लेवी 22
22
छायेहःगु बस्तुया पवित्रता
1परमप्रभुं मोशायात धयादिल, 2“हारून व वया काय्पिन्त धा, इस्राएलीतय्सं जितः छायेहःगु पवित्र वस्तुया बारे होसियार जु, अले जिगु नांयात क्वह्यंकेगु याये मते। जि परमप्रभु खः।
3“इमित धा, ‘छिमि पुस्तौं पुस्ताय् सुं अशुद्धम्ह मनू इस्राएलीतय्सं अर्पण याःगु पवित्र वस्तुया न्ह्यःने वन धाःसा वयात जिं जिगु न्ह्यःनं नाश यानाबी। जि परमप्रभु खः।
4“‘हारूनया काय्पिं मध्ये सुं छेंगूया पुनेयःगु ल्वय् दुम्ह वा धातुया ल्वय् दुम्ह अशुद्ध जुइबलय् तक छायेहःगु पवित्र वस्तुं छुं नं मनयेमाः। सीम्ह थ्यूम्ह, धातुया अथें कुतुं वइम्हयात थ्यूम्ह अले 5घिसय् जुया जुइपिं जीवजन्तुतय्त थ्यूम्ह, गुगुं कथंयागु अशुद्ध दुम्ह मनू थ्यूम्ह, 6थज्याःम्ह मनू सन्ध्याकाः ईतक अशुद्ध जुइमाः। व म्वःमल्हुतले छाःगु पवित्र वस्तुं छुं नं नये मज्यू। 7तर सन्ध्याकाः ई धुंकाः जक व शुद्ध थहरय् जुइ। अनंलि वं छाःगु पवित्र वस्तुं नःसा ज्यू छाय्धाःसा व वयागु नयेगु नसा खः। 8सुं पुजाहारीं थःगु कालं स्यूम्ह अले गुँपशुं स्याःम्ह जन्तु नयाः थःत अशुद्ध याये मज्यू। जि परमप्रभु खः।
9“‘अथे जुयाः इमिसं जिगु विधियात मानय् यायेमाः, मखुसा इपिं जिगु विधियात मानय् मयाःगुलिं दोषी जुयाः सिनावनी। जि इमित पवित्र याइम्ह परमप्रभु खः।
10“‘पुजाहारी परिवारया मखुम्ह मनुखं पवित्र वस्तु मनयेमा। व पुजाहारीया पाहां जूसां वा ज्यालाय् ज्या याइम्ह मनू जूसां वं पवित्र वस्तु मनयेमा। 11तर पुजाहारीं सुं दासयात धिबा पुलाः न्यानाकाल धाःसा व दासं छाःगु बलिं नयेफु। पुजाहारीया छेँय् बूम्ह दासं नं उकिं नयेफु। 12मेगु कुलयाम्ह मिजंनापं पुजाहारीया म्ह्याय्या ब्याहा जूगु दुसा वं छाःगु विशेष पवित्र भेटीं छुं नं नये मज्यू। 13तर पुजाहारीया म्ह्याय्या भाःत सीत धाःसा, वा भाःतं त्वःतकाः च्वम्ह जूसा अले व मचाखाचा मदयाः ब्याहा जुइ न्ह्यः थें थःछेँ च्वनाच्वंसा थः बौयागु नयेगु नसां नये ज्यू। तर पुजाहारी परिवार व वया दासपिन्सं बाहेक मेपिं सुनानं उकिं नये मज्यू।
14“‘तर सुं मनुखं मसीकं पवित्र वस्तुं नल धाःसा वं उकियागु न्याब्वय् छब्व तनाः उकियात पवित्र देछाकथं पुजाहारीयात बीमाः। 15पुजाहारीं इस्राएलीतय्सं छायेहःगु पवित्र देछायात अशुद्ध मयायेमाः। 16थथे देछां छुं कयाः नके मत्यःपिं मनूतय्त नकेगु मयायेमाः। मखुसा इमिसं सजाँय फयेमाली। जि इमित पवित्र याइम्ह परमप्रभु खः।’”
नालेबहः जुइ मखुगु व नालेबहः जुइगु बलि
17परमप्रभुं मोशायात धयादिल, 18“हारून वया काय्पिं व फुक्क इस्राएलीतय्त धा, ‘इस्राएली वा इपिं नापं च्वनाच्वंम्ह परदेशीं भाकल वा थःयसेंया होमबलि परमप्रभुयात छाइबलय्, 19व नालेबहः जुइत द्वहं, फै वा दुगुचा न्ह्याम्ह हे जूसां खू मदुम्ह मिजंम्ह जक छायेमाः। 20खू दुम्हय्सित छिमिसं छाये मते, छाय्धाःसा व नालेबहः जुइ मखु।#व्य १७:१
21“‘सुनानं मेलबलि वा थः यःछिया बलि फैच्वलय्या बथां वा सा द्वहंया बथांपाखें थःगु भाकल पूवंकेत छाल धाःसा नालेबहः जुइत व पशुयागु म्हय् छुं नं खू मदयेमाः। 22कांम्ह, म्हया छुं ब्व स्यंम्ह, अले खुत्यां काःम्ह, चासुइगु वा छेंगूया ल्वय् दुम्ह पशुयात छिमिसं वेदीइ छाये मज्यू, अले विशेष देछाकथं नं परमप्रभुयात छाये मज्यू। 23तर म्हय् छुं खू दुम्ह सा वा द्वहं, फै धाःसा वयात थः यःछि बलिकथं छाये फु, तर भाकल पूवंकेत व नालेबहः जुइ मखु। 24पशुयागु अण्ड तज्याःगु वा ध्यनाछ्वःगु, अले काचाकुचु जूगु दुसा वयात परमप्रभुया निंतिं छाये मज्यू। छिमिगु देशय् गन नं थज्याःगु ज्या याये मज्यू। 25सुं परदेशीयाके कयाः नं थज्याःम्ह पशु परमेश्वरया निंतिं छाये मज्यू। वयागु म्हय् स्यंगु ब्व दु, वयाके खू दु। अथे जुयाः व छिमिगु पलेसा नालेबहः जुइ मखु।’”
26परमप्रभुं मोशायात धयादिल, 27“साचा वा द्वहंचा, चिधिकःम्ह भ्याःचा वा दुगुचा बुइबलय् व न्हय्न्हु तक थः मां नापं हे च्वनेमाः। च्यान्हु खुन्हुनिसें व परमप्रभुया न्ह्यःने विशेष देछाकथं नालेबहः जुइ। 28सा वा द्वहं, फैयात वया मचानापं छन्हुं हे स्याये मते।
29“छिमिसं परमप्रभुया निंतिं सुभाय् बलि छाइबलय् छिपिं नालेबहः जुइकथं व छायेगु यायेमाः। 30छाइगु न्हि हे उकियात नयेमाः। उकियागु छुं नं सुथय् तक ल्यंका तये मज्यू। जि परमप्रभु खः।”
31“अथे जुयाः छिमिसं जिगु विधियात मानय् या। जि परमप्रभु खः। 32छिमिसं जिगु पवित्र नांयात क्वह्यंकेगु याये मते। इस्राएलीतय्सं जि पवित्र खः धकाः नाला कायेमाः। छिमित पवित्र याइम्ह परमप्रभु जि हे खः। 33छिमि परमेश्वर जुइत जिं हे छिमित मिश्रं पित हया। जि परमप्रभु खः।”
Currently Selected:
लेवी 22: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
