रोमी 3
3
परमेश्वर विश्वास याये बहःम्ह खः
1थथे खः धयागु जूसा यहूदीत जुइवं तुं छु फाइदा दतलय्? म्हय् चिं तःगु छु ज्यालगय् जुल? 2न्ह्याखें नं इमित फाइदाया फाइदा जक दु। दकलय् न्हापालाक यहूदीतय्त हे परमेश्वरयागु वचन लः ल्हानातःगु खः।
3इपिं मध्ये सुं यहूदीतय्सं विश्वास मयात धायेवं छु जुल धकाः? छु इमिसं विश्वास मयात धायेवं परमेश्वर विश्वास यायेबहः मजूम्ह जुइ ला? 4गुबलें नं जुइ फइ मखु। फुक्क मनूत फताहा जूसां परमेश्वर सत्यम्ह हे जुयादी धकाः थथे धर्मशास्त्रय् नं च्वयातःगु दु –
“छिं जिगु न्याय यानादीगु पाय्छि जू
अले जितः दोषी ठहरय् यानादीगु पाय्छि ताय्के।”#भज ५१:४
5झीसं यानागु मभिंगु ज्यां परमेश्वरया धार्मिकता झन सीदत धाःसा झीसं छु धायेगु? परमेश्वरं तंचायाः झीत सजाँय बियादीवं परमेश्वर मभिंम्ह जुइ ला? (थ्व खँ जिं मनूतय्सं थें धयाच्वनागु दु।) 6थथे जुइ फइ मखु। थथे खःसा परमेश्वरं संसारयात गथे यानाः न्याय यानादी? 7जिगु मभिंगु ज्याखं यानाः परमेश्वर सत्यम्ह खः धकाः झन बांलाक सी दइ धाःसा जिं छाय् हानं पापी थें जुयाः इन्साफय् लानाच्वनेगु? 8गुम्हं गुम्हय्सिनं जितः तसकं बांमलाकाः जिं थथे धाल धकाः धाइ – “मभिंगु यानाः भिं जुया वइगु खःसा मभिंगु जक छाय् मयायेगु?” थज्याःपिं मनूतय्सं तःधंगु सजाँय फयेमाली।
धर्मीम्ह सुं हे मदु
9अय्सा यहूदीत जुल धकाः झीपिं मेपिं मनूत स्वयाः भिं जुल ला? मखु, झीपिं नं भिंपिं मखु। यहूदीत व यहूदीमखुपिं नं फुक्कं पापयागु पन्जाय् लानाच्वंगु दु धकाः ला दोष बी हे धुन। 10धर्मशास्त्रय् नं थथे च्वयातःगु दु –
“सुं हे धर्मी मदु, अहं, छम्ह हे मदु।
11परमेश्वरयात सुनानं मथू,
वय्कःयात मालाजुइपिं सुं हे मदु।
12इपिं मखुगु लँय् वने धुंकल,
इपिं स्यनावने धुंकल।
भिंगु याइपिं छम्ह हे मदये धुंकल।#भज १४:१-३; ५३:१-३
13इमिगु कथुप्वाः
दिपया लुखा थें चाः।
इमिसं नवाइगु बिख दुम्ह सर्पं न्याःगु थें खः,
इमिगु म्हुतुसि सर्पयागु बिख दइ।#भज ५:९; १४०:३
14इमिगु म्हुतु सराः व मभिंगु खं जक
जायाच्वंगु दु।#भज १०:७
15मनूतय्त स्यायेत इमिगु तुति
न्ह्यज्याः।
16इमिगु लँपुइ दुःखकष्ट व विनाश
जक दु।
17थज्याःपिन्सं शान्तियागु लँपु
म्हमस्यू।#यशै ५९:७-८
18इमिके परमेश्वरयागु ग्याःभय
भ्याःभचा हे दइ मखु।”#भज ३६:१
19आः झीसं थ्व खँ सिल, व्यवस्थाय् च्वया तक्व फुक्कं व्यवस्था पालन याःम्हय्सित जक धयातःगु खः। अय्जूगुलिं सुनानं छुं धाय्थाय् मदु। जिं हानं धाये – संसारयापिं फुक्क मनूत परमेश्वरया न्ह्यःने दोषी ठहरय् जुइ धुंकल। 20व्यवस्थाय् च्वयातःगु नियम पालन यानाः सुं हे मनू धर्मी जुइ फइ मखु। व्यवस्थां ला पाप छु खः धकाः क्यनाबी।#भज १४३:२; गला २:१६
विश्वासं धर्मी जुइ
21आः ला व्यवस्था मानय् याये म्वाय्क हे परमेश्वरं फुक्कसितं धर्मी ठहरय् यानादी धयागु खँ सी दये धुंकूगु दु। व्यवस्था ब्यूम्ह मोशां व अगमवक्तातय्सं नं थथे जुइतिनि धकाः न्हापा हे च्वयातःगु दु। 22येशू ख्रीष्टयात विश्वास याक्वसित परमेश्वरं धर्मी ठहरय् यानादी, छाय्धाःसा वय्कलं यहूदी व यहूदीमखुपिं धकाः पाकादी मखु।#गला २:१६
23सकसिनं पाप याःगु दु, उकिं इपिं परमेश्वरया महिमां तापाय् धुंकल। 24अय्नं परमेश्वर दयादुम्ह जूगुलिं वय्कलं ख्रीष्टयात छ्वयाहयाः झीत सितिकं धर्मी यानादिल। 25परमेश्वरं येशू ख्रीष्टयात प्रायश्चितया बलिदान याकाः वय्कःयागु हिं वय्कःयात विश्वास याक्वसिगु पाप क्षमा यानादिल। वय्कलं न्हापा न्हापायापिं मनूतय्गु पापया सजाँय मब्यूसे सह यानादिल। 26वय्कः ख्वाः स्वयाः न्याय यानामदीम्ह परमेश्वर खः धकाः क्यनेत व येशूयात विश्वास याक्वसित धर्मी ठहरय् यानादी धकाः क्यनेत वय्कलं थथे यानादीगु खः।
27थथे खः धयागु जूसा झीसं छु खँय् तःधंछुइगु? छुं खँय् हे मदु। झी छु खँय् तःधनेगु? व्यवस्था मानय् यानागुलिं मखु, बरु विश्वास यानागुलिं खः। 28व्यवस्था मानय् मयासें हे ख्रीष्टयात विश्वास याःम्ह मनूयात परमेश्वरं धर्मी ठहरय् यानादी।
29छु परमेश्वर यहूदीतय् जक परमेश्वर खः ला? वय्कः यहूदीमखुपिं मनूतय् परमेश्वर मखु ला? वय्कः यहूदीमखुपिं मनूतय् नं परमेश्वर खः। 30परमेश्वर छम्ह हे जक जूगुलिं वय्कलं म्हय् चिं तःपिन्त नं मतःपिन्त नं व हे विश्वासं धर्मी ठहरय् यानादी।#व्य ६:४; गला ३:२० 31छु थ्व विश्वासं यानाः व्यवस्था ज्यालगय् मजुल ला? अहं, अथे मखु, बरु झीसं ला व्यवस्थायात झन जक बांलाक मानय् यानाच्वनागु जुइ।
Currently Selected:
रोमी 3: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
