रोमी 4
4
अब्राहाम विश्वासं धर्मी जूगु
1अथे खःसा झी तापाःबाज्या अब्राहामया बारे छु धायेगु? वयात छु दत? 2थथे अब्राहाम ज्यां यानाः धर्मी जूगु जूसा वं तःधंछुया जूसां जिल। वं थथे मयाःगुलिं परमेश्वरलिसे व तःधंछुइगु लँ मदु। 3धर्मशास्त्रय् नं थथे च्वयातःगु दु –
“अब्राहामं परमप्रभुयात
विश्वास यात।
अले वय्कलं वयात धार्मिक मनूया
ल्याखय् तयादिल।”#उत १५:६; गला ३:६
4ज्या याइम्हय्सित दइगु ज्याला दान मखु, व ला वयागु कमाइ खः। 5अय्नं ज्या यानाः कमय् मयासें पापीतय्त धर्मी ठहरय् यानादीम्ह परमेश्वरयात विश्वास याइम्हय्सिगु विश्वासं हे वयात धर्मी ठहरय् याइ। 6दाऊद जुजुं नं थथे धर्मकर्म मयासें परमेश्वरं धर्मी ठहरय् याःम्ह मनूयात धन्यपिं खः धयादिल –
7“इपिं धन्य खः,
सुयागु पाप व मभिंगु ज्या
क्षमा जूगु दु।
8इपिं धन्य खः,
सुयागु पापया ज्यायात
परमप्रभुं दोष मबिल।”#भज ३२:१-२
9थथे दाऊद जुजुं सुवाः ब्यूगु म्हय् चिं तःपिन्त जक खः ला कि मतःपिन्त नं खः? अब्राहामं विश्वास याःगुलिं हे धर्मी ठहरय् जुल। 10अब्राहामयात गुबलय् धर्मी ठहरय् यात लय्? म्हय् चिं तये धुंकाः ला कि मतःनिबलय्? वयात धर्मी ठहरय् याःगु म्हय् चिं तये न्ह्यः हे खः, चिं तये धुंकाः मखु।
11थथे चिं तये न्ह्यः हे विश्वासं यानाः वं धर्मी ठहरय् जुइगु छाप अथवा चिं काल। चिं मतःसां धर्मी ठहरय् जू धकाः परमेश्वरं धायेका जुइ धुंकूपिं सकल मनूतय् अबु यायेत वयात थथे यानादीगु खः।#उत १७:१० 12अले हानं चिं तये धुंकूपिं जूसां चिं दु धकाः भरोसा मतसे अब्राहामं चिं तये न्ह्यः याःगु विश्वासया लँपुइ जुइपिनि नं अबु यायेत खः।
विश्वासं हे परमेश्वरया बाचा पूवंगु
13अब्राहामयात व वया सन्तानतय्त हे थ्व संसार बियादी धकाः बाचा चिनादीगु व्यवस्था मानय् याःगुलिं मखु बरु विश्वासं धर्मी ठहरय् जूगुलिं खः।#उत १७:४-६; २२:१७-१८; गला ३:२९ 14व्यवस्था मानय् याःगुलिं इमित थ्व संसार बियादीगु जूसा विश्वास छतिं हे ज्यालगय् मजुल, अले बाचा चिनादीगु नं सितिं वन।#गला ३:१८ 15व्यवस्था मानय् याइपिन्सं व्यवस्था फुक्कं मानय् याये फइ मखु, उकिं इमिसं सजाँय फयेमाली। अय्जूगुलिं गन व्यवस्था धयागु हे मदु, अन सजाँय धयागु नं फयेमाली मखु।
16थथे जूगुलिं हे वयागु विश्वासं यानाः परमेश्वरं नं व नाप बाचा चिनादीगु खः। अले परमेश्वरं दया माया यानादीगुलिं व नाप बाचा चिनादीगु खँ वया फुक्क सन्तानया लागि पक्का जुल। व्यवस्था मानय् याना च्वंपिनिगु लागि जक मखु, अब्राहामं थें विश्वास याना च्वंपिनिगु लागि नं, छाय्धाःसा झी फुक्कसियां तापाःबाज्या ला अब्राहाम हे खः।#गला ३:७ 17थ्व हे खँ थथे च्वयातःगु दु – “जिं छन्त यक्व जात जातिया अबु याये धुन।” अब्राहामं विश्वास यानाच्वंम्ह परमेश्वरं व झी अबु धकाः स्यू। परमेश्वरं सीम्हय्सित हानं म्वाके फु, अले द हे मदुगु चिज नं दय्कादी फु।#उत १७:५
18अब्राहामयात थ्व हे परमेश्वरं – “जिं छन्त यक्व जात जातिया अबु याये धुन” धकाः धयादीगु खँ जुइ हे फइ मखु थें च्वंसां वं परमेश्वरयाके भरोसा तया जूगुलिं वयात “छं सन्तान नं नगु थें दइ” धकाः धयादी थें तुं व यक्व मनूतय् अबु जुल।#उत १५:५ 19वयागु म्ह सी धुंकूम्हय्सिगु थें सुकूगना वंसां, छाय्धाःसा व थुबलय् सछि दँ दइन, अले हानं सारायागु प्वाथय् दये फइ थें मच्वंसां व विश्वासं छप्ति हे लिमची।#उत १७:१७
20परमेश्वरं धयादीगु खँय् वं विश्वास मयायेगु व संका तक नं यायेगु मयाः। परमेश्वरयात तःधंका जूगुलिं व विश्वासय् झन झन बल्लानावन। 21छाय्धाःसा परमेश्वर थःम्हं बियादीगु बचं पूवंकादी फुम्ह खः धकाः वं बांलाक स्यू। 22उकिं ला खः नि, विश्वासं यानाः वयात धर्मी ठहरय् याःगु। 23वयात धर्मी ठहरय् याःगु खँ वयात जक च्वयातःगु मखु, झीत नं खः। 24झी प्रभु येशू सी धुंकूसां हानं म्वाका दीम्हय्सित विश्वास यानाच्वनागुलिं झीत नं धर्मी ठहरय् यानादी। 25झीत पापं छुतय् यायेत येशूयात स्याकेत लःल्हानादिल, अले झीत धर्मी ठहरय् यायेत हानं म्वाकादिल।#यशै ५३:४-५
Currently Selected:
रोमी 4: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
