Zôo 33
33
1“M̀ɛni ma Zôo, íwoli tɔ́ɔ ŋ́oo ma.
Íwoli tɔ́ɔ m̀ɛnii ma ŋa môi yâi.
2Ŋâa nâa ŋ́gbîŋ kpɛtɛ a gɛɛ
ŋá lóno ípɔ é kúla ńii su.
3Ŋa pâi ŋámɛnii ƃôi teniŋ ƃô-pere su
é kúla ńii su.
4Ŋ̀wála-wâla kélee Ɣalai è ŋ́gbɛ̀tɛ,
é fúlu-laa pú ŋ́gbonôi.
5“Zôo, íkpîŋ maa kɔ̃ɔ ŋaŋ à kɛ̀ ya pɔ̂ri.
Ye tɔɔ ŋ́ɛi-tuɛ í ímɛni-ŋai kélee ƃó.
6Ye gáa, kwaa yá kúkaa nɔ́ tɔnɔɔ.
Ɣâla è kúfeerɛ kúkpɛ̀tɛ a pɔ̂rɔ.
7M̀ɛni ma, ífe yào ḿâ,
kpaa máŋ í gáa yɛ̂ɛ sɛŋ ƃé ŋa pâi ímɔ̃lɛi.
8“Íwoo káa nîi ŋ́ôlii kpɛ́ni fêi,
mɛ̀ni tɔnɔ nɔ́ ƃé í mò yɛ̂ɛi,
9‘Ḿaa waâi ḿve niî mɛni nyɔ́mɔɔ da kɛ́ ní.
Ḿve niî mɛni nyɔ́mɔɔ sii kélee da kɛ́ ní ŋákɛ̀-ɣeniɛi su.
10Ɣâla káa nɔ́ ḿaa mɛ̂ni kɔ̂rii a gɛɛ é ḿɔ̃lɛ.
A ŋ́gâai nɔ́ yɛɛ gbɔara-nuu.
11A ŋ́gɔɔ tóo kpɔnɔ ŋá
gɛ́ ŋ́gɛ mɛni kélee kpɔ́ maa kpɛ̂ɛ.’
12“Zôo, ŋa môi yâ a gɛɛ m̀ɛni-ŋai ya môi íwɔ̂i fé lɛ́lɛ ní.
Ɣâla maa pɔlɔ-pɔlɔɔi a gɛɛ da núu-kpune dí mɛni su kula.
13Lé mɛni ƃé ya Ɣâla sɔŋ siɣêi la íkɛ mò yɛ̂ɛ,
‘Ŋá Ɣâla sɔŋ sîɣe kpɛ́ni fêi vé maa kɔ̃ɔ̂i m̀ɛnii ŋí sui?’
14Ɣâla a mɛni da ƃó, é ŋɔ́nɔ m̀ó pôlu,
ǹyaŋ núu da fa zìɣe a mɛni kpanaŋɔɔ.
15Tãi núu a kɛ̂ nyiî la a kpíni gɛ́ see ƃôi,
Ɣâla a gɛ̀ é zĩ̂a káa.
16A gɛ̀ ǹûai dí díwoli tɔ́ɔ mà.
A dí maa yâo a ŋɔlia-wooi.
17A nyíŋi kɛ̀ a gɛɛ díkpera dísɔnyɔ̂ŋ mâ,
dífe kɛ̀ ŋɛi-tɛ kɛ̂i.
18Da kɛ̀ pâi saâi, a díƃalo,
va ǹɛɛ naa dí su é kara.
19Ɣâla a kɔlɔ-fela tɛ̀ɛ a núu kula maa kɛ́ sɛŋ,
é gbono láa fɛ́ɛ a sɛŋ sôli maa.
20Mii-sɛŋ fa ŋɔ́nɔ kɛ̀ a nɛ̃ɛ ǹá.
M̀ii-sɛŋ nyii ǹɛ́lɛɛi a nîai, m̀ɛlɛ fa ŋɔ́nɔ kɛ̀ goi.
21Ǹyaŋ a kpâla kpɔ́ é lɛ́ɛ a gáo.
Gɔlɔ da gáo nɔ́ ƃé núu a kɛ̂ gâai.
22Saa a nâa lɛ̀ɣɛ la,
gɛ́ nâa lɛ̀ɣɛ a m̀olôŋ.
23“Kɛ́lɛ Ɣâla ŋɔkéla wála támaai
dɔnɔ a pâ a gɛɛ é kpɔŋ mâa tɛɛ bɔ́ é déniŋ tɔ́ɔ.
24Gɔlɔ-fela nuui malôŋ è ŋ̀âla-taa kelai sôŋ.
Nya ƃe è mò Ɣâla ma ǹyɛɛ,
‘Ífe nɛ̀ɛ naa é lí dɔ̃yâ kana-pere.
Kpɛ́ni fêi ŋâa ŋuŋ ma ƃó-pere sɔlɔ ƃó.
25Tɔɔ gɔlɔ é ŋɔ́nɔ kɛ́ ma nɛ̃ɛ-nɛ̃ɛ yɛ̂ɛ surɔŋ-loo,
yɛ̂ɛ berei è wɔ́lɔ kɛ̀ la a ǹaɣa tãi.’
26À kɛ̀ gɔlɔ-fela-nuui a Ɣâla fɛ̀li, Ɣâla a pâi ŋ̀óli tɔɔ̂i ma.
Gɛ̀ ní a pâi Ɣâla fɛlîi a liî-nɛ̃ɛ-pere.
Kpɛ́ni fêi Ɣâla a gula saa yêei.
27Nyíŋi à kɛ̀, a pâi kɛ̂i môi gîe mɛi núu-kpune kélee ŋɛ́i-tuɛ ǹyɛɛi,
‘Ḿve mɛni lɛ́lɛɛ kɛ́ ní. Ŋá dɔ̃yâ-perei lɛ̂ɛ.
Kɛ́lɛ Ɣâla fé ŋ́gula maa kɛ́ ní yɛ̂ɛ berei maa-nɛ̃ɛi é gɛ́ la a ńyãai.
28Vé fáa ní ma a gɛɛ ŋá lí dɔ̃yâ kanai.
Ŋ́gaa nîi ɣele ma.’
29“Ɣâla a m̀ɛnii ŋí kɛ́ gîe mɛi a dámaa,
30a gɛɛ é gula saa yêei é pá la kwaa ponoɔɔ su,
a gɛɛ é fúlu-laa tɛɛ bɔ́.
31“Zôo, íwoli tɔ́ɔ ḿâ.
Ímɛi sáa kpɛ́ni fêi ŋâa pá lônoi.
32À kɛ̀ mɛni da káa íla, ye mó ŋaŋ ŋá mɛni.
Ŋ́oli tɔɔ̂i a gɛɛ ŋá ímɛnii ŋá tée a ǹɛ́lɛɛ.
33À kɛ̀ mɛni da fé íla, gɛ̀ ní ímɛi sáa í íwoli tɔ́ɔ ḿâ
ŋa pâi sɛŋ lɛ̂i yâ é ítare tɔɔ.”
Currently Selected:
Zôo 33: KWB
Highlight
Share
Compare
Copy
Want to have your highlights saved across all your devices? Sign up or sign in
