SAN MATEO 17

Jesús aplhinganimcasomap

(Mr 9.2-13; Lc 9.28-36)

1Seis acnim alhta intomjac apquinatvocmo inquilhe acvinatem Jesús. Apnalaclhec alhta apquilvamlha apancavo Pedro najan Jacobo najan apyalhing Juan. 2Yejemoc alhta aplhinganimcasacpojo Jesús napatavo apquillhalhmaa. Incapongmatquic alhta napaat, malha acnim alhta intomjac. Apquilyinmaclhec alhta apquilantalhnama, malha ayitsayolhma intomjac. 3Pilapcasquic alhta apquilvitacpo Moisés najan Elías. Apquilpamejitsacpec alhta Jesús. 4Aptomjac alhta Pedro apcanya Jesús:

—Visqui, intasic onlhic as olhma. Apquiltamjoc sat ancoc lhip, ollanac sat apnatqui tingma. Lhama sat lhip, lhama sat Moisés, lhama sat Elías —alhta aptomjac.

5Pilapcasquic alhta ayajapvaa yipjopay alyinmom naysicsa appamejitquiscama Pedro. Intipquic alhta appayvam naysicsa yipjopay:

—Eycaso sictamongvoyam siyasicjayo,#Gn 22.2; Sal 2.7; Is 42.1; Mt 3.17; 12.18; Mr 1.11; Lc 3.22. elaylhojo sat appayvam —alhta intomjac amyaa.#Dt 18.15.,#2 P 1.17-18.

6Lhama alhta apquillinga appayvam apquiltamsoycaoc. Apquilticlhiquic alhta napataa nalhpop. Apquilacac alhta. 7Apquilpatningvocmoc alhta Jesús. Aptomjac alhta apquilanya apquiltamsoycaoc:

—Elaniclha netin. Nojela nasa —alhta aptomjac.

8Yejemoc alhta apquilyajamcaa apquiltamsoycaoc. Am alhta elvitac ma, apvamlha apanco Jesús aplhapco.

9Lhama alhta apquilinyectamo netin inquilhe. Aptomjac alhta Jesús apquilanya apquiltamsoycaoc:

—Noellingas nasa asoc apquilvitay quellhip. Sat ellhenic maa natamin siclhaticjangviyam nipyesicsa apquilmasquingvaycmo, sicvisay Sictiyam Sictomja Enlhit —alhta aptomjac.

10Apquiltomjac alhta apquiltamsoycaoc apquilanya Jesús:

—¿Soctomja apquilanya nac apquilyascamco apquiltemaclha evotac sat apmamyi Elías? —alhta apquiltomjac.

11Apcatingmavoc alhta Jesús:

—Nasoc anco evotac sat apmamyi Elías, yoyam ellaniclhac aclhamoclhojo asoc.#Mal 4.5. 12Actomjac coo silanya quellhip: Apvoctac alhta Elías,#Mt 11.14. aptovasacpec alhta. Apquilvajanamquic alhta enlhit aclhenaclha apquilvalhoc. Najan lha sicvisay Sictiyam Sictomja Enlhit. Olngamcojoc sat coo lha acmasca ayinyema as enlhitaoc —alhta aptomjac.

13Yejemoc alhta apquilyasingvoclho apquiltamsoycaoc, Juan yapasquiscama yingmin inyap eyca aplhenacpo.

Jesús aptamilquisquiyam lhama apyimnanic

(Mr 9.14-29; Lc 9.37-43)

14Lhama alhta apquilvactamo Jesús najan apquiltamsoycaoc apnamcaclha enlhitaoc. Yejemoc alhta apvaa lhama enlhit. Apquilticlhicvaac alhta aptapnaoc apquinmamcaclha Jesús. Aptomjac alhta enlhit apcanya Jesús:

15—Visqui, ingyimlimojo sat coo sictamongvoyam. Apquitsepquic mataa apyimnaclhojo. Apyovsec mataa acmasca apyimpejic. Apsicjaclhec mataa natilh najan nayingmin. 16Acyantimquic lha inyicje apnamcaclha lhip apquiltamsoycaoc. Am eyca colapvancaac eltamilquiscomoc —alhta aptomjac apyap.

17Apcatingmavoc alhta Jesús:

—¡Enlhit apquilyasquiyam nac quellhip najan colyavameycaoc! ¿Jalhcocvam acnim olhojoc lhama mocjam quellhip? ¿Jalhcocvam acnim olngamcojo mocjam apquilyasquiyam quellhip? Elyantamenma apyimnanic jalip —alhta aptomjac.

18Aptipcasquic alhta Jesús somquic quilyicjamo. Intipquic alhta. Yejemoc alhta aptamalvocmo apyimnanic.

19Lhama alhta aptomjaclho aplhapco Jesús. Yejemoc alhta apquilyoctamo apquiltamsoycaoc. Apquiltomjac alhta apquilanya Jesús:

—¿Soctomja mongvanco nac ongilantipsic nincoo somquic quilyicjamo? —alhta apquiltomjac.

20Apcatingmavoc alhta Jesús:

—Ayinyema yamapquilyasquiyam quellhip. Actomjac coo silanya quellhip: Yitnec sat ancoc melyasquiyam ayitcoc quellhip acno mosiyov actic, elapvanic sat quellhip elanic as inquilhe acvinatem: “Copatyip, coyinyov ayimjaclha” —sat eltimjic quellhip. Quilhvoc sat copatyapoc inquilhe acvinatem.#Mt 21.21; Mr 11.23; 1 Co 13.2. Am sat ancoc elyascacmoc quellhip, elapvanic sat aclhamoclhojo asoc. 21Acvamlha ningilmalhnancama najan mongmajay ontoc ingvanquic ongilantipsic somquic quilyicjamo actema nac lha —alhta aptomjac.

Anit aplhenayclha Jesús yoyam ematong

(Mr 9.30-32; Lc 9.43-45)

22Lhama alhta apnamcaa lhama apquiltamsoycaoc yoclhilhma Galilea. Aptomjac alhta Jesús apquilanya apquiltamsoycaoc: Colhic sat setanongvocmo sicvisay Sictiyam Sictomja Enlhit. Omalhcac sat. 23Omatong sat najan. Natqui acnim sat cotnejic olhaticjangvomoc mocjam —alhta aptomjac. Inquilyitnocjavoc alhta apquilvalhoc apquiltamsoycaoc.

Solyayem impuesto tingma apponquinomap

24Lhama alhta apvoclho tingma Capernaum Jesús najan apquiltamsoycaoc. Apquilyoctac alhta apnaclha Pedro enlhit apquilmam tacja solyayem. Apquilansaclhec alhta mataa solyayem pac tingma apponquinomap.#Ex 30.13; 38.26. Yejemoc alhta apquilmalhnacpo Pedro:

—¿Appiquinqui ya lhip Apvisqui pac solyayem impuesto tingma apponquinomap? —alhta apquiltomjac.

25Apcatingmavoc alhta Pedro:

—Eje —alhta aptomjac.

Lhama alhta aptalhningvactamo tingma pac Pedro. Aptomjac alhta siclho Jesús apcanya Pedro:

—Simón, apquilme inyicje solyayem apquilviscaa lhalhma anco. ¿Jalhco apcanya lhip aptomja apquilhacjam solyayem? ¿Visqui apmolhama inlhoyqui laa poc enlhitaoc? —alhta aptomjac.

26Apcatingmavoc alhta Pedro:

—Poc enlhit apquilhacjam solyayem —alhta aptomjac.

Aptomjac alhta Jesús apcanya Pedro:

—Am elanyacpoc elninquinic solyayem impuesto Apvisqui apmolhama. 27Am ongiltamjoc nincoo elnatjojoc enlhit nintemaclha. Imyaclha sat lhip acyayengviyam. Iyinyovam sat nayingmin sovocjalhem. Ilic sat quilasma acmam amamyi sovocjalhem. Ilic sat atong quilasma. Etac sat lhip lhama solyayem avalhoc quilasma. Isaclhes sat maa apquilmam tacja solyayem. Innoc acyanmongam ningilanyomalhca onpiquinic incanit —alhta aptomjac.

Currently Selected:

SAN MATEO 17: ENHL

Highlight

Compare

Copy