SAN MATEO 16

Apquiltemo fariseos najan saduceos asoc monquinatquiscama

(Mr 8.11-13; Lc 12.54-56)

1Natamin alhta apquilvaa fariseos najan saduceos apnaclha Jesús. Apquililtamjoc alhta elyipconic Jesús. Apquililtamjoc alhta elvitac asoc monquinatquiscama ayinyema netin.#Mt 12.38; Lc 11.16. 2Apcatingmavoc alhta Jesús:

—Apquiltomja inyicje apquillhanma quellhip actalhnam: “Sas sat cotnejic acnim secaseclha, ayinyemaclha inyilhvasquic maa netin.” 3Apquiltomja inyicje apquillhena quellhip alhtoo: “Comamac sat acnim nac jay, ayinyemaclha inyilhvasquic maa netin, yipjopay najan maa netin” —apquiltomjac mataa quellhip. ¡Apquilaycmascam nac quellhip! Apquilyicpilco inyicje quellhip acyitnaclha maa netin. Am eyca elyasamcoc quellhip asoc yoyam cotnejic as ningvamlha nac jay. 4Apquilmapsomcaa najan melinlhanyacmo nac as enlhitaoc. Apquiltingya inyicje asoc monquinatquiscama.#Mt 12.39; Lc 11.29. Mellhicmosacpejec sat moc asoc monquinatquiscama. Acvamlha asoc monquinatquiscama nano, aplhenamap nic nat Jonás, profeta Dios aplingascama —alhta aptomjac.

Yejemoc alhta apquilhaclho enlhitaoc Jesús. Aplhinquic alhta.

Apquiltemaclha fariseos malha quilpasmongam apquimpascaoc

(Mr 8.14-21)

5Lhama alhta apquilvoclho apquiltamsoycaoc tap acyayengviyam. Inquilvoncacmec alhta elsovc quilpasmongam. 6Aptomjac alhta Jesús apquilanya apquiltamsoycaoc:

—Quip elaylhojo. Elavojo anco quellhip fariseos najan saduceos.#Lc 12.1. Apquiltemaclha apancaoc malha quilpasmongam apquimpascaoc —alhta aptomjac.

7Apquilpamejitsacpec alhta apquiltamsoycaoc:

—Ayinyema mongilsoycam nincoo quilpasmongam —alhta apquiltomjac.

8Aplingac alhta Jesús actomjaclha apquilpamesma. Aptomjac alhta apquilanya:

—¿Soctomja allhena nac apquilvalhoc mepqui quilpasmongam? Yamapquilyasquiyam nac quellhip. 9¿Am ya elyasamcoc mocjam quellhip? ¿Am ya collhenac apquilvalhoc cinco quilpasmongam alhta aptoycaoc cinco mil enlhitaoc?#Mt 14.17-21. ¿Co alhta acvam apquilansayclha quillhatam aynapa? 10¿Am ya najan collhenac apquilvalhoc siete quilpasmongam alhta aptoycaoc cuatro mil enlhitaoc?#Mt 15.34-38. ¿Co alhta acvam apquilansayclha quillhatam aynapa? 11¿Apquilquinatcasqui ya quellhip actemaclha sicyitquiscama quilpasmongam? Am olhenac coo quilpasmongam apanco. Elavojo quellhip fariseos najan saduceos, apquiltemaclha apancaoc malha quilpasmongam apquimpascaoc —alhta aptomjac.

12Apquilyasingvocmec alhta apquiltamsoycaoc actemaclha aplhanma Jesús. Am alhta ingyasac Jesús quilpasmongam apquimpascaoc. Apcasquic alhta actemaclha apquillhicmoscama fariseos najan saduceos.

Aplhanma Pedro: Lhip nac Cristo

(Mr 8.27-30; Lc 9.18-21)

13Lhama alhta apvocmo Jesús yoclhilhma Cesarea de Filipo. Yejemoc alhta aptomja Jesús apquilanya apquiltamsoycaoc:

—¿Jalhco lhac apquiltomja enlhitaoc sellhena coo sicvisay Sictiyam Sictomja Enlhit? —alhta aptomjac.

14Apquilatingmavoc alhta apquiltamsoycaoc:

—Juan yapasquiscama yingmin inyap apcanyacpoc lhip. Poc enlhitaoc apquilanayc lhip Elías profeta. Poc enlhitaoc apquilanayc lhip Jeremías profeta. Poc apquilanayc lhip aptomja profeta Dios aplingascama —alhta apquiltomjac.#Mt 14.1-2; Mr 6.14-15; Lc 9.7-8.

15Aptomjac alhta Jesús apquilanya:

—¿Jalhco lhac apquiltomja sellhena quellhip lha? —alhta aptomjac.

16Apcatingmavoc alhta Simón Pedro:

—Lhip nac Cristo, Dios apquilmilaneycaoc Apquitca —alhta aptomjac.#Jn 6.68-69.

17Aptomjac alhta Jesús apcanya Pedro:

—Apquilinyejemo nac lhip Simón, Jonás apquitca. Am conyemac enlhit apyasingvoyam lhip as asoc. Coo Tata apna netin eyca aptomja apyascasingviyam. 18Actomjac coo siyanya lhip: Lhip nac apvisay Pedro, moc ningiltimem mataymong. Lhip aplhanma actemaclha meyasquiyam ningiltimem mataymong acvinatem. Eyca as netin mataymong acvinatem ollanac sat iglesia sicmolhama ajanco. Apquilyimnatem iglesia sicmolhama ajanco, am colhno acmovan ningitsepma. 19Olmesic sat lhip catquiscama atong Visqui netin apquilnancascama. Apquilasquic sat ancoc lhip as nalhpop, colhic sat najan ayasa netin. Apquilavoc sat ancoc lhip as nalhpop, colhic sat najan ayavo netin —alhta aptomjac.#Mt 18.18; Jn 20.23.

20Aptomjac alhta Jesús apquilanya apquiltamsoycaoc:

—Noellhen nasa sicvisay sictomja Cristo —alhta aptomjac.

Jesús aplhanma amamyi, yoyam ematong

(Mr 8.31—9.1; Lc 9.22-27)

21Apquenmoc alhta Jesús apquiltimnascama apquiltamsoycaoc yavamlha sat cotnejic. Omyaclhac sat tingma Jerusalén. Olngamcojoc sat acmasca. Otanovalhcac sat nipyesicsa apquilyimtalhnamo najan nipyesicsa apquilimja apmamyi sacerdotes najan apquilyascamco apquiltemaclha. Omatong sat coo. Natqui acnim sat cotnejic olhaticjangvomoc mocjam —alhta aptomjac. 22Yejemoc alhta apyantama Pedro aplhapco Jesús. Apyimnatasquic alhta appayvam Pedro. Aptomjac alhta apcanya:

—Visqui, Dios Ingyapam sat emyoc. Am cotnejec sat actomjaclha lhac lhip aplhanma —alhta aptomjac.

23Yejemoc alhta appaycacpo Jesús. Aptomjac alhta Jesús apcanya Pedro: —¡Conyi yavey Satanás! Elyasquilhma coo. Am colhenac apvalhoc lhip Dios apanco asoc. Acvamlha aclhena apvalhoc lhip enlhit apanco asoc —alhta aptomjac.

24Aptomjac alhta Jesús apquilanya apquiltamsoycaoc:

—Apquiltamjoc sat ancoc jeyiplovjo enlhit, incaymalhquic yoyam memyovacpoyc apanco. Epatmiclhac sat apanco appatmeycam malha asoc timyescama, seyiploycam mataa.#Mt 10.38; Lc 14.27; Jn 12.24. 25Apquiltamjoc sat ancoc enlhit emyovacpojo apanco, elhnanmoc sat. Apyinyovquic sat ancoc enlhit apmayjayoclha apanco, ayinyema Jesús najan ayinyema tasic amyaa, emyovacpoc sat.#Mt 10.39; Lc 17.33; Jn 12.25. 26Alhto inyicje ningmam ningmetsovjam asoc lhalhma anco acyanmongam ingvalhoc ingac. ¿Soc sat coyanmong nincoo ongmiclhac ingvalhoc ingac? 27Coo sicvisay Sictiyam Sictomja Enlhit. Ovotac sat naysicsa gloria mayayo apanco Tata najan apquillhalhmaa sat ángeles Dios apquilasinancama.#Mt 25.31. Olmesic sat acyanmongam actemaclha apquiltamjaycam moclhama enlhit.#Sal 62.11-12; Pr 24.12; Jer 17.10; Ez 18.30; 33.20; Ro 2.6. 28Actomjac coo silanya quellhip:

—Naso, cotalhcac sat silnancascama sicvisay Sictiyam Sictomja Enlhit yicpintama elmasquingvomoc napocja as enlhitaoc apcanaycam nac lha —alhta aptomjac.

Currently Selected:

SAN MATEO 16: ENHL

Highlight

Compare

Copy