लेवी 19
19
मेपिं मनूतलिसे गथे यानाः हनाच्वनेगु
1परमप्रभुं मोशायात धयादिल, 2“सकलें इस्राएलयापिं मनूतय्त धा, ‘जि परमप्रभु छि परमेश्वर पवित्रम्ह जूगुलिं छिपिं नं पवित्रपिं जुयाच्वँ।#लेवी ११:४४-४५; १ पत्र १:१६
3“‘छिपिं फुक्कसिनं थः मांबौया हनाबना ति। अले जिगु विश्रामबार मानय् या। जि परमप्रभु छिमि परमेश्वर खः।#प्रस २०:८,१२; व्य ५:१२,१६
4“‘मूर्तिपाखे छिपिं वने मते, अले छिमिसं थःगु निंतिं धातु नाय्काः द्यःत नं दय्के मते।#प्रस २०:२३; ३४:१७; लेवी २६:१; व्य २७:१५
5“‘छिमिसं परमप्रभुयात मेलबलि छायेबलय् परमेश्वरपाखें थः नालेबहः जुइकथं छा। 6छिमिसं उकियात छाःगु न्हिइ हे नयेमाः। कन्हय् खुन्हु नं व नये ज्यू। तर कंस खुन्हु छुं ल्यं दत धाःसा व मिइ छ्वय्काबीमाः। 7कंस तक व नल धाःसा व अशुद्ध जुइ। अले व नालेबहः जुइ मखु। 8सुनानं उकियात नल धाःसा थःगु पापया लागिं व मनू थः हे दोषी जुइ। छाय्धाःसा वं परमप्रभुया पवित्र खँ अशुद्ध यात। अले वयात थः मनूतपाखें पितिना छ्वयेमाः।
9“‘छिमिसं थःगु बाली लइबलय् बुँया सिथ तक लये मज्यू। अले बुँइ कुतुं वंगु अन्न नं मुने मते।#लेवी २३:२२; व्य २४:१९-२२ 10छिमिसं थःगु दाखक्यबं दाख खाइबलय् फुक्कं दाख खाये मते अले बँय् कुतुं वंगु दाख नं काये मते। व नये मखंपिं व परदेशीतय्गु निंतिं त्वःताब्यु। जि परमप्रभु छिमि परमेश्वर खः।
11“‘छिमिसं खुयाकाये मते।
“‘मखुगु खँ ल्हाये मते।
“‘छम्हं मेम्हय्सित झंगः लाये मते।#प्रस २०:१५-१६; व्य ५:१९-२०
12“‘जिगु नां कयाः मखुगु पाफयाः थः परमेश्वरया नां क्वह्यंके मते। जि परमप्रभु छिमि परमेश्वर खः।#प्रस २०:७; व्य ५:११; मत्ती ५:३३
13“‘छिमिसं जःलाखःलापिन्त ध्वंलानाः इमिगु छुं नं काये मते, अले इमिगु छुं नं लुतय् यानाः काये मते।
“‘ज्याला कयाः ज्या याइपिनिगु धिबा वयात मब्यूसें सुथय् तक तयातये मते।#व्य २४:१४-१५
14“‘न्हाय्पं ख्वाँय्यात क्वह्यंके मते। कांया न्ह्यःने लुफिं हाइगु वस्तु तये मते। तर छिमिसं परमेश्वरया भय कायेमाः। जि परमप्रभु छिमि परमेश्वर खः।#व्य २७:१८
15“‘छिमिसं अन्याय याये मते। तःधंम्ह जूसां वा चिधीम्ह जूसां, मनूया ख्वाः स्वयाः मखु, तर सकलें मनूतय्गु पाय्छिकथं न्याय यायेमाः।#प्रस २३:६-८; व्य १६:१९
16“‘मेपिं मनूतय्त क्वह्यंकाः खँ ल्हाना जुइ मते।
“‘छिमिसं जःलाखःलापिनिगु जीवन आपतय् लाइगु छुं नं ज्या याये मते। जि परमप्रभु खः।
17“‘छिमिसं थः जातियापिं दाजुकिजापिन्त दुनुगलंनिसें मयय्के मते। छिमि जःलाखःलापिन्त ब्वःब्यु। मखुसा छ नं वं याःगु पापया दोषी जुइ।#मत्ती १८:१५
18“‘थः मनूतलिसे बदला कायेगु स्वये मते, अले इबि नं तये मते, तर थः जलाःखलाःतय्त थःत थें हे माया या। जि परमप्रभु खः।#मत्ती ५:४३; १९:१९; २२:३९; मर्क १२:३१; लूक १०:२७; रोम १३:९; गला ५:१४; याक २:८
19“‘छिमिसं जिगु नियम मानय् यायेमाः।
“‘अले निगू जातियापिं पशुत छथाय् हयाः ज्वःचिंके मते।
“‘छगू हे बुँइ निथी किसिमयागु पुसा ह्वले मते।
“‘छिमिसं निगू किसिमयागु सुका दुगु वसः पुने मते।#व्य २२:९-११
20“‘ब्याहा क्वःछी धुंकूम्ह तर न्याइम्ह मिजंनं थःगु यायेत धिबा मपुनिम्ह वा थः मालिकपाखें स्वतन्त्र मजूम्ह दासीनापं सुनानं लसपस यात धाःसा इपिं निम्हय्सित सजाँय बीमाः, तर इमित स्यायेगु धाःसा मखु, छाय्धाःसा व दासी स्वतन्त्र मजूनि। 21तर थ्व मनुखं नापलायेगु पालया ध्वाखाय् थःगु दोषबलिया निंतिं छम्ह भ्याःचा परमप्रभुयात छायेत हयेमाः। 22अले व मनूया पापया निंतिं प्रायश्चित यायेत दोषबलियाम्ह भ्याःचा पुजाहारीं परमप्रभुया न्ह्यःने छायेमाः। अनंलि व मनूयात क्षमा दइ।
23“‘छिपिं व देशय् वनाः फलया सिमा पित धाःसा स्वदँ तक उकिया फल नयेजी मखु। स्वदँ तक उकिया फल नये मते। 24प्यंगूगु दँय् सयावःगु फल पवित्र जुइ, अले थ्व परमप्रभुया प्रशंसाया निंतिं देछायेमाः। 25तर न्यागूगु दँय् उकियागु फल छिमिसं नये ज्यू। अले अप्वः फल सयावइ। जि परमप्रभु छिमि परमेश्वर खः।
26“‘छिमिसं हि पिमकाःगु ला नये मते।
“‘छिमिसं ज्वखना स्वयेगु व तन्त्रमन्त्र यायेगु ज्या याये मते।#उत ९:४; लेवी ७:२६-२७; १७:१०-१४; व्य १२:१६,२३; १५:२३; १८:१०
27“‘छिमिसं न्हकुइ च्वंगु सँ खाये मते। अले दाह्रीया कुन्चा कुन्चा नं चाये मते।#लेवी २१:५; व्य १४:१
28“‘छिमिसं दुखं च्वनीबलय् थःगु म्हया छेंगुलिइ घाः याये मते। अले उकी छुं नं च्वयेगु ज्या नं याये मते। जि परमप्रभु खः।
29“‘छिमिसं थः म्ह्याय्पिन्त वेश्या दय्काः क्वह्यंके मते। मखुसा देशय् न्यंकं वेश्यावृतिं जायावनी। अले देश पापं जाइ।#व्य २३:१७
30“‘छिमिसं जिगु विश्रामबार मानय् यायेमाः, अले जिगु पवित्र पालयागु हनाबना तयेमाः। जि परमप्रभु खः।#लेवी २६:२
31“‘छिपिं तन्त्रमन्त्र ज्या याइपिं बोक्सियाथाय् वने मते। इमिगु सल्लाह कयाः थःत अशुद्ध याये मते। जि परमप्रभु छिमि परमेश्वर खः।#व्य १८:११; १ शमू २८:३-२०; यशै ८:१९
32“‘बुराबुरी मनूतय्गु न्ह्यःने दनाः इमिगु हनाबना तयेमाः। अले थः परमेश्वरया भय कायेगु। जि परमप्रभु छिमि परमेश्वर खः।
33“‘सुं परदेशी छिपिंनापं च्वनाच्वंगु दुसा वयात बांलाःगु व्यवहार यायेमाः।#प्रस २२:२१; व्य २४:१७-१८; २७:१९ 34छिपिंनापं च्वनाच्वंम्ह परदेशीयात थःगु देशयाम्ह मनूयात थें हे व्यवहार यायेमाः। छिमिसं वयात थःत थें हे माया या, छाय्धाःसा छिपिं नं न्हापा मिश्रय् परदेशी जुयाच्वंगु खः। जि परमप्रभु छिमि परमेश्वर खः।
35“‘छिमिसं दायेबलय्, लनेबलय् व ल्याःखायेबलय् सुयातं ध्वंलाये मते।#व्य २५:१३-१६; हितो २०:१०; इज ४५:१० 36छिमिसं ठीक कथंयागु धःताल्जु अले ठीक कथंयागु नाप तौल नं तयेमाः। जि परमप्रभु छिमि परमेश्वर खः। जिं छिमित मिश्र देशं पित हया।
37“‘अथे जुयाः छिमिसं जिगु नियम व विधि मानय् यायेमाः। जि परमप्रभु खः।’”
Currently Selected:
लेवी 19: NEW
Highlight
Copy
Compare
Share
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
