लेवी 23
23
हनेमाःगु नखःचखः
1परमप्रभुं मोशायात धयादिल, 2“इस्राएलीतय्त जिं ल्ययागु परमप्रभुया पवित्र नखःचखः थ्व हे खः धकाः धयाब्यु। ‘थुकियात छिमिसं पवित्र मुंज्या धकाः घोषणा या।
विश्रामबारया दिं
3“‘खुन्हु तक छिमिसं ज्या या, न्हय्न्हु दुखुन्हु धाःसा झासु लनेगु विश्रामबार व पवित्र मुंज्या जुइ। उखुन्हु छिमिसं छुं नं ज्या याये मते। छिपिं न्ह्याथाय् च्वनाच्वंसां उखुन्हु छिमिसं परमप्रभुयात तःधंकेमाः।#प्रस २०:८-१०; २३:१२; ३१:१५; ३४:२१; ३५:२; व्य ५:१२-१४
छुत्काराया नखः व सोडा मतःगु मरिया नखः
गन्ती २८:१६-२५
4“‘परमप्रभुं क्वःछिनातःगु जितः तःधंकेत छिमिसं थःथवय् मुनाः हनेमाःगु नखःचखः थ्व हे खः। 5न्हापांगु लाया झिंप्यन्हु खुन्हु सन्ध्याकाः इलय् परमप्रभुया छुत्काराया नखः शुरु जुइ।#प्रस १२:१-१४; व्य १६:१-२ 6व हे लाया झिंन्यान्हु खुन्हुनिसें परमप्रभुया सोडा मतःगु मरिया नखः शुरु जुइ। न्हय्न्हु तक छिमिसं सोडा मतःगु मरि नयेमाः।#प्रस १२:१४-२०; २३:१५; ३४:१८; व्य १६:३-८ 7न्हापां खुन्हु छिमिगु छगू पवित्र मुंज्या जुइमाः। उखुन्हु छिमिसं छुं नं न्हिज्या याये मते। 8न्हय्न्हु तकं छिमिसं परमप्रभुया निंतिं विशेष देछा छायेगु। अले न्हय्न्हु दुखुन्हु हानं छिमिगु छगू पवित्र मुंज्या जुइमाः। उखुन्हु छिमिसं छुं नं न्हिज्या याये मते।’”
न्हापांगु बालीया नखः
9परमप्रभुं मोशायात धयादिल, 10“इस्राएलीतय्त धा, ‘जिं छिमित बीत्यनागु देशय् वने धुंकाः छिमिसं बालीया न्हापांगु ब्वया छथू लयाः पुजाहारीयाथाय् हति। 11विश्रामबारया कन्हय् खुन्हु पुजाहारीं उकियात परमप्रभुया न्ह्यःने यंकाः संकाः देछायेमाः। अले जिं उकियात छिमिगुपाखें लःल्हानाकाये। 12उखुन्हु हे छिमिसं परमप्रभुयात होमबलि छायेत दच्छि दुम्ह खू मदुम्ह चिधिकःम्ह भ्याःचा छाये हयेमाः। 13थुकिया नापं परमप्रभुया निंतिं अन्नबलिकथं छिमिसं चिकनय् न्हायातःगु छगू एपाया झिब्वय् निब्व भिंगु छुचुं नस्वाःया लागिं परमप्रभुया निंतिं विशेष देछाकथं छाये हयेमाः। थ्व नापं छगू लिटर दाखमद्य नं छायेमाः। 14छिमिसं थः परमेश्वरयात थथे छाये महतले छिमिसं न्हूगु बालीया गुगुं नं कथंया मरि, सियातःगु, छुयातःगु अन्न नये मते। छिमिसं न्ह्याथाय् वंसां छिमि पुस्तौं पुस्ता तकं यायेमाःगु न्ह्याबलेंया नियम थ्व खः।
सामाज्याया नखः
गन्ती २८:२६-३१
15“‘विश्रामबारया कन्हय् खुन्हुनिसें अर्थात छिमिसं संकाः ब्यूगु बलिया थू हःगु न्हिखुन्हुं निसें न्हय्वाः ल्याःखा। 16न्हय्गूगु विश्रामबार तक नेय्न्हु ल्याःखा, अले न्हूगु अन्नबलि परमप्रभुयात छाये हयेमाः। 17छिपिं न्ह्याथाय् जूसां छिमिसं न्हापांगु बालीया छगू एपाया झिब्वय् निब्व भिंगु छुचुंया सोडा ल्वाकछ्यानातःगु निपा मरि परमप्रभुया निंतिं संकाः बीगु बलिकथं छाये हयेमाः। 18मरिनापं छिमिसं दच्छि दुपिं न्हय्म्ह खू मदुपिं चिधिकःपिं भ्याःचात, छम्ह द्वहंचा व निम्ह भ्याःचा छाये हयेमाः। परमप्रभुया निंतिं थ्व होमबलि नापं इमिगु अन्नबलि व त्वँसाबलि छगू विशेष बलि जुइ, परमप्रभुया नस्वाःगु नस्वाः।#गन्ती १५:१-१६ 19अनंलि छिमिसं पापबलिया निंतिं छम्ह दुगु व मेलबलिया निंतिं दच्छि दुपिं निम्ह चिधिकःपिं भ्याःचात छायेमाः। 20पुजाहारीं परमप्रभुया न्ह्यःने, न्हापांगु फलया मरिनापं संकाः बीगु बलिकथं निम्ह चिधिकःपिं भ्याःचायात संकाः छायेमाः। थ्व पुजाहारीया निंतिं परमप्रभुयात छाःगु पवित्र बलि जुइ। 21उखुन्हु छिमिसं छुं नं न्हिज्या याये मते। छिमिगु छगू पवित्र मुंज्या जुइमाः। छिमि लिपाया पुस्तां पुस्ता तकया लागि छिपिं न्ह्याथाय् च्वंसां थ्व न्ह्याबलेंया नियम खः।
22“‘छिमिसं बाली लयेबलय् बुँ सिथय् सिथय् थ्यंक लये मते। अले बाली लयेबलय् बँय् लाःगु नं मुने मते। छिमिसं उकियात नये मखंपिन्त व विदेशीपिन्त त्वःताब्यु। जि परमप्रभु छिमि परमेश्वर खः।’”#लेवी १९:९-१०; व्य २४:१९-२२
तुरहीया नखः
गन्ती २९:१-६
23परमप्रभुं मोशायात धयादिल- 24“इस्राएलीतय्त धा, ‘न्हय्गूगु लाया न्हापांगु दिं फुक्कं झासु लनेगु दिं जुइमाः। उखुन्हु फैया नेकूया तुरही पुयाः परमेश्वरया छगू पवित्र मुंज्या जुइमाः। 25उखुन्हु छिमिसं छुं नं कथंया न्हिज्या याये मते। तर परमप्रभुया निंतिं विशेष देछा छा।’”
प्रायश्चितया दिं
गन्ती २९:७-११
26परमप्रभुं मोशायात धयादिल, #लेवी १६:२९-३४ 27“न्हय्गूगु लाया झिन्हु खुन्हु प्रायश्चितया दिं जुइ। उखुन्हु छिमिसं छुं मनसें छगू पवित्र मुंज्या तयेमाः। अले परमप्रभुयात विशेष देछा छायेमाः। 28उखुन्हु छिमिसं छुं नं ज्या याये मते। छाय्धाःसा उखुन्हु परमप्रभु छिमि परमेश्वरया न्ह्यःने छिमिगु पापया प्रायश्चित यायेगु दिं खः। 29उखुन्हु अपसं मच्वंपिन्त जिं थः मनूतपाखें पितिनाछ्वये। 30उखुन्हु छुं कथंया ज्या याइपिन्त जिं नाश यानाबी। 31छिमिसं उखुन्हु छुं कथंया ज्या याये मते। छिपिं न्ह्याथाय् वनाच्वंसां छिमि पुस्तौं पुस्तातय्गु निंतिं थ्व छिमिगु न्ह्याबलेंया नियम खः। 32थ्व छिमिगु निंतिं फुक्कं झासु लनेगु विश्रामबारया दिं खः। गुन्हुया सन्ध्याकाः इलंनिसें कन्हय् खुन्हु सन्ध्याकाः ईतक छिमिसं छुं मनसें थ्व विश्रामबार हनेमाः।”
बल्चाबाय्या नखः
गन्ती २९:१२-४०
33परमप्रभुं मोशायात धयादिल, 34“इस्राएलीतय्त धा, ‘न्हय्गूगु लाया झिंन्यान्हु खुन्हुनिसें न्हय्न्हु तक परमप्रभुया बल्चाबाय्या नखः जुइ।#व्य १६:१३-१५ 35नखःया न्हापांगु दिं परमेश्वरयात आराधना यायेत छिमिगु छगू पवित्र मुंज्या जुइमाः। सुनानं ज्या याये मते। 36न्हय्न्हुयंकं छिमिसं परमप्रभुया निंतिं वेदीइ विशेष देछा छायेमाः। च्यान्हु खुन्हु हाकनं छिमिगु छगू पवित्र मुंज्या जुइमाः। थ्व छगू तःधंगु मुंज्या जुइ। व दिनय् छिमिसं छुं नं ज्या याये मते।
37“‘जिं ल्ययागु नखःचखः थुपिं हे खः। अले थुपिं नखतय् छिमिगु मुंज्याय् परमप्रभुयात तःधंकेगु निंतिं नखःकथं विशेष देछा होमबलि, अन्नबलि, व त्वँसाबलि छायेमाः। 38थुपिं नखःचखः छिमिसं न्ह्याबलें हनीगु विश्रामबारया बाहेक खः, अले बलि छायेगु नं न्ह्याबलें छायावयाच्वंगु बलि, भाकल व थःयसेंबलि बाहेकया बलि खः। अले छिमिसं परमप्रभुयात ब्यूगु बचं पूवंकेत ब्यूगु बलि खः।
39“‘छिमिसं थःगु बुँया बाली लये धुंकाः न्हय्गूगु लाया झिंन्यान्हु खुन्हुनिसें न्हय्न्हु तक परमप्रभुया निंतिं थ्व नखः हनेमाः। थ्व नखःया न्हापांगु दिं व च्यान्हु खुन्हुया दिं विश्रामबार दि खः उखुन्हु छुं ज्या याये मते। 40न्हापांगु दिं छिमिसं थःथाय् सःगु भिंभिंगु फल, बल्चा दय्केत ताय्गः सिमाया कचा, ततःमागु सिमाया कचा, लहरे पिपलया कचा ज्वनाः न्हय्न्हु तक परमप्रभु छिमि परमेश्वरया न्ह्यःने लय्ताया च्वँ। 41दँय्दसं छिमिसं थुकियात परमप्रभुया निंतिं न्हय्न्हु तक नखःकथं हनेमाः। लिपा वइपिं छिमि पुस्तौं पुस्तातय्सं नं न्हय्गूगु लाय् थ्व नखः हनेमाः। थ्व न्ह्याबलेंया लागिं नियम खः। 42न्हय्न्हु तक फुक्क इस्राएलीत बल्चाय् च्वनेमाः। 43थुकिं छिमि सन्तानतय्सं जिं इमि पुर्खायात मिश्रं पितहयाबलय् बल्चाय् तयागु खः धकाः सीमा। जि परमप्रभु छिमि परमेश्वर खः।’”
44थुकथं मोशां इस्राएलीतय्त परमप्रभुं क्वःछिनातःगु नखः हनेगु विधि बिल।
Currently Selected:
लेवी 23: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
