लेवी 20
20
पापया सजाँय
1परमप्रभुं मोशायात धयादिल, 2“इस्राएलीतय्त धा, ‘सुं इस्राएली वा इपिं नापं च्वनाच्वंम्ह परदेशी मनुखं मोलेक द्यःयात थःपिनि मचा छाल धाःसा वयात खलःयापिं फुक्कसिनं ल्वहँतं कय्काः स्यायेमाः। 3वं थः मचा मोलोखयात छाइबलय् जिगु पवित्र पालयात अशुद्ध याइ अले जिगु पवित्र नांयात क्वह्यंकी, अथे जुयाः जि थः हे वयागु विरोधय् वनाः वयात थः मनूतपाखें पितिनाछ्वये। 4वं थः मचा मोलोखयात छाःबलय् खलःयाम्ह सुनानं मखंछु यानाः व मनूयात मस्यात धाःसा 5व मनू, वया छेँजःपिं व वयागु ज्याय् ल्हाः तःपिं फुक्कसित जिं त्वःते मखु। जिं वयात वया थः मनूतपाखें पितिनाछ्वये।
6“‘सुं मनू तन्त्रमन्त्रय् लगय् जुल धाःसा जिं वयात त्वःते मखु। छाय्धाःसा वं जिगु विरोधय् बेस्याया थें ज्या यात। जिं वयात वया थः मनूतपाखें पितिनाछ्वये।
7“‘अय्जूगुलिं छिपिं थुपिं फुक्कपाखें अलग च्वनाः पवित्र जुयाच्वँ! छाय्धाःसा जि परमप्रभु छिमि परमेश्वर खः। 8छिमिसं जिं धया थें या, छिमित पवित्र याइम्ह परमप्रभु जि हे खः।
9“‘सुंनानं थः मां व बौयात सराः बी, वयात स्याना छ्वयेमाः। थज्याःम्ह मनू तःधंगु अपराधया दोषी खः।#प्रस २१:१७; मत्ती १५:४; मर्क ७:१०
10“‘सुनानं थः जःलाखःलाया कलाःनापं लसपस यात धाःसा मिसा व मिजं निम्हय्सितं स्यायेमाः।#प्रस २०:१४; लेवी १८:२०; व्य ५:१८
11“‘थः बौया कलाःनापं लसपस याइम्हय्सिनं थः बौयात लज्या चाय्कूगु खः। इपिं निम्हय्सितं स्याना छ्वयेमाः। थज्याःम्ह मनू तःधंगु अपराधया दोषी खः।#लेवी १८:८; व्य २२:३०; २७:२०
12“‘सुनानं थः काय्भौनाप लसपस यात धाःसा इपिं निम्हय्सितं स्याना छ्वयेमाः। इमिसं याये मत्यःगु ज्या यात। थज्याःम्ह मनू तःधंगु अपराधया दोषी खः। #लेवी १८:१५
13“‘सुनानं मिजनं मिसानाप लसपस याःथें मिजंनाप लसपस यात धाःसा व घचाइपुगु ज्या खः। इमित स्याना छ्वयेमाः। थज्याःम्ह मनू तःधंगु अपराधया दोषी खः।#लेवी १८:२२
14“‘सुनानं मां व म्ह्याय् निम्हसितं कलाः तल धाःसा थ्व क्वह्यंगु ज्या खः। इपिं स्वम्हय्सितं मिइ छ्वय्का छ्वयेमाः। छिमि दथुइ थज्याःगु क्वह्यंगु ज्या मजुइमाः।#लेवी १८:१७; व्य २७:२३
15-16“‘सुं नं मिजं वा मिसां पशुनाप लसपस यात धाःसा वयात स्याना छ्वयेमाः। नापं पशु नं स्याना छ्वयेमाः। थज्याःम्ह मनू तःधंगु अपराधया दोषी खः। #प्रस २२:१९; लेवी १८:२३; व्य २७:२१
17“‘सुनानं थः तःकेहेँपिं, थः बौ वा मांया पाखेंयाम्ह म्ह्याय्यात ब्याहा यानाः लसपस यात धाःसा व लज्या चायापुगु ज्या खः। इमित इमि थः मनूतपाखें पितिनाछ्वयेमाः। वं थः केहेँयात लज्या चायापुगु ज्या खः। अले व उकिया दोषी जुइ।#लेवी १८:९; व्य २७:२२
18“‘सुनानं थीमज्यू जुयाच्वंम्ह मिसानाप लसपस यात धाःसा वं हिबा वःगु मूलयात उलाक्यना ब्यूगु दु, अले व मिसां नं व उला ब्यूगु दु। इपिं निम्हय्सितं इमि थः मनूतपाखें पितिनाछ्वयेमाः।#लेवी १८:१९
19“‘सुनानं थः मांबौया तःकेहेँपिं लिसे लसपस याये मते। थुकिं स्यःलाःपिं थःथितिया लज्या चाय्कूगु जुइ। अले इपिं निम्हं दोषी जुइ।#लेवी १८:१२-१४
20“‘सुनानं थः कका वा तःबाःया कलाःनापं लसपस यात धाःसा वं थः कका वा तःबाःयात लज्या चाय्कूगु जुइ। इपिं थःगु पापया निंतिं दोषी जुइ। अले इपिं मचाखाचा मदय्कं हे सी।
21“‘सुनानं थः किजाभौ वा तताजु नाप लसपस यात धाःसा व याये मत्यःगु ज्या खः। वं थः दाजु वा किजायात लज्या चाय्कूगु जुइ। इपिं मचाखाचा मदय्कं सी।#लेवी १८:१६
22“‘परमप्रभुं धयादिल, जिगु नियम व आज्ञा पालन या। मखुसा जिं छिमित यंके धयागु देशं छिमित ल्ह्वयाः वांछ्वइ। 23जिं छिमिगु न्ह्यःनें पितिनाछ्वये त्यनागु जातियापिन्सं याःथें छिमिसं याना जुइ मते। इमिगु याये मत्यःगु ज्याखं यानाः जिं इमित मयय्कागु खः। 24तर जिं छिमित धयागु दु, “छिमिसं इमिगु देश त्याकाः काइ, छाय्धाःसा थ्व देश जिं छिमित सर्बयकथं बी। जिं थःम्हं हे दुरु व कस्ति बाः वयाच्वंगु थ्व देशयात छिमित बी।” जि छिमित मेगु जातितपाखें अलग तइम्ह परमप्रभु छिमि परमेश्वर खः।
25“‘उकिं छिमिसं शुद्धपिं व अशुद्धपिं झंगः व पशुत बांलाक म्हसीकि। जिं अशुद्ध धयापिं झंगः, पशु व बँय् घिसय् जुया जुइपिं पशुतपाखें छिमिसं थःपिन्त अशुद्ध याये मते 26छिपिं जिगु निंतिं पवित्र जुइमाः, छाय्धाःसा जि परमप्रभु पवित्र खः। अले जिं छिमित थः मनूत यायेत मेगु जातितपाखें अलग तयागु खः।
27“‘सुनानं मिजं वा मिसां तन्त्रमन्त्रया ज्या यात धाःसा वयात स्याना छ्वयेमाः। वयात ल्वहँतं कय्काः स्यायेमाः। थज्याःम्ह मनू तःधंगु अपराधया दोषी खः।’”
Currently Selected:
लेवी 20: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
