प्रस्थान 36
36
नापलायेगु पालया निंतिं ज्वलं
1“बजलेल, ओहोलीआब व परमप्रभुं पवित्र पाल दय्केत सीप व खुबी बियादीपिं ज्या सःपिं मनूतय्सं परमप्रभुं उजं बियादीगुकथं ज्या यायेमाः।”
2अले मोशां बजलेल, ओहोलीआब व परमप्रभुं खुबी बियादीपिं व ज्या यायेत मनदुपिं फुक्कसित सःतल। 3पवित्र पाल दय्केत इस्राएलीतय्सं हःगु देछा फुक्कं इमिसं मोशाया ल्हातं काल। अय्नं मनूतय्सं हानं सुथ पतिकं नं थः यःछि देछा हया हे च्वन। 4अथे जुयाः पवित्र पाल लागाय् ज्या याइपिं थथःगु ज्या त्वःताः मोशायाथाय् वल। 5अले इमिसं थथे धाल, “मनूतय्सं परमप्रभुं दय्केत उजं बियादीगु ज्याया निंतिं माःगु स्वयाः अप्वः ज्वलं हयाच्वंगु दु।”
6अले मोशां छाउनी न्यंकं थथे धकाः च्वय्कल, “आवंलि सुं मिजं वा मिसां पवित्र पालया निंतिं देछायेत मेगु छुं नं हये मते।” अथे जुयाः मनूतय्सं मेगु देछा हयेगु दिकल। 7फुक्क ज्या यायेत इमिके माःगु स्वयाः अप्वः सामान दये धुंकल।
पवित्र पाल त्वपुइगु इलां
8ज्या याये सःपिं मनूतय्सं भिंगु वँचुगु प्याजीगु व ह्याउँगु रंगयागु सूती कापःयागु झिपा कापःया इलां दय्कल। थुकी करूबया बांलाक बुत्ता भरय् यानातःगु दु।#प्रस २६:१-३७ 9फुक्क कापः १२ मिटर हाकः व २ मिटर ब्या दुगु जुल। फुक्क कापः अपाय्कू हे दुगु जुल। 10न्याकू कापःयात सुयाः छपाः हे यात। अले मेगु न्याकू कापःयात नं अथे हे यात। 11न्हापां स्वाःगु कापःया सिथय् वँचुगु कापःयागु स्वःतिपाँय् दय्कल। अथे हे लिपाः स्वाःगु कापःया सिथय् सिथय् नं वँचुगु कापःयागु स्वःतिपाँय् दय्कल। 12अले न्हापां स्वाःगु कापःया न्हापांगु कुचाय् नेय्गू स्वःतिपाँय् दय्कल। अथे हे लिपा स्वाःगु कापःया लिपांगु कुचाय् नं नेय्गू स्वःतिपाँय् दय्कल। उपिं चुलिंचू लाःगु जुल। 13अनंलि लुँयागु अंकुसि दय्काः थ्व हे अंकुसि निपाः कापःयात छपाः यानाः स्वानाबिल। थुकथं निकू कापः छकू जुल।
14अनंलि थ्व हे कापःया च्वय् त्वपुयेत च्वलय्चिगु सँयागु झिंछकू कापः दय्कल। 15फुक्क कापः अपाय्कू हे दुगु जुल। अले १३ मिटर हाकः व २ मिटर ब्या जुइक दय्कल। 16न्याकू कापःयात स्वानाः छकू यानाः मेगु खुकू कापःयात नं स्वानाः छकू यात। 17अले न्हापां स्वाःगु कापःया लिपांगु कुचाय् नेय्गू स्वःतिपाँय् दय्कल। लिपा स्वाःगु कापः नं अथे यात। 18अनंलि कँय्यागु नेय्गू अंकुसि दय्काः निपाः कापःयात छपाः यानाः स्वानाबिल। 19पवित्र पाल त्वपुयेत हानं मेगु नितँ इलां तंछात। छगू ह्याउँगु रंग छिनातःगु फैया छेंगूयागु व मेगु डल्फिनयागु छेंगूयागु।
पवित्र पालया सिँपौ
20इलां दिकेत खयः सिमाया सिँपौ दय्कल। 21फुक्क सिँपौ ४ मिटर हाकः व ६६ से.मि. ब्या दुगु जुल। 22फुक्क सिँपौतय् निगू निगू चूल तानाः स्वानातल। पवित्र पालया फुक्क सिँपौत थुकथं हे दय्कल। 23पवित्र पालया दच्छिनपाखे तयेत निइपौ सिँपौ दय्कल। 24निइपौ सिँपौया तःलय् वहःयागु पिइगू लिधंसा दय्कल। छपौ छपौ सिँपौया तःलय् निगू निगू लिधंसा। 25पवित्र पालया उत्तरपाखे तयेत निइपौ सिँपौ दय्कल। 26अले निइपौ सिँपौया तःलय् वहःयागु पिइगू लिधंसा दय्कल। छपौ छपौ सिँपौया तःलय् निगू निगू लिधंसा। 27पवित्र पालय् ल्युने पच्छिमपाखे तयेत खुपौ सिँपौ दय्कल। 28अले ल्यूनेया निगू कुनय् निपौ सिँपौ दय्कल। 29थुपिं निपतिं च्वंनिसें क्वथ्यंक देतनातःगु जुल। थुपिं कुन्चाय् च्वंगु सिँपौतय्त च्वय्निसें क्वय् तक हे स्वाकातःगु दु। निखें कुन्चाया लागि थुपिं सिँपौत थुकथं दय्कल। 30थुकथं अन च्यापौ सिँपौ दय्कल। अले थुकिया निंतिं छपौ सिँपौया तःलय् निगू निगू यानाः झिंखुगू वहःयागु लिधंसा दय्कल।
31खयःसिँयागु झिंन्यागू खगः दय्काः न्यागू खगः छखेपाखे, 32अले मेखेपाखे न्यागू खगः व पच्छिमपाखे ल्युने न्यागू खगः दय्कल। 33सिँपौतय् दथुइ तइगु खगः छगू कुनं मेगु कुनय् तक थ्यंगु छगू हे खगः दय्कल। 34अले सिँपौयात लुं हिनाबिल। खगः दिकेगु चाःचात नं लुँयागु दय्कल। खगःयात नं लुं हिनाबिल।
पवित्र व महा-पवित्रगु थाय्या पर्दा
35अले वँचुगु, प्याजीगु व ह्याउँगु भिंगु सूती कापःयागु पर्दा दय्कल। कापतय् भिंगु कां करूबया बुत्ता भरय् याकेबिल। 36वं उकिया निंतिं खयःसिँयागु प्यंगः थां दय्काः लुं हिनाबिल। उकी काकिगु अंकुसि लुँयागु खः। वं इमिगु निंतिं वहःयागु प्यंगू लिधंसा दय्कल। 37पालया लुखाय् तयेत वँचुगु, प्याजीगु व ह्याउँगु भिंगु सूती कापःयागु बुत्ता भरय् यानातःगु पर्दा दय्कल। 38थ्व पर्दाया निंतिं खयःसिँयागु न्यागः थां दय्कल। उकियात लुं हिनाबिल। उकिया अंकुसि लुँयागु जुल। अले न्यागः थांयात कँय्यागु न्यागः लिधंसाय् दिकल।
Currently Selected:
प्रस्थान 36: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
