प्रस्थान 35
35
विश्रामबारया विधि
1मोशां इस्राएलया फुक्क मनूतय्त छथाय् मुंकाः इमित धाल, “परमप्रभुं उजं बियादीगु छिमिसं यायेमाःगु ज्या थथे दु – 2खुन्हु तक ज्या यायेगु या, अले न्हय्न्हु खुन्हुया दिं धाःसा छिमिगु निंतिं पवित्र खः। थ्व दिं परमप्रभुया निंतिं विश्रामबार खः। व दिं सुनानं ज्या यात धाःसा वयात स्याना छ्वयेमाः।#प्रस २०:८-११; २३:१२; ३१:१५; ३४:२१; लेवी २३:३; व्य ५:१२-१४ 3छिमिगु सुयागु छेँ विश्रामबार खुन्हु भुतुलिइ मि तक च्याके मते।”
नापलायेगु पालया निंतिं ज्वलं
4मोशां फुक्क मनूतय्त थथे धाल, “परमप्रभुं उजं बियादीगु खँ थ्व हे खः।#३५:४-९ प्रस २५:१-९ 5छिपिं थःपिनि दथुं परमप्रभुया निंतिं देछा मुँ। बीगु मनदुपिं फुक्कसिनं परमप्रभुयाथाय् लुँ, वहः, कँय्, 6वँचुगु, प्याजीगु व ह्याउँगु का अले भिंगु सूती कापः, च्वलय्चिगु सँ, 7ह्याउँगु रंग छिया तःगु फैचायागु छेंगू, डल्फिनयागु छेंगू, खयःसिँ, 8मतःया निंतिं जैतूनयागु चिकं, अभिषेक याइगु चिकं व नस्वाःगु गुँगूयात मसला, 9अले एपोद व छातिपाताय् घाकेत थीथी मू वंगु थीत हजि।
10“छिपिं मध्ये ज्या सःपिं वयाः परमप्रभुं उजं बियादीगु फुक्क दय्कि#प्रस ३९:३२-४३– 11नापलायेगु पाल, पवित्र पाल व त्वपुइगु इलां, अंकुसि, सिँपौ, खगः, थांत व लिधंसात। 12अले सनू व उकिया न्वःत, प्रायश्चितया कृपा-आसन व उकी न्ह्यःने यख्खानातःगु पर्दा, 13तेबिल व उकिया न्वःत, अले उकिया फुक्क ज्वलं, व देछायेगु मरि, 14त्वाःदेवा व उकिया ज्वलं, अले पाल्चाया निंतिं चिकं, 15गुँगूया वेदी व उकिया न्वःत, अभिषेक याइगु चिकं, नस्वाःगु गुँगू व पवित्र पालयागु लुखाया पर्दा, 16होमबलिया वेदी, व उकी च्वंगु कँय्यागु चालिंचा, उकिया न्वःत व फुक्कं ज्वलं। अले कँय्यागु ल्हाःतुति सिलेगु बाता व उकियागु लिधंसा। 17अले चुकया प्यखेरं च्वंगु ख्वातुगु कापः, उकियागु थां व लिधंसा, चुकया ध्वाखाया पर्दा। 18नापलायेगु पालया चुकयात थनेत नकिं व खिपः। 19पवित्र पालय् सेवा यायेत थानातःगु वसः- हारून तःधंम्ह पुजाहारीयात पवित्र वसः अले पुजाहारीया सेवा यायेत वया काय्पिनिगु वसः।”
20अले इस्राएलया फुक्क खलः मोशाया न्ह्यःनं थथःगु पालय् लिहां वन। 21देछा छायेगु मनदुपिं फुक्क वल अले नापलायेगु पाल दय्केत, अन सेवा यायेत व पवित्र वसः सुइत परमप्रभुयाथाय् देछा हल। 22देछा छायेगु मनदुपिं मिसा व मिजंतय्सं मार्वरि, अंगू, चाः व सिखः थें ज्याःगु लुँयागु तिसा हल। 23सुयाके सुयाके वँचुगु, प्याजीगु व ह्याउँगु का, भिंगु सूती कापः, च्वलय्चिया सँ, ह्याउँगु रंग छिनातःगु फैचायागु छेंगू, डल्फिनयागु छेंगू दु, इमिसं व हल। 24वहः व कँय्यागु देछा छाइपिन्सं परमप्रभुयात देछा धकाः हल। सुयाके ज्या यायेत खयःसिँ दु, वं व हल। 25ज्या सःपिं मिसातय्सं थःम्हं हे निलातःगु वँचुगु, प्याजीगु, ह्याउँगु का व सूती कापः हल। 26अले मनदुपिं व ज्या सःपिं फुक्क मिस्तय्सं च्वलेचिया सँया तँय निल। 27नायःतय्सं एपोद व छातिपाताय् तयेत आनिक्स व मेगु थीत हल। 28मत च्याकेत, अभिषेक यायेत व गुँगू थनेत मसला व जैतूनया चिकं हल। 29मनदुपिं इस्राएली मिसा व मिजंतय्सं परमप्रभुं मोशापाखें बियादीगु उजंकथं फुक्क ज्याया निंतिं परमप्रभुयाथाय् थः यःछि देछा हल।
ज्या सःपिं बजलेल व ओहोलीआब
30अले मोशां इस्राएलीतय्त धाल, “स्व, परमप्रभुं यहूदाया कुलयाम्ह, हूरया छय्, ऊरीया काय्, बजलेलयात नां कयाः सःतादीगु दु।#प्रस ३१:१-११ 31अले वयात परमेश्वरया आत्मां सीप, खुबी व ल्हाःया फुक्क कथंया ज्याया ज्ञानं जाय्कादीगु दु। 32थ्व वं लुँ, वहः व कँय्यागु बांलाःगु बुत्ता दय्केगु, 33थुनेत थी चायेगु, सिँइ बुत्ता दय्केगु अले फुक्क कथंयागु ल्हाःया ज्या बांलाक यायेमा धकाः यानादीगु खः। 34परमप्रभुं वयात व दानया कुलयाम्ह अहीसामाकया काय् ओहोलीआब निम्हय्सित मेपिन्त स्यनेगु खुबी बियादीगु दु। 35वय्कलं इपिं ल्हाःया ज्या व नमूना दय्केगु ज्या वँचुगु, प्याजीगु व ह्याउँगु का अले भिंगु सुति कापतय् बुत्ता भरय् यायेगु व थायेगु ज्याय्, फुक्क कथंयागु बांलाक ज्या याये सःपिं जुइमाः धकाः इमित सीपं जाय्कादीगु दु।”
Currently Selected:
प्रस्थान 35: NEW
Highlight
Share
Compare
Copy
Want to have your highlights saved across all your devices? Sign up or sign in
© 2024 Nepal Bible Society, Newa Christian
Literature Center and Wycliffe Bible Translators, Inc.
