लेवी 21
21
पुजाहारीं यायेमाःगु खँ
1परमप्रभुं मोशायात धयादिल, “हारूनया पुजाहारी काय्पिन्त थथे धा, ‘पुजाहारीं सुं थःथिति सित धाःसा वयात थीमज्यू। थुकिं वयात अशुद्ध याइ। 2थः मांबौ, काय्म्ह्याय्, दाजुकिजा, 3व ब्याहा मजूनिपिं तःकेहेँया निंतिं जक इमिसं थःत अशुद्ध यायेमा। 4ब्याहापाखें स्वापु दुपिं सुयागुं निंतिं नं इमिसं थःपिन्त अशुद्ध याये मज्यू।
5“‘दुःखं च्वनीबलय् थःगु सँ खाये मते, दाह्रीया कुन्चा कुन्चा नं चाये मते, अले म्हय् घाः याये मते।#लेवी १९:२७-२८; व्य १४:१ 6थः परमेश्वरया निंतिं इपिं पवित्र जुइमाः, अले थः परमेश्वरया नां अशुद्ध मयायेमाः। छाय्धाःसा इमिसं विशेष देछा, परमेश्वरया नसा होमबलि छाइगु खः। उकिं इपिं पवित्र जुइमाः।
7“‘इमिसं ल्यवःसिं मिसा, स्यनेधुंकूम्ह मिसा व भाःतं त्वःतूम्ह मिसा ब्याहा याये मज्यू। छाय्धाःसा इपिं पुजाहारीत थः परमेश्वरया निंतिं पवित्रपिं खः। 8मनूतय्सं इमित पवित्र भाःपीमाः, छाय्धाःसा इमिसं छिमि परमेश्वरयात अन्नबलि छाइ। मनूतय्सं इमित पवित्र भाःपीमाः, छाय्धाःसा जि छिमित पवित्र याइम्ह परमप्रभु पवित्र खः।
9“‘सुं पुजाहारीया म्ह्याय्नं ल्यवःसिं ज्या यानाः थःत अशुद्ध यात धाःसा, वं थः बौया अपमान याइ। वयात मिइ छ्वय्काः स्याना छ्वयेमाः।
10“‘दकलय् तःधंम्ह पुजाहारी, छेनय् अभिषेकया चिकं लुइ धुंकूम्ह व पुजाहारीया वसः पुंकेत अलग तये धुंकूम्हय्सिनं दुखं च्वनीबलय् सँ मचिसे मच्वनेमाः अले थःगु वसः नं मखुइमाः। 11सीम्ह दुथाय् वनाः वं थःत अशुद्ध याये मज्यू। वया थः मांबौ हे सीसां व वने मज्यू। 12व नापलायेगु पालं पिहां मवनेमा, अले थः परमेश्वरया नापलायेगु पालयात अपवित्र मयायेमा। छाय्धाःसा परमेश्वरया अभिषेकया चिकनं वयात अर्पण याये धुंकूगु दु। जि परमप्रभु खः।
13“‘वं कुमारी मिसामचा ब्याहा यायेमाः। 14वं भाःत सी धुंकूम्ह, भाःत त्वःते धुंकूम्ह मिसा, स्यंम्ह मिसा व ल्यवःसिं मिसा ब्याहा मयायेमाः। वं थःगु हे कुलयाम्ह कुमारी मिसामचा ब्याहा यायेमाः। 15मखुसा वया काय्म्ह्याय्पिं अशुद्ध जुइ। जि वयात पवित्र याइम्ह परमप्रभु खः।’”
16परमप्रभुं मोशायात धयादिल, 17“हारूनयात धा, ‘छं लिपाया पुस्ताय् म्हय् खू दुम्ह सुं छिमि सन्तान थः परमेश्वरयात बलि छायेत न्ह्यःने वये मज्यू। 18खू दुम्ह सुं नं न्ह्यःने वये दइ मखु। कां, खुत्यां काःम्ह, अंगभंग जूम्ह 19ल्हाःतुति चाःतूम्ह, 20धुसि लूम्ह वा बागःचाम्ह, मिखा व छेंगूया ल्वय् दुम्ह, अण्डकोष स्यंम्ह जिगु न्ह्यःने वये दइ मखु। 21पुजाहारी हारूनया सन्तानय् खू दुम्ह सुं नं जितः विशेष देछा छायेत जिगु न्ह्यःने वये दइ मखु। वयाके खू दु। व थः परमेश्वरयात अन्नबलि बीत न्ह्यःने वये दइ मखु। 22पुजाहारीया सन्तान जूगुलिं वं थः परमेश्वरयात छायेहःगु विशेष देछा नये फइ। 23तर वयाके खू दुगुलिं वं पर्दा व वेदीया लिक्क वयाः जिगु पवित्र पालयात अशुद्ध यायेदइ मखु। छाय्धाःसा जि उकियात पवित्र याइम्ह परमप्रभु खः।’”
24अले मोशां हारून, वया काय्पिं व फुक्क इस्राएलीतय्त थ्व खँ न्यंकल।
Currently Selected:
लेवी 21: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
