SAN MATEO 15

Actemaclha acpaysimquiscama ingvalhoc

(Mr 7.1-23)

1Apquilvaac alhta fariseos najan apquilyascamco apquiltemaclha apnaclha Jesús. Tingma Jerusalén alhta apquilinyemac. Apquiltomjac alhta apquilanya Jesús:

2—¿Soctomja aptovcamco nac lhip apquiltamsoycaoc naysicsa comasis apyimpeoc? ¿Soctomja aptovascama nac actemaclha apquilpayvam apquilvanyam (actemaclha singascama)? —alhta apquiltomjac.

3Apcatingmavoc alhta Jesús:

—¿Soctomja aptovascama nac quellhip apcanamaclha Dios? Apquilvajanamquic quellhip enlhit actemaclha apquilpayvam. 4Aptomjac nic nat Dios Ingyapam:

“Ilyejiclhojo apyap najan inquin.”#Ex 20.12; Dt 5.16.

Najan moc: “Ningyamnam sat ancoc ingyap najan meme ingac, ongmatong sat”#Ex 21.17; Lv 20.9.

—nic nat aptomjac.

5Apquiltomjac quellhip: Ingvanquic onganic ingyap najan meme ingac: “Quilhvo movanqueje omquesic asoc ajac, sicmescama anco Dios Ingyapam.” 6Apquilmiyovquic quellhip, yoyam ontamilsic ingyap najan meme ingac. Apquiltovascasam mataa quellhip apcanamaclha Dios. Apquilvajanamco quellhip actemaclha apquilpayvam enlhit. 7¡Enlhit apquilaycmascam acna anit apquilvalhoc nac quellhip! Apquillhenacpec quellhip vaycajac aptalhescama ilhnic nat Isaías:

8Intasi inyicje apquilpamesma as enlhitaoc.

Selayo inyicje apquiltomjac.

Tepec eyca acyitna apquilvalhoc apancaoc.

9Ayajemo selayo coo.

Apquiltamsamquic anco apnaymacoc enlhit apquiltemaclha apquilpayvam#Is 29.13.

—nic nat aptomjac Isaías.

10Apquilevam alhta Jesús aplhamoclhojo enlhit. Aptomjac alhta apquilanya:

—Quip elaylhojo siltimnaycam. Elyasamcojo sicpayvam: 11Cotnesquiseje comasis ingyimpejic asoc actalhnama ingvalhoc. Eyca asoc actiyapma ingvalhoc jintimescasquic mataa comasis ingyimpejic —alhta aptomjac.

12Apquilyoctac alhta apquiltamsoycaoc apnaclha Jesús. Apquiltomjac alhta apquilanya:

—¿Apyasamco ya lhquip apquilnatjavo fariseos apquillinga lhip appayvam? —alhta apquiltomjac.

13Apcatingmavoc alhta Jesús:

—Copatipsalhcac sat moclhama yamit cotnaja apquinayclha coo Tata apna netin. 14Itneje pac maa. Apnalayclha mepqui apataoc lhama. Apnalaclhec sat ancoc mepqui apataoc lhama, elantilhojoc sat lhama malhic —alhta aptomjac.#Lc 6.39.

15Aptomjac alhta Pedro apcanya Jesús:

—Jingillhicmos nincoo actemaclha apyitquiscama —alhta aptomjac.

16Apcatingmavoc alhta Jesús:

—¿Am ya elyasamcoc mocjam quellhip? 17Apquilyasamco inyicje quellhip: Intalhnec sat ancoc asoc ingatong, yoyam comoc ingvocmo. Yejemoc acyanalhco. 18Jintimescasquic comasis ingyimpejic asoc actiyapma mataa ingatong ayinyema ingvalhoc.#Mt 12.34. 19Eyca ayinyema ingvalhoc alquitamsama ingvalhoc almasomcaa, ningajem ingmoc, nintovascama singilyimjapma, ningilanatama, ayajemo nintipquiscama apvisay ingmoc, ningmovan amyaa (ningyinimquiscama). 20Eyca as asoc sintimesquiscama comasis ingyimpejic. Nintovquic sat ancoc naysicsa monliclama ingmeoc yingmin, mejintimesquiseje comasis ingyimpejic —alhta aptomjac.

Lhama quilvana cotnaja judía coyasquiyam Jesús

(Mr 7.24-30)

21Apquimpaclhec alhta mocjam Jesús. Apyasquic alhta moc yoclhilhma acvisay Tiro najan Sidón. 22Pilapcasquic alhta acvitalhco quilvana co Canaán, alpalhamamcaa alhta:

—¡Visqui, David apquitca, jeyimlimojo coo! Somquic quilyicjamo actovascama sictamongvoyam. Avanjec ayasquiscama ayimpejic —alhta intomjac.

23Am alhta ingyatingmavoc Jesús. Yejemoc alhta apquilyoctamo apquiltamsoycaoc. Apquiltomjac alhta apquilanya Jesús:

—Ingyapajas as quilvana. Ingilpalhimcasam nincoo —alhta apquiltomjac.

24Apcatingmavoc alhta Jesús:

—Eyapajasquic coo Tata, yoyam otyaningvomjo apquilvamlha nipquesic apquillhinganyam apquilvisay enlhitaoc Israel —alhta aptomjac.

25Invoctac alhta quilvana. Inquilticlhiquic alhta atapnaoc apnaclha Jesús. Intomjac alhta ayanya:

—¡Visqui, jepasim sat coo! —alhta intomjac.

26Apcatingmavoc alhta Jesús:

—Cotnejec ac lha coltovamcoc siclho inquitquic. Am cotamilac ongamcoc simjing quilpasmongam inquitquic actom —alhta aptomjac.

27Intomjac alhta quilvana ayanya Jesús:

—Naso, Visqui. Intovcamqui inyicje simjing ayitcoc coning mesa quilpasmongam apnic acpalsaycam inquitquic —alhta intomjac.

28Apcatingmavoc alhta Jesús:

—¡Quilvana, avanjec coyasquiyam lhiya! Cotnejic sat actomjaclha aclhanma avalhoc lhiya —alhta aptomjac.

Yejemoc alhta actamalvocmo ayitca.

Jesús apquiltamilquisquiyam aplhamoclhojo ningmasquem ataoc

29Apquimpaclhec alhta mocjam Jesús. Apcamquitvoclhec alhta acyayengviyam acvisay Galilea. Apmiyaclhec alhta netin inquilhe acvinatem. Apnaclhec alhta maa. 30Apquilyoclhec alhta apnaclha Jesús aplhamoclhojo enlhitaoc. Apnalantac alhta apquilyateyaycam najan apquilpinsem najan mepqui apataoc najan mepqui appayvam najan aplhamoclhojo mocjam. Apquilnesquic alhta apnaclha Jesús. Apquiltamilquiscacmec alhta. 31Pilapcasquic alhta enlhitaoc apquilvita apquiltamilquisquiyam. Intepeclhec alhta apquilpayvam enlhit mepqui apquilpayvam. Apquilpeyveclhec alhta enlhit apquiljalhaycam. Inquiltamilaclhec alhta apquillhingam enlhit apquilyateyaycam. Innaclhec alhta mocjam apataoc enlhit mepqui apataoc. Innec alhta ayaco Dios Visqui apancaoc enlhitaoc Israel.

Aptoycaoc cuatro mil enlhitaoc

(Mr 8.1-10)

32Apquilevam alhta Jesús apquiltamsoycaoc. Aptomjac alhta apquilanya:

—Eyovsec silano as enlhitaoc. Natqui acnim inyicje intomjac selyiploycam mepqui aptoycaoc. Am oltamjoc olapajacsic eltajiclha tingma apancaoc mepqui aptoycaoc. Elmasquingvoclhac sat nalhit amay —alhta aptomjac.

33Apquilatingmavoc alhta apquiltamsoycaoc:

—¿Jalhco sat ongvitasquemec aptoycaoc? Ayinyemaclha aplhamoc as enlhitaoc. Paj tingma as yoclhilhma actamopeycaoc —alhta apquiltomjac.

34Yejemoc alhta apquilmalhnamcaa Jesús:

—¿Jalhcopvam quilpasmongam apyitna quellhip? —alhta aptomjac.

Apquilatingmavoc alhta apquiltamsoycaoc:

—Siete quilpasmongam najan anit quilasma ayitcoc —alhta apquiltomjac.

35Apquilanayquic alhta Jesús elhnam enlhit nalhpop. 36Yejemoc alhta apquilma siete quilpasmongam najan quilasma Jesús. Gracias alhta aptomjac Jesús Ingyapam netin. Apquilyapitsamquic alhta quilpasmongam. Apquilmesamquic alhta apquiltamsoycaoc, apquilanama elmilascoc nipyesicsa enlhitaoc. 37Apquiltovcamquic alhta aplhamoclhojo. Apquilyipcanmeclhoc alhta aptoycaoc. Apquilansaclhec alhta quilpasmongam napocjaa apquilaymomap. Apquilanamco alhta siete quillhatam aynapa. 38Apvocmec alhta cuatro mil enlhitaoc aptoycaoc, mepqui malyipsatem quilvanaa najan sicaa. 39Yejemoc alhta apquilapajasa enlhitaoc. Apquinatvoclhec alhta barco. Apmiyaclhec alhta yoclhilhma acvisay Magdala.

Currently Selected:

SAN MATEO 15: ENHL

Highlight

Compare

Copy