŋ kɛ̀, ḿve ŋɔ́nɔ pâi da kɛ̂i.’
33Tãi ífe fáa ní la m̀ɛnii mâ nyii Ɣâla è gɛ̀i, ya ŋ̀wɛ̂lii Ɣâla é mɛnii kɛ́ ya ŋ̀wɛ̂lii?
Yá ƃé ya pɔ̂ri m̀ɛnii ŋí su tôoi, ńyãa fêi.
M̀ɛni ma ye mɛnii ƃó ḿâ nyii í gɔ́lɔŋ.
34“Ǹûai nyii-ŋai dítareɛɛi,
nyii-ŋai da tûa a zãa díkɛ díwoli tɔ̀ɔ ḿâi, da mò dîyɛɛi,
35‘Zôo fé táre lôno tɔnɔ kpîŋ kɛ̂i.’
36Fɛ̂ɛ dí pá a Zôo m̀ɛni-sâa ƃó-kerei mu dí ŋɔmɛnii su káa a ǹɛ́lɛɛ é lɛ́ɛ la zu é seri gɔ̃yɛŋ ma,
kpɛ́ni fêi, a lônoi yɛ̂ɛ mɛni nyɔ́mɔɔ kɛ́-nuu.
37È sɔnyɔ̂ŋ kɛ̀, é tela bôlu tɔ̀ɔ Ɣâla mà,
gɛ́ ɣɛ́lɛ-maa kùla Ɣâla kponôi.”
Currently Selected:
Zôo 34: KWB
Highlight
Share
Compare
Copy
Want to have your highlights saved across all your devices? Sign up or sign in
